ދަނޑުވެރިންނާއެކު އިންތިޒާމުވެގެން ކަންކަން ކުރަން ފެށުމުން ދަނޑުވެރިންގެ ޝަކުވާތައް މަދުވެއްޖެ: އެގްރޯނެޓް
22 އޮކްޓޯބަރު 2021 | ހުކުރު 02:43މީގެކުރިން ދަނޑުވެރިންގެ ޝަކުވާއަކީ ދަނޑުވެރިކަން ކުރަން ބޭނުންވާ ވަސީލަތްތައް ނުލިބުމާއި، ދަނޑުވެރިން ހައްދާ ތަކެތި ވިއްކޭނެ މާކެޓެއް ނެތުން
އެގްރޯނެޓްގެ އެމްޑީ ހާރޫން ރަޝީދު
މިސަރުކާރު އައި ފަހުން އިންތިޒާމުވެގެން ދަނޑުވެރިންނާއެކު މަސައްކަތް ކުރަން ފެށުމުން ދަނޑުވެރިން ކުރަމުންދިޔަ ޝަކުވާތައް ވަރަށް ބޮޑަށް މަދުވެފައިވާކަމަށް އެގްރޯނެޓްގެ މެނޭޖިންގ ޑިރެކްޓަރ ހާރޫން ރަޝީދު ވިދާޅުވެއްޖެއެވެ.
ރާއްޖެ ޓީވީގެ ފަލަސުރުޚީ ޕްރޮގްރާމްގައި އެގްރޯނެޓުން ދަނޑުވެރިންގެ ހުރި ކަންކަން ހައްލުކުރުމަށް ކުރަމުންދާ މަސައްކަތްތަކާއި ހުރި ގޮންޖެހުންތަކާ ގުޅޭގޮތުން ވާހަކަދައްކަވަމުން ހާރޫން ރަޝީދު ވިދާޅުވީ މީގެކުރިން ދަނޑުވެރިންގެ ޝަކުވާއަކީ ދަނޑުވެރިކަން ކުރަން ބޭނުންވާ ވަސީލަތްތައް ނުލިބުމާއި، ދަނޑުވެރިން ހައްދާ ތަކެތި ވިއްކޭނެ މާކެޓެއް ނެތުމާއި ވިއްސާރައިގައި ދަނޑުވެރިންގެ ތަކެތި ހަލާކުވުމުން ސަރުކާރުން އެހީތެރިކަން ނުދިނުން ކަމަށެވެ. ނަމަވެސް މިސަރުކާރު އައިސް އެގްރޯނެޓް އުފައްދައި ދަނޑުވެރިންނާ ގާތުން މަސައްކަތްކުރަން ފެށިފަހުން މިހާރު މިޝަކުވާތައް މަދުވެފައިވާކަމަށް ހާރޫން ވިދާޅުވިއެވެ.
ހާރޫން ވިދާޅުވީ މިހާރު ދަނޑުވެރިންނަށް ދިމާވެފައިވާ އެންމެ ބޮޑު ގޮންޖެހުމަކީ ދަނޑު ހެއްދުމަށް ބޭނުންވާ ވަރަށް ބިން ނުލިބުންކަމަށެވެ. ބިން ބޮޑެތި ރަށްރަށުން ވެސް ދަނޑު ހެއްދުމަށް ބިން ހޯދުމަށް ދަތިތަކާ ކުރިމަތިވާކަމުގެ ޝަކުވާ ދަނޑުވެރިން ކުރާކަމަށް ހާރޫން ވިދާޅުވިއެވެ. ބިމުގެ މައްސަލައަށް ހައްލުހޯދުމަށް ސަރުކާރުން ގެންގުޅޭ ސިޔާސަތަކީ ޒަމާނީ ޓެކްނޮލޮޖީގެ ވަސީލަތްތައް ގާއިމުކޮށްގެން އެކަން ކުރުންކަމަށް ހާރޫން ވިދާޅުވިއެވެ.
ހާރޫން ވިދާޅުވީ އަމާޒަކީ ރާއްޖޭގައި ވީހާވެސް ބޮޑަށް ބިން ބޭނުންނުކޮށް ދަނޑުވެރިކަން ކުރެވޭނެ ގޮތްތަކެއް ބަލާ ގިނަ ބަޔަކު މިކަމުގައި ބައިވެރިކުރުންކަމަށެވެ. އެންމެ ފުރަތަމަ ސްޓޭޖަކީ މިކަމުގައި ދަނޑުވެރިންގެ އިތުބާރު ހޯދުންކަމަށް ހާރޫން ވިދާޅުވިއެވެ. އެގޮތުން ދަނޑުވެރިންނަށް ބޭނުންވާ ވަސީލަތްތައް ފޯރުކޮށްދީ އެމީހުން ހައްދާ ތަކެތި ގަނެ މާކެޓްކުރުން އެއީ މިހާރު އެގްރޯނެޓުން ދަނޑުވެރިންނާ ގުޅިގެން ކުރަމުންދާ މަސައްކަތްކަމަށް ހާރޫން ވިދާޅުވިއެވެ.
އަމާޒަކީ ރާއްޖޭގެ ކޮންމެ ރަށެއްގައި ވެސް މަދުވެގެން އެއް ބަޔަކަށް ދަނޑުވެރިކަން ކޮށްގެން މަންފާ ލިބުންކަމަށް ހާރޫން ވިދާޅުވިއެވެ. އެގްރޯނެޓުން މަސައްކަތްކުރަމުން އަންނަނީ އެއަމާޒަށްކަމަށް ވެސް ހާރޫން ވިދާޅުވިއެވެ. އަދި އެކަން ކުރުމަށްޓަކައި ދަނޑުވެރިކަމާ ގުޅުންހުރި މައުލޫމާތު ފޯރުކޮށްދީގެން ވަސީލަތްތައް ފޯރުކޮށްދީގެން އެމަސައްކަތްކުރަމުންދާކަމަށް ހާރޫން ވިދާޅުވިއެވެ.
