ރާއްޖޭގައި ހުރި ވަޒީފާގެ ފުރުސަތުތަކުގެ ބޭނުން ހިފަން ފެށުމަށް، ރާއްޖޭގެ ޒުވާނުންނަށް، ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު އިލްތިމާސް ކުރައްވައިފިއެވެ.
ރައީސުލްޖުމްހޫރިއްޔާ މިކަމަށް އިލްތިމާސް ކުރެއްވީ ޒުވާނުންގެ ދުވަހަށް ޚާއްސަ ކޮށްގެން ހދ. ކުޅުދުއްފުށީގައި ބޭއްވި ރަސްމީ ޖަލްސާގައި ވާހަކަފުޅު ދައްކަވަމުންނެވެ.
އެމަނިކުފާނު ވިދާޅުވީ، މަސައްކަތެއް ނުކޮށް ތިބި ވަރަށް ގިނަ ޒުވާނުން މިހާރުވެސް ދިވެހި މުޖްތަމައުގައި އުޅެމުން ދާކަމަށެވެ. އެގޮތުން ރައީސް ވަނީ ރާއްޖޭގެ މަސައްކަތުގެ ބާޒާރުގައި އުޅެމުންދާ ގިނަ އަދަދެއްގެ ބިދޭސީންގެ ވާހަކަ ފާހަގަކުރައްވާފައެވެ. ރައީސް ވިދާޅުވި ގޮތުގައި، މިއިން އެނގެނީ، މަސައްކަތެއް ނުކޮށް ޒުވާނުންތަކެއް ތިއްބަސް، މަސައްކަތުގެ ބާޒާރުގައި ތަފާތު ފުރުސަތުތައް އެބަހުރިކަން ކަމަށެވެ.
ރައީސް ސާލިހު ވިދާޅުވީ، ޒުވާނުން ވިސްނަންވީ ކަމަކީ، މި ގައުމުގެ ހިންގުމާ އަދި ރާއްޖެ ކުރިއަރުވައި ތަރައްގީކުރުމުގެ ހުރިހާ ޒިންމާއަކާ، މާދަމާ ހަވާލުވާން ތިބީ މިއަދުގެ ޒުވާނުން ކަން ކަމަށެވެ. ސަރުކާރުން މަސައްކަތް ކުރަނީ އެދުވަސް އަންނަންވާ އިރަށް، ޒުވާނުންނަކީ ގައުމީ މަސްއޫލިއްޔަތު އުފުލޭ ފަދަ ގާބިލް ބަޔަކަށް ހެދުމަށް ކަމަށް ވެސް އެމަނިކުފާނު ވިދާޅުވިއެވެ.
ހުރިހާ ޒުވާނުންވެސް ވިސްނަންވީ، މިހާރު ތިޔަ ހޭދަކުރަނީ ޢުމުރުގެ އެންމެ އަގުބޮޑު ދުވަސްވަރުކަން. އެ މީހެއްގެ ހަޔާތުގެ ކުރިމަގު ބާއްޖަވެރިކަމުގެ މަތީގައި ބިނާކުރެވޭނީ، ޒުވާން އުމުރުގައި އަޅާ ބިންގާ ސީދާކުރި މިންވަރަކުން. ރާއްޖޭގެ ކޮންމެ ޒުވާނެއްގެ ކިބައިގައި ވެސް ތަފާތު ހުނަރުތަކަކާއި ތަފާތު ގާބިލުކަމެއް ހުންނާނެ. ގައުމު މިއަދު އެދި ގޮވަނީ، ތިޔަ ޒުވާނުންގެ ކިބައިގައި ހުރި ހުނަރާއި ފަންނުވެރިކަމުން، އަދި އުފެއްދުންތެރި ވިސްނުންތަކުން ގައުމަށް ކުރިއެރުން ހޯދައިދިނުމަށް.ރައީސުލްޖުމްހޫރިއްޔާ އިބްރާހިމް މުޙައްމަދު ސާލިހު
ރައީސް ސާލިހު ވިދާޅުވީ އެމަނިކުފާނުގެ އުންމީދަކީ ގައުމަށް ބޭނުންތެރި އަދި ގައުމަށް ޚިދުމަތްކުރާ މީހަކަށް ވުމުގެ އަޒުމް، ޒުވާނުން މިއަދުން ފެށިގެން ކަނޑައެޅުން ކަމަށެވެ.
