އޮޑިޓިންގ ދާއިރާއިން ގުޅުން ބަދަހިކުރުމަށް ރާއްޖެއާއި އިންޑިއާއާ ދެމެދު އެމްއޯޔޫއެއް
24 އޮކްޓޯބަރު 2021 | އާދީއްތަ 08:10އިންޑިއާގެ އޮޑިޓަރ ޖެނެރަލް އޮފީހަކީ މި ރޮނގުން ތަޖުރިބާހުރި މުއައްސަސާއެއް
ރާއްޖެއާއި އިންޑިއާގެ އޮޑިޓަރ ޖެނެރަލް އޮފީހާ ދެމެދު އެމްއޯޔޫއެއްގައި ސޮއިކުރުމުގެ ރަސްމިއްޔާތު
އޮޑިޓިންގއާ ގުޅޭ އައު ބާވަތްތަކުގެ މައްސަލަތައް ޙައްލުކުރުމާއި، އެ ދާއިރާއިން ގުޅުން ބަދަހިކުރުމުގެ މަޤްޞަދުގައި ރާއްޖެއާއި އިންޑިއާއާ ދެމެދު އޮޑިޓިންގއާ ގުޅޭ އެމްއޯޔޫއެއްގައި ސޮއިކޮށްފިއެވެ.
އާދިއްތަ ދުވަހު އޮޑިޓަރ ޖެނެރަލް އޮފީހުގައި އޮތް ރަސްމިއްޔާތެއްގައި ރާއްޖޭގެ ފަރާތުން މި އެމްއޯޔޫގައި ސޮއިކުރެއްވީ އޮޑިޓަރ ޖެނެރަލް ހުސައިން ނިޔާޒީއެވެ. އަދި އިންޑިއާގެ ފަރާތުން ސޮއިކުރެއްވީ "ކޮމްޕޓްރޯލަރ އެންޑް އޮޑިޓަރ ޖެނެރަލް" (ސީއޭޖީ) ގިރިޝް ޗަންޑްރަ މުރުމޫއެވެ.
ސޮއިކުރެއްވުމަށްފަހު ދެއްކެވި ވާހަކަފުޅުގައި އޮޑިޓަރ ޖެނެރަލް ހުސައިން ނިޔާޒީ ވިދާޅުވީ، މިއީ ނުހަނު އުފާފުޅުވާ ވަގުތުކޮޅެއް ކަމަށެވެ. އެގޮތުން އިންޑިއާގެ އޮޑިޓަރ ޖެނެރަލް އޮފީހަކީ މި ރޮނގުން ތަޖުރިބާހުރި މުއައްސަސާއެއްކަން ނިޔާޒީ ފާހަގަކުރެއްވިއެވެ.
ނިޔާޒީ ވިދާޅުވީ، ރާއްޖޭގެ ދައުވަތަކަށް އިންޑިއާގެ ގިރިޝް ޗަންޑްރަ މުރުމޫ ކުރެއްވި މި ދަތުރުފުޅުން ރަމްޒުކޮށްދެނީ ރާއްޖެއާ ދެމެދު ބަހައްޓަވާ ގާތްކަން ކަމަށެވެ. އަދި މީގެ ކުރިންވެސް އިންޑިއާއާއި ރާއްޖެ މިފަދަ އެމްއޯޔޫއެއްގައި ސޮއިކޮށްފައިވާ ކަމަށާއި، މިހާރު އެމްއޯޔޫ އަލުން އައު ކުރުމުން، ޚިދުމަތްތައް ފުޅާ ކުރުމުގައި އިތުރު ފުރުސަތުތައް ފަހިވެގެންދާނެ ކަމުގެ އުއްމީދު ކުރެއްވޭކަމަށް ނިޔާޒީ ވިދާޅުވިއެވެ.
އޭގެ އިތުރުން، ދެ ޤައުމުގެ ދެމެދުގައި އިލްމާއި ތަޖުރިބާ ހިއްސާކޮށް، ރާއްޖެއަށް ވެސް އިތުރު ތަޖުރިބާތަކެއް ލިބިގެންދާނެ ކަމަށް އުއްމީދު ކުރެއްވޭކަމަށް ވެސް ނިޔާޒީ ވިދާޅުވިއެވެ. ވަކިން ޚާއްސަކޮށް މިހާރު ހުރި އެކި ގޮންޖެހުންތަކާއި، އޮޑިޓިންގއާ ގުޅޭ އައު ބާވަތްތަކުގެ މައްސަލަތަކާއެކު ޚިދުމަތްތައް ފުޅާ ކުރުމުގެ ބޭނުން ވެސް ނުހަނު ބޮޑުވެފައިވާކަން ނިޔާޒީ ފާހަގަކުރެއްވިއެވެ.
ނިޔާޒީ ވަނީ ރާއްޖޭގެ ޚާރިޖީ ސިޔާސަަތުތައް ބައްޓަންކޮށް ފޮރިން މިނިސްޓްރީއާއި، ރާއްޖޭގައި ހުންނަ އިންޑިއާ ހައިކޮމިޝަނުން ވެސް ކުރަމުންދާ މަސައްކަތްތައް ފާހަގަ ކުރައްވައި، އެކަމަށް ޝުކުރު އަދާކުރައްވާފައެވެ.
މި އެމްއޯޔޫގެ ދަށުން ޕަބްލިކް އޮޑިޓިންގ ގެ ދާއިރާގައި ދެ ޤައުމުގެ ދެމެދުގައި އިލްމާއި ޤާބިލުކަން އިތުރުކުރުމާއި، ތަޖުރިބާ ހިއްސާ ކުރުމާއި، ޚިދުމަތްތައް ފުޅާކުރުން ހިމެނިފައިވެއެވެ. އިންޑިއާގެ ކޮމްޕޓްރޯލަރ އެންޑް އޮޑިޓަރ ޖެނެރަލް (ސީއޭޖީ)އާއި، ރާއްޖޭގެ އޮޑިޓަރ ޖެނެރަލް އޮފީހާ ދެމެދު އެންމެ ފުރަތަމަ ގުޅުން ބަދަހިކޮށް މިފަދަ އެމްއޯޔޫއެއްގައި ސޮއިކޮށްފައިވަނީ 2008 ވަނަ އަހަރުއެވެ.
