އެމެރިކާގައި ކޮވިޑް-19 ޖެހިގެން ދުވާލެއްގެ މައްޗަށް 3000 މީހުން މަރުވަމުން އަންނައިރު އެގައުމުގެ އޮފިޝަލުން ވެކްސިންޖެހުމުގެ ކެމްޕެއިން ކުރިއަށްގެންދިއުމުގެ ތައްޔާރީތައްވާން ފަށައިފިއެވެ.

ހުކުރު ދުވަހު އެމެރިކާގެ ފުޑް އެންޑް ޑްރަގް އެޑްމިނިސްޓްރޭޝަން (އެފްޑީއޭ) އިން ވަނީ ފައިޒަރ އާއި ބައޯއެންޓެކްގެ ކޮވިޑް ވެކްސިން އެމަރޖެންސީކޮށް ބޭނުންކުރުމުގެ ހުއްދަދީފައެވެ. މިއާއެކު އެމެރިކާގެ ކަމާ ބެހޭ އޮފިޝަލުން އަންނަނީ މިފަހުގެ ތާރީޚުގައި ކުރިއަށް ގެންދާނެ ވެކްސިން ދިނުމުގެ އެންމެ ބޮޑު ޕްރޮގްރާމު ކުރިޔަށް ގެންދިޔުމަށް ތައްޔާރީތައް ވަމުންނެވެ.

އެމެރިކާގައި ބުރާސްފަތި ދުވަހު ކޮވިޑް-19 ޖެހިގެން 2902 މީހުން ވަނީ މަރުވެފައެވެ. އޭގެކުރީ ދުވަސްކަމަށްވާ ބުދަ ދުވަހު 3253 މީހުން ވަނީ އެބަލި ޖެހިގެން މަރުވެފައެވެ.

އެމެރިކާއިން އަންނަނީ ކުރިއަށް އޮތް ދެ ތިން މަސްތެރޭގައި އާބާދީގެ ގިނަ އަދަދެއްގެ ބަޔަކަށް ވެކްސިން ޖެހުމަށް މަސައްކަތްކުރަމުންނެވެ. ވެކްސިން ދޭން ފަށާނެކަމަށް ބެލެވެނީ ހޯމަ ދުވަހުއެވެ.

އެމެރިކާގެ ހެލްތް އެންޑް ހިއުމަން ސަރވިސަސްގެ ސެކެޓްރީ އެލެކްސް އަޒަރް ވިދާޅުވީ ވެކްސިން ޖެހުމަށް ކުރަންޖެހޭ މަސައްކަތްތައް ފައިޒަރ އާއެކު ކުރަމުން އަންނަކަމަށާއި ހޯމަ ދުވަހު ވެކްސިން ޖަހަން ފަށާނެކަމަށެވެ.

އެމެރިކާއިން ފައިޒަރގެ ވެކްސިން ބޭނުންކުރުމުގެ ހުއްދަ ދިނުމުގެ ކުރިން އިނގިރޭސިވިލާތް، ބަހްރެއިން އަދި ކެނެޑާއިން ވަނީ އެވެކްސިން އެގައުމުތަކުގައި ބޭނުންކުރުމުގެ ހުއްދަދީފައެވެ. އެމެރިކާއިން އަންނަ ހަފްތާގެ ތެރޭގައި މޮޑާނާގެ ކޮވިޑް-19 ވެކްސިން ބޭނުންކުރުމުގެ ހުއްދަ ދޭނެކަމަށް ބެލެވެއެވެ.

އެމެރިކާގައި ވެކްސިން ޖެހުމުގެ ކެމްޕެއިން ކުރިޔަށްދާއިރު ނިއު ޔޯރކް ސިޓީގައި "ވެކްސިން ކޮމާން ސެންޓަރ" އެއް ގާއިމުކުރާނެއެވެ. ހޯމަ ދުވަހު ގާއިމުކުރާ މިސެންޓަރު މެދުވެރިކޮށް ނިއު ޔޯރކްގައި ވެކްސިން ޖެހުމުގެ ހުރިހާ ކަމެއް ބަލަމުންދާނެއެވެ. ވަކިން ޚާއްސަކޮށް ނިއު ޔޯރކްގައި ކޮވިޑް-19ގެ އެންމެ ހާލަތު ގޯސް 27 ސަރަހައްދެއް އެމީހުން ބަލަމުންދާނެއެވެ.

ވެކްސިން ޖެހުމުގެ ކަންކަމުގައި އިސްކޮށް އުޅޭ އޮފިޝަލުން ބުނާގޮތުގައި މިކަމަކީ ވެކްސިން ދިނުމާއި ގުޅޭ ލޮޖިސްޓިކް ކަންކަން ހަމަޖެއްސުމުގެ އިތުރުން ވެކްސިން ޖެހުމާމެދު އާންމުންގެ އިތުބާރު ހޯދުމާއި ހުރިހާ އެންމެންނަށް ހަމަހަމަކަމާއެކު ވެކްސިން ލިބޭނެކަން ކަށަވަރުކުރުމަށް ކުރިޔަށްގެންދާ ކެމްޕެއިނެކެވެ.

ނިއު ޔޯރކް ސްޓޭޓަށް މޮޑާނާ ވެކްސިންގެ 346،000 ޑޯޒް ޑިސެމްބަރ 21ން ފެށިގެން ލިބޭނެ އެވެ. އަދި ފައިޒަރ ވެކްސިންގެ 170،000 ޑޯޒް މިހަފްތާ ބަންދުގައި ނިއު ޔޯރކް ސްޓޭޓަށް ލިބޭނެ އެވެ.

