ބަންގްލަދޭޝްގައި ދިރިއުޅޭ ހިންދޫ ބަޔަކު ހިންދޫ ދީނުގައި ފާހަގަކުރާ ފެސްޓިވަލެއްގައި ކީރިތި ޤުރުއާންގެ ހުރުމަތްކެނޑޭގޮތަށް އަމަލުކުރުމާއި ގުޅިގެން ހިނގަމުންދާ ހަމަނުޖެހުންތަކުގައި އެތައް ސަތޭކަ ބަޔަކު ހައްޔަރުކޮށްފިއެވެ.

ބަންގްލަދޭޝްގެ އިރުމަތީ ޑިސްޓްރިކްޓެއްކަމުގައިވާ ކަމިލާގައި ހިންދޫ ދީނުގައި ފާހަގަކުރަމުން އަންނަ ދުރުގާ ޕޫޖާ ފެސްޓިވަލްގެ ތެރެއިން އެމީހުން އަޅުކަންކުރަމުން އަންނަ ކަލާނގެއެއްގެ ފައިދަށަށް ކީރިތި ޤުރުއާން ލުމަށްފަހު ނަގާފައިވާ ފޮޓޯއެއް ސޯޝަލް މީޑިޔާގައި އަންނަނީ ވަރަށް ބޮޑަށް ދައުރުވަމުންނެވެ. މިކަމާގުޅިގެން ބަންގްލަދޭޝްގެ މުސްލިމުން ރުޅި އައިސްގެން ނިކުމެ ހިންދޫން އަޅުކަންކުރާ ފައްޅިތައް ހަލާކުކޮށް ހިންދޫންނަށް އަންނަނީ ހަމަލާދެމުންނެވެ. މިހަމަނުޖެހުންތަކުގައި ހިންދޫ ދީނުގެ ދެމީހަކު ވަނީ މަރާލާފައެވެ. މިކަމާގުޅިގެން މަދުވެގެން 300 މީހުން ހައްޔަރުކޮށްފައިވާކަމަށް ބަންގްލަދޭޝްގެ ފުލުހުން ވަނީ ބުނެފައެވެ.

ފާއިތުވި ހަފްތާގެ ފަހުކޮޅުން ފެށިގެން ބަންގްލަދޭޝްގައި ހިނގަމުންމިދާ ހަމަނުޖެހުންތަކުގައި ފާއިތުވި ދުވަސްތަކުގައި ބަންގްލަދޭޝްގެ އެކި ސަރަހައްދުތަކުގައި, ހިންދޫ ދީނަށް ނިސްބަތްވާ މީހުންނަށް އަމާޒުކޮށް އަންނަނީ ހަމަލާތައްދެމުންނެވެ. މިހަމަނުޖެހުންތަކުގައި މަދުވެގެން 6 މީހުން މަރުވެފައިވާއިރު 100ށް ވުރެ ގިނަ މީހުން ވަނީ ޒަޚަމްވެފައެވެ.

ބަންގްލަދޭޝްގެ ފުލުހުން ބުނާގޮތުގައި ދެކުނު އިރުމަތީގެ ޓައުނެއް ކަމުގައިވާ ބޭގުމްގާންޖީގައި ފައްޅި ކޮމިޓީގެ އެގްޒެކެޓިވް މެމްބަރުންނަށް ވަނީ 200ށްވުރެ ގިނަ މީހުން ހަމަލާދީފައެވެ.

އޭއެފްޕީ ނިއުސްއިން ބުނާގޮތުގައި ހޮނިހިރު ދުވަހު ވަނީ ފައްޅި ކައިރީގައިވާ ކޯރަކުން ހިންދޫއެއްގެ ހަށިގަނޑު ފެނިފައެވެ. މިމީހުން މަރާލި މީހުން ހޯދުމުގެ މަސައްކަތްކުރަމުން އަންނަކަމަށް އެޑިސްޓްރިކްޓްގެ ޕޮލިސް ޗީފް ޝާހިދުލް އިސްލާމް ވަނީ ބުނެފައެވެ.

ބުދަ ދުވަހު ވަނީ ހަމަނުޖެހުންތަކުގައި ހަތަރު މީހުން މަރުވެފައެވެ. މިމީހުން މަރުވެފައިވަނީ ހިންދޫ ފައްޅިއަކަށް އަމާޒުކޮށް ހަމަލާ ދިނުމަށް މަސައްކަތްކުރަމުންދިޔަ 5000އެއްހާ މީހުންނަށް އަމާޒުކޮށް ފުލުހުން ބަޑިޖެހުމުންނެވެ. މިހަމަނުޖެހުންތައް ބަންގްލަދޭޝްގެ ވެރިރަށް ޑާކާގައިވެސް އަންނަނީ ކުރިޔަށެވެ. ހަމަނުޖެހުންތައް ކޮންޓްރޯލްކުރުމަށް ފުލުހުން އަންނަނީ ކަރުނަ ގޭހާއި ރަބަރު އުންޑަ ޖަހަމުންނެވެ. މީގެއިތުރުން އިންޓަރނެޓްގެ ޚިދުމަތް ވަނީ މެދުކަނޑާލާފައެވެ.

ކީރިތި ޤުރުއާންގެ ހުރުމަތް ކަނޑާލާއި އިސްލާމްދީނަށް ފުރައްސާރަކުރި މީހުންނަށް ހައްޔަރުކޮށް އެމީހުންނަށް އަދަބު ދިނުމަށް އިސްލާމީ ޖަމާއަތްތަކުން އަންނަނީ ގޮވާލަމުންނެވެ.

ބަންގްލަދޭޝްގެ އާބާދީގެ 165 މިލިއަން މީހުންގެ ތެރެއިން ހިންދޫ ދީނަށް އުޅެމުން އަންނަނީ 10 އިންސައްތަ މީހުންނެވެ.