އެހީތެރިކަން ފޯރުކޮށްދިނުމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އާއި ގަތަރުގެ ފުޓްބޯޅަ އެސޯސިއޭޝަނުން ހަދާފައިވާ އެއްބަސްވުން އާކުރުމާ ގުޅޭގޮތުން މަޝްވަރާކޮށްފިއެވެ.

ގަތަރާއެކު އެފްއޭއެމުން އެއްބަސްވުން ހަދާފައިވަނީ 2017 ވަނަ އަހަރުގެ ނޮވެމްބަރު މަހުގެ ތެރޭގައެވެ. އެ ފަހަރު އެއްބަސްވުން ހަދާފައިވަނީ ފަސް އަހަރު ދުވަހުގެ މުއްދަތަކަށެވެ. އެހެންކަމުން އަންނަ އަހަރު އެ އެއްބަސްވުމުގެ މުއްދަތު ހަމަވާނެއެވެ.

އެއާއެކު ހޮނިހިރު ދުވަހުގެރޭ ބައްސާމް ވަނީ ގަތަރުގެ ވެރިރަށް ދޯހާގައި އެ ގައުމުގެ ފުޓްބޯޅަ އެސޯސިއޭޝަނުގެ ރައީސް ޝެއިޚް ހަމަދު ބިން ޚަލީފާ ބިން އަޙްމަދު އަލް ސާނީއާ ބައްދަލުކުރައްވާފައެވެ. މި ބައްދަލުކުރެއްވުމުގައި ގަތަރުގެ ފުޓްބޯޅަ އެސޯސިއޭޝަނުގެ ނައިބު ރައީސް ސައުދު ބިން އަބްދުލްއަޒީޒް އަލް މުޙައްނަދީވެސް ބައިވެރިވެވަޑައިގެންނެވިއެވެ.

މި ބައްދަލުކުރެއްވުމުގައި ވަނީ ދެ ގައުމުގެ ފުޓްބޯޅަ އެސޯސިއޭޝަނުގެ މެދުގައި އޮތް ގުޅުން އިތުރަށް ހަރުދަނާކުރުމާ ގުޅޭގޮތުން މަޝްވަރާކޮށްފައެވެ. އެގޮތުން އެހީތެރިކަން ފޯރުކޮށްދިނުމަށް 2017 ވަނަ އަހަރު ހެދި އެއްބަސްވުން އާކުރަންވެސް މި ބައްދަލުވުމުގައި ވަނީ މަޝްވަރާކޮށްފައެވެ.

ގަތަރާއެކު އެފްއޭއެމުން ހަދާފައިވާ އެއްބަސްވުން އާކުރަން މަޝްވަރާކުރިއިރު، ގަތަރަކީ ރާއްޖެއަށް ފުޓްބޯޅައިން ގިނަ އެހީތަކެއް ފޯރުކޮށްދެމުން އަންނަ ގައުމެކެވެ. އެގޮތުން 2018 ވަނަ އަހަރުގެ ސާފް ޗެމްޕިއަންޝިޕާއި، މި އަހަރުގެ ސާފް ޗެމްޕިއަންޝިޕަށް ތައްޔާރުވާންވެސް ރާއްޖޭގެ ގައުމީ ޓީމުން ކޭމްޕުކޮށްފައިވަނީ ގަތަރުގައެވެ.

އަންނަ އަހަރުގެ ފީފާ ވޯލްޑް ކަޕް ގަތަރުގައި ބާއްވަން ތައްޔާރުވަމުން އަންނައިރު، އެ ގައުމަކީ ފުޓްބޯޅައިގައި އޭޝިއާގައި މި ވަގުތު އެންމެ ބޮޑަށް ކުރިއަރަމުން އަންނަ އެއް ގައުމެވެ.