ސޯލްޝެއާއަށް ޔުނައިޓެޑުގައި އިތުރު ފުރުސަތެއް

މެންޗެސްޓާ ޔުނައިޓެޑުގެ ނޯވޭގެ ކޯޗު އޮލެ ގުނަ ސޯލްޝެއާއަށް އިތުރު ފުރުސަތެއް ދޭން އެ ކުލަބުގެ ބޯޑުން ނިންމާފައިވާ ކަމަށް ރިޕޯޓުތައް ބުނެފިއެވެ.

އުމުރުން 48 އަހަރުގެ ސޯލްޝެއާ ޔުނައިޓެޑާ ހަވާލުވީ 2018 ވަނަ އަހަރުގެ ޑިސެމްބަރު މަހު އެ ޓީމުގެ ކޯޗުގެ މަގާމުން ހޯސޭ މޮރީނިއޯ ވަކިކުރުމުން ވަގުތީ ކޯޗެއްގެ ގޮތުގައެވެ. އެކަމަކު ސޯލްޝެއާގެ ކޯޗުކަމުގައި ޔުނައިޓެޑުން ކުޅުނު ފުރަތަމަ ސީޒަނުގައި މޮޅު ކުޅުމެއް ދެއްކުމާއެކު، 2019 ވަނަ އަހަރުގެ މާޗު މަހު ވަނީ ސޯލްޝެއާގެ އެއްބަސްވުން ދާއިމީކޮށް، އިތުރު ތިން އަހަރަށް އޭނާ ބަހައްޓަން ނިންމާފައެވެ.

އެކަމަކު މި ފަހުން ޔުނައިޓެޑުގެ ކުޅުން ވަރަށް ބޮޑަށް ދަށްވެފައިވާއިރު، އެ ޓީމުން އެންމެ ފަހުން ކުޅުނު ނުވަ މެޗުގެ ތެރެއިން ފަސް މެޗުން ވަނީ ބަލިވެފައެވެ. އަދި ލީގުގައި އެންމެ ފަހުން ކުޅުނު ހަތަރު މެޗުންވެސް ޔުނައިޓެޑަށް މޮޅެއް ލިބިފައެވެ. އެގޮތުން ލީގުގައި އެންމެ ފަހުން ކުޅުނު މެޗުން ޔުނައިޓެޑް ވަނީ އަމިއްލަ ދަނޑުގައި ވާދަވެރި ލިވަޕޫލް އަތުން 5-0 ގެ ތަފާތު ބޮޑު ނަތީޖާއަކުން ބަލިވެފައެވެ. މިއީ ޔުނައިޓެޑުގެ ތާރީޚުގައި ލިވަޕޫލް އަތުން އެންމެ ތަފާތު ބޮޑުކޮށް ބަލިވި ފުރަތަމަ ފަހަރެވެ.

އެއާއެކު ޔުނައިޓެޑުގެ ކޯޗުގެ މަގާމުން ސޯލްޝޭއާ ވަކިކުރުމާ މެދު ކުލަބުން ވަރަށް އަވަހަށް ގޮތެއް ނިންމާނެ ކަމަށް ބެލުވުނު ނަމަވެސް، ރިޕޯޓުތައް ބުނާ ގޮތުން ސޯލްޝެއާއަށް އިތުރު ފުރުސަތެއް ދޭން އެ ކުލަބުގެ ބޯޑުން ވަނީ ނިންމާފައެވެ. އަދި މި ކަމަށް ޔުނައިޓެޑުގެ ލެޖެންޑަރީ ކޯޗު ސާ އެލެކްސް ފާގަސަންވެސް އެއްބަސްވެފައިވާ ކަމަށް ރިޕޯޓުތައް ބުނެއެވެ.

އިނގިރޭސި މީޑިއާ ރިޕޯޓުތައް ބުނާ ގޮތުން ސޯލްޝޭއާ ވަކިކުރުމާ މެދު ދެން ގޮތެއް ނިންމާނީ އަންނަ ހަފުތާގެ ހޮނިހިރު ދުވަހުގެރޭ ލީގުގައި ޓޮޓެންހަމް ހޮޓްސްޕާއާ ދެކޮޅަށް ކުޅޭ މެޗުގެ ނަތީޖާއަށް ބެލުމަށްފަހުއެވެ. އެއާއެކު އަންގާރަ ދުވަހު ޔުނައިޓެޑުން ކުރިއަށްގެންދިޔަ ފަރިތަކުރުންތަކުގައި ސޯލްޝެއާ ވަނީ ބައިވެރިވެފައެވެ.

ޔުނައިޓެޑުގައި ސޯލްޝެއާގެ މުސްތަގުބަލާ މެދު ސުވާލު އުފެދިފައިވާއިރު، ރިޕޯޓުތައް ބުނާ ގޮތުން ޔުނައިޓެޑުން ދެން ގެންނަން ބޭނުންވާ ކޯޗަކީ އިޓަލީގެ އެންޓޯނިއޯ ކޮންޓޭއެވެ. ކޮންޓޭ ވަނީ މިދިޔަ ސީޒަނުގެ އިޓާލިއަން ލީގުގެ ޗެމްޕިއަންކަން އިންޓަ މިލާނަށް ހޯދައިދިނުމަށް ފަހު އެ ޓީމުގެ ކޯޗުކަން ދޫކޮށްލާފައެވެ.

މި ފަހަކަށް އައިސް ޔުނައިޓެޑުގެ ނަތީޖާތައް ވަރަށް ބޮޑަށް ދަށްވެފައިވާއިރު، ސޯލްޝެއާއަށް އަދި މިހާތަނަށް ޔުނައިޓެޑާއެކު ކާމިޔާބީއެއް ހޯދިފައެއް ނުވެއެވެ. އެގޮތުން ޔުނައިޓެޑުން އެންމެ ފަހުން ކާމިޔާބުކުރި މުބާރާތަކީ 2017 ވަނަ އަހަރުގެ ޔުއެފާ ޔޫރޮޕާ ލީގެވެ. އެ މުބާރާތް ޔުނައިޓެޑުން ކާމިޔާބުކޮށްފައިވަނީ މޮރީނިއޯގެ އިރުޝާދުގެ ދަށުންނެވެ.