ޑެލްޓާ ވޭރިއަންޓަށްވުރެ ޑެލްޓާ ސަބްވޭރިއަންޓް ހަލުވިކަމާއެކު ފެތުރުމުގެ ފުރުސަތު ބޮޑު: އިނގިރޭސިވިލާތް
23 އޮކްޓޯބަރު 2021 | ހޮނިހިރު 02:39ޑެލްޓާ ސަބްވޭރިއަންޓް ފެންނަ މިންވަރު ވަނީ އިތުރުވެފައި
ކޮވިޑް ވެކްސިނާ ވޭރިއަންޓް
ޑެލްޓާ ވޭރިއަންޓަށްވުރެ ޑެލްޓާ ސަބްވޭރިއަންޓް ފެތުރުމުގެ ފުރުސަތު ބޮޑުކަމަށް ފެންނާތީ އެވޭރިއަންޓް "ވޭރިއަންޓް އަންޑަރ އިންވެސްޓިގޭޝަން" އަށް ލާފައިވާކަމަށް އިނގިރޭސިވިލާތުގެ ހެލްތު ސެކިޔުރިޓީ އެޖެންސީން ބުނެފިއެވެ.
ވޭރިއަންޓް އަންޑަރ އިންވެސްޓިގޭޝަން އަކީ އެވޭރިއަންޓެއްގެ ނުރައްކާ ބޮޑުވެދާނެހެން ހީވާތީވެ އިތުރަށް ބެލުމަށް ލާ ކެޓަގަރީއެކެވެ. އިނގިރޭސިވިލާތުގައި ފާއިތުވި ދުވަސްތަކުގައި ފެނިފައިވާ ކޮވިޑް ކޭސްތަކަށް ބަލާއިރު ޑެލްޓާ ސަބްވޭރިއަންޓްކަމުގައިވާ އޭވައި.ފޯރ.ޓޫ އިތުރުވަމުން އަންނަކަމަށް ފާހަގަވެފައިވާކަމަށް އެގައުމުގެ ހެލްތު ސެކިޔުރިޓީ އެޖެންސީން ބުނެއެވެ.
އެހެންކަމުން ކުރިޔަށް އޮތްތަނުގައި އިނގިރޭސިވިލާތުގައި ޑެލްޓާ ވޭރިއަންޓަށްވުރެ ޑެލްޓާ ސަބްވޭރިއަންޓް ފެތުރުމުގެ ފުރުސަތު އެބައޮތް ކަމަށް އެޖެންސީން ބުނެއެވެ.
ނަމަވެސް އަދި މިހާތަނަށް އައިއިރު މިއީ ނުރައްކާތެރި ވޭރިއަންޓެއްކަމެއް ދެނެގަނެވިފައިނުވާކަމަށް އެ އެޖެންސީން ބުނެއެވެ. އަދި މިހާރު ޖަހަމުން އަންނަ ވެކްސިންތަކުގެ އަސަރު ކުޑަކުރުވާ ވޭރިއަންޓެއްކަމެއް އަދި ފާހަގަކުރެވިފައި ނުވާކަމަށްވެސް އެގައުމުން ބުނެއެވެ.
