އޮލިމްޕަސް ހޯލު ލިސްޓުކުރެވިފައި ވަނީ ހެރިޓޭޖުގެ ގޮތުގައި - އިކުރާމް
އޮލިމްޕަސް ހޯލުގެ އަޕްގްރޭޑިންގ މަސައްކަތް ކުރިޔަށް ދަނީ ހޯލަށް ގެއްލުމެއް ނުވާނެހެން
ހެރިޓޭޖް މިނިސްޓްރީގެ ސްޓޭޓް މިނިސްޓަރ މުހައްމަދު އިކްރާމް
އޮލިމްޕަހުގެ ހޯލު ލިސްޓު ކުރެވިފައިވަނީ ހެރިޓޭޖުގެ ގޮތުގައި ކަމަށް ހެރިޓޭޖް މިނިސްޓްރީގެ ޑެޕިއުޓީ މިނިސްޓަރ މުހައްމަދު އިކުރާމް ވިދާޅުވެއްޖެއެވެ.
އޮލިމްޕަސް ހޯލު އަޕްގްރޭޑް ކުރުމަށް މި މަހުގެ 21 ވަނަ ދުވަހު ބަޔަކާ ހަވާލުކޮށްފައިވާއިރު، އެތަނުގެ އަޕްގްރޭޑިންގެ އަަމަލީ މަސައްކަތް ވަރަށް އަވަހަށް ފެށިގެންދާނެ ކަމަށް މީގެ ކުރިން ހެރިޓޭޖް މިނިސްޓްރީން ވަނީ ބުނެފައެވެ.
މިހާރު ޕްލޭންކޮށްފައިވާ ގޮތަށް މަސައްކަތްތައް ކުރިއަށްދާ ކަމަށްވާނަމަ އަންނަ އަހަރުގެ މާޗް މަހުގެ ތެރޭގައި އޮލިމްޕަސް ތަރައްގީކުރުމުގެ މަސައްކަތް ނިންމައި އާއްމުންނަށް ހުޅުވާލާނެއެވެ.
އޮލިމްޕަހުގެ ފުރަތަމަ ފިޔަވަހީގެ މަސައްކަތް ނިމުމަކާ ގާތް ވެފައިވާއިރު، އެކަމަށް ދެ މިލިއަން ރުފިޔާ ވަނީ ޚަރަދުވެފައެވެ. އިންޑިއާގެ ހިލޭ އެހީގެ ދަށުން ދެވަނަ ފިޔަވަހީގެ މަސައްކަތް ފަށާއިރު އެކަމަށް 8 މިލިއަން ރުފިޔާ ޚަރަދުވާނެ ކަމަށް ބެލެވެއެވެ.
ރާއްޖެ ޓީވީގެ "ފަލަސުރުޚީ" ޕްރޮގްރާމްގައި ވާހަކަ ދައްކަމުން އިކްރާމް ވިދާޅުވީ މިކަހަލަ ސިނަމާތަކަކީ ދުނިޔޭގެ ބައެއް ގައުމުތަކުގައިވެސް ވަރަށް ރަނގަޅަށް ބަލަހައްޓާ ތަންތަން ކަމަށާއި، އަދި ޒަމާނަށް އަންނަ ބަދަލުތަކާއެކު އަޕްގްރޭޑިންގެ މަސައްކަތްވެސް ކުރާތަންތަން ކަމަށެވެ. އެހެންކަމުން މި ޕްރޮޖެކްޓް ފަށާފައިވަނީ ދުނިޔޭގެ އެހެން ގައުމުތަކުގައި ކަންކުރާ ގޮތް ބެލުމަށްފަހު ކަމަށް އިކްރާމް ވިދާޅުވިއެވެ.
އިކްރާމް ވިދާޅުވީ އޮލިމްޕަހުގެ ހޯލަކީ ހެރިޓޭޖް ގޮތުގައި ލިސްޓު ކުރެވިފައިވާ ތަނެއް ކަމަށާއި، އެކަމަކު ދެން ހުރި އިމާރާތްތަކަކީ ފަހުގެ އިމާރާތްތަކެއް ކަމަށެވެ. އެހެން ކަމުން މި ޕްރޮޖެކްޓް ރާވާފައިވަނީ މިހާރު ހުރި ހޯލަށް މާބޮޑު ބަދަލެއް ނުގެނަސް ކުރިޔަށް ގެންދިޔުމަށް ކަމަށެވެ. އެހެން ކަމުން ހޯލުގެ އިމާރާތައް ގެއްލުމެއް ނުލިބޭނެ ކަމަށް އިކްރާމް ވިދާޅުވިއެވެ.
މި ޕްރޮގްރާމްގައި ވާހަކަ ދައްކަމުން އިކްރާމް އިތުރަށް ވިދާޅުވީ އަންނަ އަހަރު މިއުޒިކް އެވޯޑެއް ތައާރަފް ކުރުމުގެ ވިސްނުން އެބަހުރި ކަމަށާއި، އާޓިސްޓުންގެ ކުރިއެރުވުމަށް ގިނަ މަސައްކަތްތަކެއް ރޭވިފައި އެބަހުރި ކަމަށެވެ. އެހެންނަމަވެސް އެކަންކަމަށް ކޮވިޑާ ގުޅިގެން ގޮންޖެހުންތަކެއް ކުރިމަތިވި ކަމަށް އިކްރާމް ވިދާޅުވިއެވެ.
