ރައްޔިތުންގެ މަޖިލީހުގެ ދަފްތަރުގައި އެމްއެންޕީ ހިމަނައިފި
27 އޮކްޓޯބަރު 2021 | ބުދަ 04:46މަޖިލީހުގެ ޕާޓީތަކަށް އައި ބަދަލާ ގުޅިގެން ކޮމިޓީތަކަށް އަންނަ ބަދަލު ފާސްކުރުމަށް ހުށަހަޅާނެ
އެމްއެންޕީ ރަޖިސްޓްރީ ކުރުމަށް ފޯމް ހުށަހެޅުމުގެ ތެރެއިން
ރައްޔިތުންގެ މަޖިލީހުގެ ދަފްތަރުގައި މޯލްޑިވްސް ނެޝަނަލް ޕާޓީ (އެމްއެންޕީ) ހިމަނައިފިއެވެ.
ރައްޔިތުންގެ މަޖިލީހުގެ ބުދަ ދުވަހުގެ ޖަލްސާގައި މިކަން އިއުލާން ކުރެއްވީ ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދެވެ. ރިޔާސަތުން އަންގާ އެންގުމެއްގެ ގޮތުގައި މިކަން އިއުލާން ކުރައްވަމުން ރައީސް ނަޝީދު ވިދާޅުވީ، ރައްޔިތުންގެ މަޖިލީހުގެ ވަކި ޕާޓީއަކަށް ނިސްބަތް ނުވާ މެމްބަރުންގެ ގޮތުގައި ތިއްބެވި ދަނގެތި ދާއިރާގެ މެމްބަރު މުހައްމަދު ނާޒިމް، ތިމަރަފުށި ދާއިރާގެ މެމްބަރު އަބްދުﷲ ރިޔާޒް އަދި ވިލިމާލެ ދާއިރާގެ މެމްބަރު އަހުމަދު އުޝާމް އިލެކްޝަން ކޮމިޝަންގެ ސިޔާސީ ޕާޓީގެ ދަފްތަރުގައި ރަޖިސްޓްރީ ކޮށްފައިވާ މޯލްޑިވްސް ނޭޝަނަލް ޕާޓީގެ މެމްބަރުންގެ ރަޖިސްޓްރީގައި ހިމެނިފައިވާތީ އާއި، އެކަމާ ގުޅުންހުރި ލިޔުންތައް މަޖިލީހަށް ލިބިފައިވާތީ، މި ތިން މެމްބަރުންނަކީ އެމްއެންޕީގެ މެމްބަރުންގެ ގޮތުގައި މަޖިލީހުގައި ރަސްޓްރީކޮށް، މަޖިލީހުގެ ދަފްތަރުގައި އެ ޕާޓީ ހިމަނާފައިވާ ކަމަށެވެ.
މިއާއެކު މިހާރު މަޖިލީހުގައި ޕާޓީތައް ބެހިފައިވާ ގޮތަކީ، އެމްޑީޕީގެ 65 މެމްބަރުން، ޕީޕީއެމްގެ 7 މެމްބަރުން، ޖުމްހުރީ ޕާޓީގެ 3 މެމްބަރުން، ޕީއެންސީ 3 މެމްބަރުން، އެމްއެންޕީގެ 3 މެމްބަރުން، މޯލްޑިވްސް ޑިވެލޮޕްމެންޓް އެލައަންސްގެ 2 މެމްބަރުން، ވަކި ޕާޓީއަކަށް ނިސްބަތް ނުވާ 5 މެމްބަރުންނެވެ. މަޖިލީހުގެ ޕާޓީތަކަށް އައި ބަދަލާ ގުޅިގެން ކޮމިޓީތަކަށް އަންނަ ބަދަލު ފާސްކުރުމަށް ހުށަހަޅުއްވާނެ ކަމަށް ވެސް ރައީސް ނަޝީދު ވިދާޅުވިއެވެ.
ސިޔާސީ ޕާޓީއެއް އުފެއްދުމުގެ ހުއްދަ ދެވުނުތާ 2 މަހާއި 12 ދުވަހުގެ ތެރޭގައި މޯލްޑިވްސް ނެޝަނަލް ޕާޓީ (އެމްއެންޕީ) ރަޖިސްޓްރީކުރުމަށް ބޭނުންވާ ހުރިހާ ގާނޫނީ އިޖުރާއަތްތަކެއް ފުރިހަމަކުރުމަށްފަހު ރަޖިސްޓްރީ ކުރީ މި މަހުގެ 25 ވަނަ ދުވަހުއެވެ.
އެމްއެންޕީގެ ރައީސް މުހައްމަދު ނާޒިމް ވިދާޅުވީ، ޕާޓީގެ ރަޖިސްޓްރޭޝަންގެ ކަންތައް ބާރު ސްޕީޑުގައި ކުރިޔަށްދިޔައީ ދިވެހި ރައްޔިތުން ދިން އެއްބާރުލުމުގެ ސަބަބުން ކަމަށާއި، ޕާޓީ ރަޖިސްޓްރީ ކުރެވުމާއެކު، މަސައްކަތްތައް އިތުރަށް ފުޅާވެގެންދާނެ ކަމަށެވެ. އަދި ޕާޓީން މިހާރު އަމާޒު ކަނޑައަޅާފައިވަނީ 10،000 މެމްބަރުން ހަމަކުރުމަށް ކަމަށާއި، އެކަމަށްޓަކައި ކުރަން ޖެހޭ ކަންކަން ކުރަމުންދާ ކަމަށެވެ.
އެމްއެންޕީ ސިޔާސީ ޕާޓީއެއްގެ ގޮތުގައި ރަޖިސްޓްރީކުރުމަށް ހުށަހަޅާފައިވަނީ ރާއްޖޭގެ އެކިކަންކޮޅުތަކުން 5000 މެންބަރުންނަށް ވުރެ ގިނަ ފޯމާއެކުއެވެ. އިލެކްޝަންސް ކޮމިޝަނުން, މޯލްޑިވްސް ނެޝަނަލް ޕާޓީގެ ނަމުގައި ސިޔާސީ ޕާޓީއެއް އުފެއްދުމަށް މަސައްކަތް ކުރުމުގެ ހުއްދަ ދީފައިވަނީ 15 ޖުލައި 2021 ގައެވެ. އެގޮތުން މިދިޔަ މަދު ދުވަސްކޮޅުގެ ތެރޭގައި އެމްއެންޕީއާ ގިނަ އަދަދެއްގެ މެންބަރުން ދިޔައީ ގުޅެމުންނެވެ.
