މާސޭ އާއި ޕީއެސްޖީގެ ކުރިމަތިލުން އެއްވަރު

ފްރެންޗް ލީގުގައި އާދީއްތަ ދުވަހުގެރޭ އޮލިމްޕިކް މާސޭ އާއި ޕީއެސްޖީ ބައްދަލުކުރި މެޗު އެއްވަރުވެގެން ނިމިއްޖެއެވެ.

މާސޭގެ ދަނޑުގައި ކުޅުނު މި މެޗު ނިމުނީ ދެ ޓީމުން ކުރެ ޓީމަކަށް ލަނޑެއް ނުޖެހިއެވެ.

ފޯރިގަދަ ކުޅުމެއް ފެނިގެންދިޔަ މި މެޗުގެ ފުރަތަމަ ހާފުގައި ދެ ޓީމުންވެސް ލަނޑެއް ޖެހި ނަމަވެސް، ވީޑިއޯ އެސިސްޓަންޓް ރެފުރީ (ވީއޭއާރް) އިން އެ ދެ ލަނޑުވެސް ބަލައިގެންފައެއް ނުވެއެވެ. އެގޮތުން މެޗު ފަށައިގެން 14 ވަނަ މިނެޓުގައި މާސޭގެ ލުއާން ޕެރޭސް އަތުން ބައިކޮޅަށް ލަނޑެއް ވަން ނަމަވެސް، ޕީއެސްޖީގެ ނޭމާ އޮފްސައިޑުގައި ހުރުމުން ވީއޭއާރުން އެ ލަނޑު ބަލައިގެންފައެއް ނުވެއެވެ. އަދި އޭގެ ހަ މިނެޓު ފަހުން މާސޭގެ ޕޮލް ލިރޮލާ ހުރަސްކޮށްދިން ބޯޅައަކުން އާކަންޑިއުޝް މިލިކް ލަނޑެއް ޖަހައިދިން ނަމަވެސް، ލިރޮލާ އޮފްސައިޑުގައި ހުރުމުން އެ ލަނޑުވެސް ބަލައިގެންފައެއް ނުވެއެވެ.

އޭގެ ފަހުން މެޗުގެ 26 ވަނަ މިނެޓުގައި އޭރިއާ ތެރެއިން ޕީއެސްޖީގެ ތަރި ލިއޮނެލް މެސީ ބޮލުން ނުރައްކާތެރި ހަމަލާއެއް ފޮނުވާލި ނަމަވެސް، މާސޭގެ ގޯލްކީޕަރު ޕައު ލޮޕޭޒް ވަނީ އެ ހަމަލާ ހުށިޔާރުކަމާއެކު ދިފާއުކޮށްފައެވެ. އަދި ފުރަތަމަ ހާފު ނިމެން ގާތް ވެފައި ވަނިކޮށް އޭރިއާ ބޭރުން މެސީ ފޮނުވާލި ހަމަލާއެއް ދިޔައީ ގޯލުގެ އަރިމަތީ ދަނޑި ކައިރިން ބޭރަށެވެ.

މި މެޗުގައި ޕީއެސްޖީއަށް މަސައްލަތަކެއް ކުރިމަތިވީ ދެވަނަ ހާފު ފަށައިގެން 12 ވަނަ މިނެޓުގައި އެ ޓީމުގެ އަޝްރަފް ހަކީމީއަށް ސީދާ ރަތް ކާޑެއް ދެއްކުމުންނެވެ. ވީއޭއާރުގެ އެހީ ހޯދުމަށްފަހު ރެފުރީ އޭނާއަށް ރަތް ކާޑެއް ދެއްކީ މާސޭގެ ޗެންގިޒް އުންޑާއަށް ކުރި ފައުލަކާ ގުޅިގެންނެވެ. އެކަމަކު އޭގެ ފަހުން ޕީއެސްޖީން ވަނީ ރަނގަޅަށް ޑިފެންސްކޮށް މާސޭ ހުއްޓުވާފައެވެ.

މި ނަތީޖާއާއެކުވެސް ތާވަލުގެ އެއްވަނައިގައި ޕީއެސްޖީ އޮތީ ހަތް ޕޮއިންޓުގެ ލީޑަކާއެކުއެވެ. މި ސީޒަނުގެ ލީގުގައި މިހާތަނަށް ކުޅުނު 11 މެޗުންވެސް ޕީއެސްޖީ ބަލިވެފައި ނުވާއިރު، އެ ޓީމުން ވަނީ 28 ޕޮއިންޓް ހަމަކޮށްފައެވެ. ދެވަނައިގައި އޮތް ލެންސްއަށް 11 މެޗުން 21 ޕޮއިންޓް ލިބިފައިވާއިރު، ޕީއެސްޖީއާ އެއްވަރުކުރި މާސޭ އޮތީ ތާވަލުގެ ހަތަރުވަނައިގައި 10 މެޗުން 18 ޕޮއިންޓާއެކުއެވެ.