މި އަހަރުގެ ޒުވާނުންގެ ދުވަސް ޤައުމީ ފެންވަރުގައި ކުޅުދުއްފުށީ ސިޓީގައި ފާހަގަ ކުރުމަށް ހަމަޖެހިފައިވާއިރު، ޔޫތު މިނިސްޓްރީއާއި ކުޅުދުއްފުށި ސިޓީ ކައުންސިލް ގުޅިގެން ގިނަ ހަރަކާތްތަކެއް އަންނަނީ ހިންގަމުންނެވެ.
މިހާތަނަށް ތިން ހަރަކާތެއް ވަނީ ކާމިޔާބުކަމާއި އެކު ކުރިއަށް ގެންގޮސްފައެވެ. އެގޮތުން މި މަހުގެ 10ން 14ށް ޖަރނަލިޒަމް ޓްރެއިނިންގ ޕްރޮގްރާމެއް ކުރިއަށް ގެންދިއައެވެ. މީގެ އިތުރުން 14 ވަނަ ދުވަހު ކުރިއަށްގެންދިއަ އިންކްލޫސިވް ސްޕޯޓްސް ފެސްޓިވަލްއާއި 15 ވަނަ ދުވަހު ކުރިއަށް ގެންދިއަ ސަރފްކުރުމުގެ ހަރަކާތްތައް ހިމެނެއެވެ.
މީގެ އިތުރުން 15ން 19ށް ވެސް ވަނީ ހަރަކާތްތަކެއް ރާވާފައެވެ. އެގޮތުން ލައިފް ސްކިލް ވޯރކްޝޮޕްއާއި ހޯމަ ދުވަހު ކުރިއަށް ދިޔަ ޓްރައިއެތްލަން ރޭސް ފާހަގަކޮށްލެވެއެވެ. އަދި ހޯމަ ދުވަހުގެ ރޭ ޕޭރެންޓިންގ ސެޝަންއެއް ބޭއްވުމަށް ވަނީ ހަމަޖެހިފައެވެ.
ޒުވާނުންގެ ދުވަހާ ގުޅިގެން ބާއްވާ އެހެން ހަރަކާތްތަކަށް ބަލާއިރު، 19ން 22ށް ކުރިއަށްދާ ބީޗް ސްޕޯޓްސް ފެސްޓިވަލް ހިމެނެއެވެ. މި ފެސްޓިވަލްގައި ހޭންޑް ބޯލް، ވޮލީ އަދި ސޮކަރ ހިމެނެއެވެ. މީގެ އިތުރުން 21 ވަނަ ދުވަހު ކައިޓް ސަރފިންގ ލައިޓް ޝޯވއެއް ކުރިއަށް ދާނެއެވެ.
22 ވަނަ ދުވަހު ނޭޝަން ވައިޑް ކްލީނިންގ އިވެންޓެއް ބާއްވަން ހަމަޖެހިފައިވާއިރު، މިއީ ރާއްޖޭގެ ހުރިހާ ރަށެއްގައި އެއްވަގުތެއްގައި ކުރިއަށްދާ ހަރަކާތެކެވެ. ކުޅުދުއްފުށި ކައުންސިލުން ބުނީ މި އިވެންޓްގައި ބޮޑަށް ކުރިއަށްދާނީ ގޮނޑުދޮށް ސާފު ކުރުން ކަމަށެވެ. 23 ވަނަ ދުވަހު ރޭވިފައިވާ ކަންކަމަށް ބަލާއިރު، ސައިކަލް ރޭސް، މިއުޒިކް ފެސްޓިވަލެއް އޮންނާނެއެވެ. އެންމެ ފަހުގެ ހަރަކާތެއްގެ ގޮތުން ޔޫތު މަހާސިންތާއެއް 1 ހަފުތާއަށް ކުރިއަށް ގެންދާނެއެވެ.
ޒުވާނުންގެ ދުވަހުގެ ރަސްމީ ޖަލްސާ ބާއްވަން ހަމަޖެހިފައިވަނީ، 22 ވަނަ ދުވަހުއެވެ.
