ޒުވާނުންގެ ތެރެއިން މަތީ ތައުލީމު ހާސިލުކޮށްފައިވަނީ %12 ޒުވާނުން، އެއްވެސް ވަރަކަށް ތައުލީމު ހާސިލުނުކުރާ %2 ޒުވާނުން އުޅޭ
89،956 ޒުވާނުންނަކީ ވަޒީފާތަކުގައި އުޅޭ ޒުވާނުން
އެމްއެންޔޫގެ ދަރިވަރުންތަކެއް ދަސްވެނިމުމުގެ ތެރެއިން
ރާއްޖޭގައި ޒުވާނުންގެ ތެރެއިން މަތީ ތައުލީމު ހާސިލުކުރަނީ 12 އިންސައްތަ ޒުވާނުންކަމަށް ތަފާސްހިސާބުތަކުން ދައްކައިފިއެވެ.
މިއަހަރުގެ ޒުވާނުންގެ ދުވަހާއި ގުޅިގެން ނޭޝަނަލް ބިއުރޯ އޮފް ސްޓެޓިސްޓިކްސްއިން ހާމަކޮށްފައިވާ ތަފާސްހިސާބުތަކަށް ބަލާއިރު, ޒުވާނުންގެ އާބާދީގެ ބޮޑު ބައެއް ސެކަންޑަރީ އަދި ހަޔަރ ސެކަންޑްރީ ތައުލީމު ހާސިލުކުރެއެވެ. އެގޮތުން 77 އިންސައްތަ ޒުވާނުން ސެކަންޑްރީއާއި ހަޔަރ ސެކަންޑްރީ ތައުލީމު ހާސިލުކުރެއެވެ.
ޕްރައިމަރީ ތައުލީމާއި އޭގެ ދަށުން ތައުލީމު ހާސިލުކޮށްފައިވަނީ 9 އިންސައްތަ ޒުވާނުންނެވެ. އެއްވެސް ވަރަކަށް ތައުލީމު ހާސިލުނުކުރާ 2 އިންސައްތަ ޒުވާނުން އުޅެއެވެ.
މިތަފާސްހިސާބުތަކުން ދައްކާގޮތުގައި ރާއްޖޭގެ މިހާރުގެ އާބާދީގެ 18 އަހަރާއި 35 އަހަރާ ދެމެދުގެ 257،215 ޒުވާނުން އުޅެއެވެ. އޭގެތެރެއިން މާލޭގައި ދިރިއުޅެނީ 112،650 ޒުވާނުންނެވެ. އަދި އަތޮޅުތެރޭގައި 144،565 ޒުވާނުން އުޅެއެވެ.
ލޭބަރ ފޯރސްގައި ޒުވާނުންގެ ތެރެއިން 97،044 ޒުވާނުން ހަރަކާތްތެރިވެއެވެ. މީގެތެރެއިން 89،956 ޒުވާނުންނަކީ ވަޒީފާތަކުގައި އުޅޭ ޒުވާނުންނެވެ. ވަޒީފާނެތް ޒުވާނުންގެ އިންސައްތައަކީ 7.3އެވެ.
ޒުވާނުންގެ ތެރެއިން 86 އިންސައްތަ ޒުވާނުންނަކީ ވަޒީފާ އަދާކުރާ ޒުވާނުންނެވެ. 2 އިންސައްތަ ޒުވާނުން ހަރަކާތެރިވަނީ އެހެން މީހުންނަށް ވަޒީފާދީގެން މަސައްކަތްކުރާ މަގާމުތަކުގައެވެ. 2 އިންސައްތަ ޒުވާނުން ގްރޫޕް ހަދައިގެން މަސައްކަތްކުރާއިރު 14 އިންސައްތައަކީ އަމިއްލަ މަސައްކަތްކުރާ ޒުވާނުންނެވެ.
މީގެއިތުރުން ތަފާސްހިސާބުތަކުން ދައްކާގޮތުގައި ޒުވާނުންގެ އާބާދީގެ ތެރެއިން 56 އިންސައްތަ ޒުވާނުންނަކީ ވަޒީފާއާއި ތަމްރީނެއްވެސް ނެތް, އަދި ތައުލީމު ހާސިލުކުރުމުގައިވެސް ހަރަކާތްތެރިނުވާ ޒުވާނުންނެވެ. މީގެތެރޭގައި ހިމެނެނީ 15 އިންސައްތަ ފިރިހެނުންނާއި 41 އިންސައްތަ އަންހެނުންނެވެ.
