ބީއެމްއެލްގެ ރިވަރޑް ޕްރޮގްރާމް އިފްތިތާހުކޮށްފި

ބޭންކް އޮފް މޯލްޑިވްސް (ބީއެމްއެލް) ގެ ރިވަރޑް ޕްރޮގްރާމް އިފްތިތާހުކޮށްފިއެވެ.

މިއީ ރާއްޖޭގެ ބޭންކަކުން ހިންގާ މިފަދަ ފުރަތަމަ ލޯޔަލްޓީ ޕްރޮގްރާމެވެ. ހޮޓެލް ޖެންގައި މިއަދު އިފްތިތާހުކުރި މި ޕްރޮގްރާމަކީ ބީއެމްއެލްގެ ކްރެޑިޓް ކާޑު ބޭނުންކުރާ ކަސްޓަމަރުންނަށް ޚާއްސަ އެކްސްކްލޫސިވް ޕްރޮގްރާމެކެވެ.

ބީއެމްއެލްގެ ސީއީއޯ އަދި މެނޭޖިންގ ޑައިރެކްޓަރ ޓިމް ސޯޔަރ ވިދާޅުވީ މިހާރު ބީއެމްއެލްގެ ކްރެޑިޓް ކާޑު ބޭނުންކުރައްވާ ފަރާތްތަކަށް މިއަދުގެ ވަގުތެއްގައި މި ޕްރޮގްރާމަށް ރެޖިސްޓަރީ ވުމަށް އީމެއިލްއެއް ފޮނުވޭނެ ކަމަށެވެ. "އަދި އެންމެ ދެތިން ކްލިކުން މިޕްރޮގްރާމަށް ރެޖިސްޓަރ ވެވޭނެ" ޓިމް ފާހަގަ ކުރިއެވެ.

މިޕްރޮގްރާމްގެ ދަށުން ބީއެމްއެލް ކްރެޑިޓް ކާޑުން ވިޔަފާރި ކުރާ ކޮންމެ ފަހަރަކު ޕޮއިންޓް އިތުރުވާނެއެވެ. މީގެ ތެރޭގައި ރާއްޖެއާއި ބޭރުގެ ގައުމުތަކުގައި ކުރާ ވިޔަފާރީގެ އިތުރުން އޮންލައިންކޮށް ކުރާ ވިޔަފާރިތައް ވެސް ހިމެނެއެވެ. މިޕްރޮގްރާމްގެ ދަށުން ކަސްޓަމަރުންނަށް ލިބޭ ރިވަރޑް ޕޮއިންޓާއި ރިޑީމް ޕޮއިންޓުގެ އިތުރުން ބޯނަސް ޕޮއިންޓު ވެސް ބީއެމްއެލް ރިވަރޑް ސައިޓުން ބަލައިލެވޭނެއެވެ.

ބީއެމްއެލް ރިވަރޑް ޕްރޮގްރާމުން ކަސްޓަމަރުންނަަށް ލިބޭ ރިޑީމް ޕޮއިންޓުތަކުން ފްލައިޓް ޓިކެޓު ގަތުމާއި، މަޝްހޫރު އެކި ބްރޭންޑުތަކުގެ ގިފްޓް ކާޑު ގަތުން ފަދަ ވިޔަފާރިތައް ކުރެވޭނެއެވެ. ރިޑީމް ކުރެވޭ ގޮތްތައް ބީއެމްއެލްގެ ރިވަރޑް ސައިޓުގައި ވަރަށް ތަފްސީލުކޮށް ހުންނާނެއެވެ.