ޒުވާނުންގެ ދުވަހުގެ ހަރަކާތްތަކަށް ރައީސް ކުޅުދުއްފުއްޓަށް ވަޑައިގަންނަވަނީ
23 އޮކްޓޯބަރު 2021 | ހޮނިހިރު 08:33ކުޅުދުއްފުއްޓަށް ވަޑައިގަންނަވާނީ ހޮނިހިރުު ދުވަހުގެ މެންދުރު
ރައީސުލްުޖުމްހޫރިއްޔާ އިބްރާހިމް މުހައްމަދު ސާލިހު
މިއަހަރުގެ ޒުވާނުންގެ ދުވަސް ފާހަގަ ކުރެއްވުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ކުޅުދުއްފުށި ސިޓީއަށް ވަޑައިގަންނަވާނެއެވެ. ރައީސް ކުޅުދުއްފުއްޓަށް ވަޑައިގަންނަވާނީ ހޮނިހިރު ދުވަހުގެ މެންދުރުއެވެ.
ކުޅުދުއްފުށީގައި ޒުވާނުންގެ ދުވަސް ފާހަގަ ކުރުމުގެ ކަންކަން މީގެ ދެދުވަސް ކުރިން ފޯރިއާއެކު ވަނީ ފަށާފައެވެ. އެގޮތުން ހޮނިހިރު ދުވަހު ހަވީރު ކުޅުދުއްފުށީ ޓަރފް ދަނޑު ރަސްމީކޮށް ހުޅުވައިދެއްވުމަށް ހަމަޖެހިފައިވާއިރު ގައުމީ ޓީމާއި، ސަރަހައްދުން ހޮވާލެވޭ ޓީމަކާ ދެމެދު އެކުވެރިކަމުގެ ޚާއްސަ ފުޓުބޯޅަ މެޗެއްވެސް ކުރިއަށްދާނެއެވެ. ހޮނިހިރު ދުވަހުގެ ރޭގައިވެސް ބައެއް ހަރަކާތްތައް ރޭވިފައިވާއިރު، ޒުވާނުންގެ ދުވަހުގެ ރަސްމީ ޖަލްސާވެސް އޮންނާނެއެވެ.
މި ޖަލްސާގައި އެކި ރޮނގުރޮނގުން ފާހަގަކޮށްލެވޭ ޒުވާނުންނަށް އެވޯޑު ދިނުމަށް ހަމަޖެހިފައިވާއިރު، މި ޖަލްސާއަށްފަހު ޚާއްސަ މިއުޒިކް ޝޯވއެއްވެސް ވަނީ ރާވާފައެވެ.
ރައީސްގެ މި ދަތުރުފުޅުގައި ސަރުކާރުގެ އިސް ވަޒީރުންނާއި، ދައުލަތުގެ އިސް ބޭފުޅުން ބައިވެރިވެވަޑައިގަންނަވައެވެ. މި ދަތުރުފުޅަށްފަހު ދުބާއީގައި އޮންނަ އެކްސްޕޯގައި ބައިވެރިވެވަޑައިގަތުމަށް ރައީސް ދުބާއީއަަށްވެސް ވަޑައިގަންނަވާނެއެވެ.
