ކްރިކެޓުގެ ޓީ20 ވޯލްޑް ކަޕް ކޮލިފައިންގައި ކުޅުނު ފުރަތަމަ މެޗުން ސައުދީ އަރަބިއްޔާ އަތުން ރާއްޖެ ބަލިވެއްޖެއެވެ.

މި ފަހަރުގެ ކޮލިފައިންގައި ރާއްޖެ ވާދަކުރަން ޖެހޭނީ ސައުދީ އަރަބިއްޔާގެ އިތުރުން ގަތަރާއި، ކުވައިތު އަދި ބަހްރޭނެވެ. މި ޒޯނުގެ ކޮލިފައިން މެޗުތައް ގަތަރުގެ ވެރިރަށް ދޯހާގައި ހޮނިހިރު ދުވަހު ފެށިއިރު، މެޗުތައް ކުޅޭނީ އަންނަ ހުކުރު ދުވަހުގެ ނިޔަލަށެވެ.

ކޮލިފައިންގައި ހޮނިހިރު ދުވަހު ކުޅުނު މެޗުން ރާއްޖެ ބަލިވީ ސައުދީ އަތުން ހަތް ވިކެޓުންނެވެ. މި މެޗުގައި ޓޮސް ދިމާވުމުން ރާއްޖޭން ނިންމީ ފުރަތަމަ ކުޅެން އަރާށެވެ. ކުޅެން އަރައި 20 އޯވަރު ހަމަވިއިރު ނުވަ ކުޅުންތެރިން ނުބައިވެގެން ރާއްޖެއަށް ހެދުނީ 98 ލަނޑެވެ. ރާއްޖޭން އެންމެ ރަނގަޅު ކުޅުމެއް ދެއްކީ 50 ބޯޅައިން 20 ލަނޑު ހެދި އިބްރާހިމް ނަޝާތެވެ.

ޖަވާބުގައި ސައުދީ ކުޅެން އަރައި ވަނީ 15.1 އޯވަރުގެ ތެރޭގައި ތިން ކުޅުންތެރިން ނުބައިވެގެން، 101 ލަނޑު ހަދައި މެޗުން މޮޅުވެފައެވެ. ސައުދީ ޓީމަށް އެންމެ ރަނގަޅު ކުޅުމެއް ދެއްކީ 24 ބޯޅައިން 41 ލަނޑު ހެދި ފައިސަލް ޚާންއެވެ.

ކޮލިފައިންގައި ކުޅުނު ފުރަތަމަ މެޗުން ރާއްޖެ ބަލިވިއިރު، ދެވަނަ މެޗުގައި އާދީއްތަ ދުވަހު ރާއްޖެ ނުކުންނާނީ ގަތަރާ ދެކޮޅަށެވެ. ކޮލިފައިންގައި ކުޅުނު ފުރަތަމަ މެޗުން ހޮނިހިރު ދުވަހު ގަތަރު ވަނީ ބަހްރޭން އަތުން އަށް ވިކެޓުން ބަލިވެފައެވެ.

މި ފަހަރުގެ ވޯލްޑް ކަޕް ކޮލިފައިންގައި ގައުމީ ޓީމު ވާދަކުރަމުން އަންނައިރު، މިއީ ރާއްޖޭން 2019 ވަނަ އަހަރުގެ ސައުތު އޭޝިއަން ގޭމްސްގައި ވާދަކުރި ފަހުން ބައިނަލްއަގުވާމީ ކްރިކެޓް މެޗުތަކަކަށް ނުކުތް ފުރަތަމަ ފަހަރެވެ.