"ހައި ސްޕީޑު ފެރީގެ މަސައްކަތް ވަރަށް އަވަހަށް ފަށާނެ، ކުޅުދުއްފުށީގައި 400 ހައުސިން ޔުނިޓްވެސް އަޅާނެ"
ދެ މަސް ދުވަހުގެތެރޭގައި ކުޅުދުއްފުށި ސަރަހައްދުގައި ހައި ސްޕީޑު ފެރީގެ މަސައްކަތް ފެށޭނެ
އިބްރާހިމް މުހައްމަދު ސާލިހު ޒުވާނުންގެ ދުވަހުގެ ޖަލްސާގައި
ކުރިއަށް އޮތް 2 މަސް ދުވަހުގެތެރޭގައި ކުޅުދުއްފުށި ސަރަހައްދުގައި ހައި ސްޕީޑު ފެރީގެ މަސައްކަތް ފެށޭނެ ކަމަށާއި، އަދި މިހާރު ތަރައްގީ ކުރަމުންދާ ޓާޝަރީ ހޮސްޕިޓަލުގެ ސަބަބުން ކުޅުދުއްފުށީގެ އިތުރުން އެ ސަރަހައްދުގައި އިތުރު ވަޒީފާތައް އުފެދިގެން ދާނެ ކަމަށް ޝައްކު ނުކުރައްވާ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.
ޒުވާނުންގެ ދުވަހާ ގުޅިގެން ހޮނިހިރު ދުވަހުގެ ރޭ ބޭއްވި ޚާއްސަ ޖަލްސާގައި ވާހަކަފުޅު ދައްކަވަމުން، ރައީސް ސާލިހު ވިދާޅުވީ، ކުޅުދުއްފުށީގެ މޭޔަރު ވެސް ފާހަގަކުރެއްވި ފަދައިން ބޮޑު ތިލަދުންމައްޗަށް އޮތް އެއްމެ ބޮޑު މައްސަލައަކީ ވަޒީފާގެ ފުރުުސަތު ނެތުން ކަމަށެވެ. އެއީ ތެދުފުޅެއް ކަމަށާއި، އެފަދަ ފުރުސަތު ނެތް މީހުން ތިބެދާނެ ކަމަށެވެ.
ރައީސް ސާލިހު ވިދާޅުވީ އެ ސަރަހައްދަކީ ރާއްޖޭގައި އޮތް އެންމެ ބޮޑު އިގްތިސާދުގެ ކުޑަމިންވަރެއް އަދި ހިއްސާ ކުރާތަނެއް ކަމަށެވެ. އެމަނިކުފާނު އެ ފާހަގަކުރެއްވީ ޓުއަރިޒަމްގެ ވާހަކައެވެ. ރައީސް ވިދާޅުވި ގޮތުގައި، ރާއްޖޭގެ އެކި ކަންކޮޅުތަކަށް ޓުއަރިޒަމް ފަތުރާލުން އެއީ ސަރުކާރުގެ ސިޔާސަތެކެވެ. ނަމަވެސް އެކަން ކުރެވެން އަންނަނީ ދަތުރުފަތުރު މިހާރަށްވުރެ ފަސޭހައިން ކުރެވޭނެ ނިޒާމެއް ގާއިމު ކުރެވިގެންނެވެ.
އެގޮތުން ހަނިމާދޫ އެއަރޕޯޓް އިންޓަރނޭޝަނަލް ކުރުމުގެ މަސައްކަތް ވަރަށް ހަލުވި ކަމާއެކު ކުރިއަށްދާ ކަމަށް އެމަނިކުފާނު ފާހަގަކުރެއްވިއެވެ. އޭގެ އިތުރުން ރާއްޖޭގައި ފަށާ ހައި ސްޕީޑުގެ ފެރީގެ އެންމެ ފުރަތަމަ ޕްރޮޖެކްޓް ފެށިގެން އަންނަނީ ބޮޑު ތިލަދުންމަތިން ކަމަށް ވެސް ވިދާޅުވިއެވެ.
މީގެ އިތުރުން ކުޅުދުއްފުއްޓަށް ދިމާވެފައިވާ ބޯހިޔާވަހިކަމުގެ މައްސަލައަށް އިޝާރާތް ކުރައްވަމުން ރައީސް ސާލިހު ވިދާޅުވީ، ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ކުރިއަށް އޮތް ދެ އަހަރުގެ ތެރޭގައި 1.2 ބިލިއަން ރުފިޔާގެ ބަޖެޓަކާއެކު އެކި ސަރަހައްދުތަކުގައި ބޯހިޔާވަހިކަމުގެ މަޝްރޫއު ތަކެއް ހިންގަމުންދާ ކަމަށެވެ. އެގޮތުން ބަޖެޓުގައި ހިމަނައިގެން، ސީދާ ކުޅުދުއްފުއްޓަށް 400 ހައުސިން ޔުނިޓް ރިޒާވް ކޮށްފައި ވާނެ ކަމަށެވެ. އޭގެ އިތުރުން 1000 ހައުސިން ޔުނިޓް އެޅުމުގެ އަގުގެ މަޝްވަރާތައް ބޭރުގެ ފަރާތްތަކާއެކު ކުރެވި ނިމުމަކާ ހަމައަށް އައިސްފައިވާ ކަމަށް ވެސް ވިދާޅުވިއެވެ.
ރައީސް ސާލިހު ވިދާޅުވީ، ކޯވިޑް-19ން އަރައިގަނެ އިގްތިސާދު އާރާސްތުކުރުމަށް ކުރާ މަސައްކަތުގައި ރިސޯޓްތައް ދަނީ ހުޅުވެމުން ކަމަށާއި، ވަޒީފާ އިންތިހާއަށް ބޭނުންވާ ކަމަށެވެ. އެހެންކަމުން ކުރިއަށް އޮތް ސީޒަނަކީ ރާއްޖެ މިއިން ދުވަހަކުވެސް ނުދެކޭ ވަރުގެ ރަނގަޅު ޓުއަރިސްޓު ސީޒަނަކަށް ވެދާނެ ކަމުގެ ފޯކާސްޓް މިއަދު ކުރެވޭ ކަމަށް އެމަނިކުފާނު ވިދާޅުވިއެވެ. މިވަގުތަކީ ޒުވާނުން ނުކުމެ ރިސޯޓްތަކާއި މިއާއި ގުޅުންހުރި ކަންތައްތަކުގައި ހިތްވަރާއެކު މަސައްކަތް ކުރަންޖެހިފައި އޮތް ވަގުތު ކަމަށް ވެސް ރައީސް ވިދާޅުވިއެވެ.
