އަނިޔާގެ ސަބަބުން ނޭމާއަށް ލައިޕްޒީގާ ދެކޮޅަށް ނުކުޅެވޭނެ

އުކުޅުވަޅަށް ލިބިފައިވާ އަނިޔާއެއްގެ ސަބަބުން ޔުއެފާ ޗެމްޕިއަންސް ލީގުގައި އަންގާރަ ދުވަހުގެރޭ ލައިޕްޒީގާ ދެކޮޅަށް ކުޅޭ މެޗުގައި ބްރެޒިލުގެ ތަރި ނޭމާއަށް ނުކުޅެވޭނެ ކަމަށް ޕީއެސްޖީގެ ކޯޗު މައުރީސިއޯ ޕޮޗެޓީނޯ ބުނެފިއެވެ.

ނޭމާގެ އުކުޅުވަޅަށް އަނިޔާވީ ފީފާ ވޯލްޑް ކަޕުގެ ދެކުނު އެމެރިކާ ކޮލިފައިންގައި ހުކުރު ދުވަހުގެ ފަތިހު އުރުގުއޭ އަތުން 4-1 ގެ ނަތީޖާއަކުން ބްރެޒިލް މޮޅުވި މެޗުގައެވެ. އޭގެ ފަހުން ފްރެންޗް ލީގުގައި ހުކުރު ދުވަހުގެރޭ އެންޖާސް އަތުން 2-1 ގެ ނަތީޖާއަކުން ބްރެޒިލް މޮޅުވި މެޗުގައި ނޭމާ ކުޅެފައެއް ނުވެއެވެ. އެކަމަކު އޭނާ އަންނަނީ ޕީއެސްޖީގެ ފަރިތަކުރުންތަކުގައި ބައިވެރިވަމުންނެވެ.

ޗެމްޕިއަންސް ލީގުގައި ލައިޕްޒީގާ ދެކޮޅަށް ކުޅެން އޮތް މެޗުގެ ކުރިން ބޭއްވި ނޫސްވެރިންގެ ބައްދަލުވުމެއްގައި ޕޮޗެޓީނޯ ބުނީ ލައިޕްޒިގާ ދެކޮޅަށް ކުޅޭ މެޗުގައި އުކުޅުވަޅަށް ލިބިފައިވާ އަނިޔާގެ ސަބަބުން ނޭމާއަށް ނުކުޅެވޭނެ ކަމަށެވެ. އެކަމަކު ނޭމާއަށް ލިބުނު އަނިޔާ ސީރިއަސް ނޫން ކަމަށާއި، އެގޮތުން އަންނަ އާދީއްތަ ދުވަހުގެރޭ ލީގުގައި މާސޭއާ ދެކޮޅަށް ކުޅޭ މެޗަށް އޭނާ ފިޓުވާނެކަމުގެ އުއްމީދު އެބައޮތް ކަމަށްވެސް ބުންޏެވެ.

ނޭމާއަށް އަނިޔާވިއިރު، މި ސީޒަނުގައި މިހާތަނަށް ޕީއެސްޖީއަށް ކުޅެދިން ހަތް މެޗުން ނޭމާ ކާމިޔާބުކުރެވިފައިވަނީ އެންމެ ލަނޑެކެވެ. އެކަމަކު އޭނާ އަންނަނީ ބްރެޒިލާއެކު ވޯލްޑް ކަޕުގެ ދެކުނު އެމެރިކާ ކޮލިފައިން މެޗުތަކުގައި މޮޅު ކުޅުމެއް ދައްކަމުންނެވެ.

ދުނިޔޭގެ އެންމެ އަގުބޮޑު ކުޅުންތެރިޔާގެ ގޮތުގައި 2017 ވަނަ އަހަރު ޕީއެސްޖީއާ ގުޅުނު ނޭމާ ވަނީ މި އަހަރުގެ މެއި މަހުގެ ތެރޭގައި އެ ޓީމުގެ އެއްބަސްވުން އާކޮށްފައެވެ. އެގޮތުން ޕީއެސްޖީގެ އެއްބަސްވުން އިތުރު ތިން އަހަރަށް ނޭމާ އާކުރުމާއެކު، އޭނާގެ އެއްބަސްވުން ދެން ހަމަވާނީ 2025 ވަަނަ އަހަރުގެ ޖޫން މަހުއެވެ.

މި ސީޒަނުގެ ޗެމްޕިއަންސް ލީގުގެ ގްރޫޕް އޭގައި ޕީއެސްޖީ ހިމެނޭއިރު، މި މުބާރާތުގައި އެންމެ ފަހުން ކުޅުނު މެޗުގައި އެ ޓީމުން ވަނީ އިނގިރޭސި ޗެމްޕިއަން މެންޗެސްޓާ ސިޓީ އަތުން 2-0 ގެ ނަތީޖާއަކުން މޮޅުވެފައެވެ. އެއާއެކު ގްރޫޕް އޭގެ އެއްވަނައިގައި އޮތް ޕީއެސްޖީއާއި ދެވަނައިގައި އޮތް ބްރޫޖަށް ދެ މެޗުން ހަތަރު ޕޮއިންޓް ލިބިފައިވާއިރު، ތިންވަނައިގައި އޮތް ސިޓީއަށް ލިބިފައިވަނީ ތިން ޕޮއިންޓެވެ. އަދި ތާވަލުގެ ފުލުގައި ލައިޕްޒީގް އޮތީ ދެ މެޗުން ޕޮއިންޓެއް ނުލިބިއެވެ.

ޗެމްޕިއަންސް ލީގުގައި އަންގާރަ ދުވަހުގެރޭ އަމިއްލަ ދަނޑުގައި ޕީއެސްޖީން ލައިޕްޒީގާ ދެކޮޅަށް ނުކުންނައިރު، މި މެޗު ފަށާނީ އަންގާރަ ދުވަހުގެރޭ ރާއްޖެ ގަޑިން 00:00 ގައެވެ.