ނިއު ޔޯރކްގައި އަދިވެސް ކޮވިޑް-19 ޖެހިގެން ހޮސްޕިޓަލްތަކުގައި އެޑްމިޓްކުރަމުންދާ މީހުންގެ އަދަދު އަންނަނީ އިތުރުވަމުންނެވެ.

އަނެއްކޮޅުން އިންޑިއާނާ ހޮސްޕިޓަލުން ވަނީ ވެކްސިން ދިނުމާއި ގުޅޭ ހުރިހާ ކަމެއް ކުރިޔަށްދާނެ ގޮތުގެ ރިހާސަލެއް ހުކުރު ދުވަހު ކުރިޔަށް ގެންގޮސްފައެވެ. މިއީ އެންމެ ފުރަތަމަ ވެކްސިން ދޭން ފަށާނެ ހޮސްޕިޓަލްތަކުގެ ތެރެއިން ހޮސްޕިޓަލެކެވެ. މިރިހާސަލްގައި އެހޮސްޕިޓަލްގެ ނަރުހުންނާއި ޑޮކްޓަރުންގެ އިތުރުން ފަރމަސިސްޓުން ވަނީ ބައިވެރިވެފައެވެ.

އެމެރިކާގައި ވެކްސިން ޖެހުމަށް ތައްޔާރުވަމުން އަންނައިރު މިއީ އެމެރިކާގެ އިންތިޚާބީ ރައީސް ޖޯ ބައިޑަންގެ ވެރިކަމުގެ ފުރަތަމަ 100 ދުވަހު އެންމެ އިސްކަމެއްދީގެން ކުރައްވާނެ ކަމެއްކަމަށް ވަނީ ވިދާޅުވެފައެވެ. އެގޮތުން ޖެނުއަރީ މަހުގެ 20 ވަނަ ދުވަހު ހުވާކުރެއްވުމާއެކު ފެށިގެންދާ ވެރިކަމުގެ ފުރަތަމަ 100 ދުވަހުގެ ތެރޭގައި 100 މިލިއަން މީހުންނަށް ވެކްސިން ދިނުމަކީ ބައިޑަންގެ އެއް އަމާޒެވެ.

އެމެރިކާގެ ރައްޔިތުންގެ ތެރެއިން ވެކްސިން ބޭނުންވާ ކޮންމެ މީހަކަށް އަންނަ އަހަރުގެ މެއި ނުވަތަ ޖޫން މަސް ހިސާބުގައި ވެކްސިން ލިބޭވަރުވުމަކީ އެމެރިކާ ސަރުކާރުގެ އަމާޒެކެވެ.

ވެކްސިން ޖެހުމާމެދު އެމެރިކާގެ ރައްޔިތުންގެ މެދުގައި ވަނީ ޚިޔާލު ތަފާތުވުންތައް އުފެދިފައެވެ. އެގޮތުން ރޮއިޓަރސް އިން ނެގި ޕޯލަކުން ދައްކާގޮތުގައި ވެކްސިން ޖެހުމަށް ތައްޔާރަށް ތިބީ 61 އިންސައްތަ މީހުންނެވެ.

އަނެއްކޮޅުން އެމެރިކާގައި ދުވާލެއްގެ މައްޗަށް ކޮވިޑް-19 ޖެހޭ މީހުންގެ އަދަދު ދެ ލައްކައަށްވުރެ މަތިން ރިކޯޑް ކުރަމުން އަންނަތާ މިއީ ޖެހިޖެހިގެން ހަތަރުވަނަ ދުވަހު އެވެ.

އެމެރިކާގެ 15.6 މިލިއަން މީހުންނަށް ވައިރަސް ޖެހިފައިވާއިރު މަރުވެފައިވާ މީހުންގެ އަދަދު 292،642ށް ވަނީ އަރާފައެވެ.

އެންމެފަހުގެ ދިރާސާތައް ދައްކާގޮތުން އަންނަ އަހަރުގެ އޭޕްރީލްމަހުގެ 1 ވަނަ ދުވަހާ ހަމައަށް އެމެރިކާގައި ކޮވިޑް-19 ޖެހިގެން މަރުވާ މީހުންގެ އަދަދު 502،000ށް އަރާނެއެވެ. ޔުނިވަރސިޓީ އޮފް ވޮޝިންގޓަން އިންސްޓިޓިއުޓް ފޮރ ހެލްތު މެޓްރިކްސް އެންޑް އެވަލުޔޭޝަން އިން ހެދި މިދިރާސާ އެންމެ ފަހުން މުރާޖާކޮށްފައިވަނީ ބުރާސްފަތި ދުވަހުއެވެ.

ވެކްސިން ޖެހުމާއި އިތުރުކަންކަން ހިމެނުމަށްފަހު ނެރުނު މިދިރާސާއިން ދައްކާގޮތުގައި އޭޕްރީލްމަހާ ހަމައަށް އަންނައިރު މިބަލީގައި މަރުވާނެކަމަށް ކުރިން އަންދާޒާކޮށްފައިވާ އަދަދަށްވުރެ 37،000 މަރު މަދުވާނެ އެވެ.

އެމެރިކާގެ ސެންޓަރ ފޮރ ޑިޒީސް ކޮންޓްރޯލް އެންޑް ޕްރިވެންޝަން (ސީޑީސީ)ގެ ތަފާސްހިސާބުތައް ދައްކާގޮތުން 2018 ވަނަ އަހަރު އެމެރިކާގައި ހިތުގެ ބަލިތަކުގައި މަރުވެފައިވަނީ 655،381 މީހުންނެވެ. އަދި ކެންސަރ ޖެހިގެން ހަމަ އެއަހަރު 599،274 މީހުން ވަނީ މަރުވެފައެވެ.