ބޮޑުތިލަދުންމަތީގެ މަދަނީ ޖަމްއިއްޔާތަކުގެ މަހާސިންތާ ފަށައިފި
25 އޮކްޓޯބަރު 2021 | ހޯމަ 11:39ހއ ،ހދ އަދި ށ މިތިން އަތޮޅުގެ މަދަނީ ޖަމްއިއްޔާތައް މިމަހާސިންތާގައި ބައިވެރިވޭ
ބޮޑުތިލަދުންމަތީގެ މަދަނީ ޖަމްއިއްޔާތަކުގެ މަހާސިންތާ ފެށުން
މިއަހަރުގެ ޒުވާނުންގެ ދުވަހާ ގުޅުވައިގެން ޔޫތު މިނިސްޓްރީން އިންތިޒާމްކޮށްގެން ކުރިއަށް ގެންދާ ބޮޑުތިލަދުންމަތީގެ މަދަނީ ޖަމްއިއްޔާ ތަކުގެ މަހާސިންތާ ހއ. އިހަވަންދޫގައި ރޭ ފަށައިފިއެވެ.
ބޮޑުތިލަދުންމަތީގައި ހިމެނޭ ހއ. އަތޮޅާއި، ހދ. އަތޮޅާއި އަދި ށ. އަތޮޅުގެ މަދަނީ ޖަމްއިއްޔާތަކަށް ޚާއްޞަކޮށްގެން ރޭ ފެށި މި މަހާސިންތާ މިމަހުގެ 27 ވަނަ ދުވަހުގެ ނިޔަލަށް ކުރިއަށް ދާނެއެވެ.
މި ތިން އަތޮޅުގެ މަދަނީ ޖަމްއިއްޔާތަކުގެ 70 ބައިވެރިންނާއެކު ކުރިއަށް ގެންދާ މަހާސިންތާ ރޭ ފެށިއިރު, އިއްޔެ ހެނދުނު ވަނީ މަހާސިންތާގެ ބައިވެރިންނަށް އަމާޒުކޮށްގެން "ހަށިހެޔޮ ދުޅަހެޔޮ" ޕްރޮގްރާމްވެސް ކުރިއަށް ގެންގޮސްފައެވެ.
މި މަހާސިންތާގެ މަގުސަދެއްކަމުގައި ކަނޑައަޅާފައި ވަނީ، މަދަނީ ޖަމްއިއްޔާތައް ހިންގުމުގައި ހުރި ދަތިތަކާއި ގޮންޖެހުންތައް ދެނެގަނެ، ހަރުދަނާ މަދަނީ މުޖުތަމައެއް ބިނާކޮށް, ފަހި ވެއްޓެއް ގާއިމުކުރުމަށް ބޭނުންވާ ކަންކަން ދެނެގަތުމާއި، ގައުމީ ތަރައްގީއާއި ހެޔޮވެރިކަން އަދި އިޖުތިމާއީ ތަފާތު މައްސަލަތަކުން އަރައިގަތުމުގައި ޖަމްއިއްޔާތަކުގެ ދައުރާ ގުޅޭގޮތުން ހޭލުންތެރިކުރުވުމެވެ.
މިއަހަރުގެ ޒުވާނުންގެ ދުވަސް ރަސްމީކޮށް ފާހަގަކުރީ ކުޅުދުއްފުށި ސިޓީގައެވެ.
