އެމްޑީޕީގެ އަހަރީ ދުވަހާއި ކުރިމަތިލާއިރު، ޑިމޮކްރަސީ އޮތީ މަގުން ކައްސާލާފައި: ރައީސް ނަޝީދު
25 ޖޫން 2017 | އާދީއްތަ 22:17އެމްޑީޕީއަށް ހޯމަދުވަހު 12 އަހަރުވާނެ
ރައީސް ނަޝީދާއި އެމްޑީޕީގެ އިސްބޭފުޅުން
ހޯމަ ދުވަހު ފާހަގަ ކުރާ މޯލްޑިވިއަން ޑިމޮކްރެޓިކް ޕާޓީ އެމްޑީޕީގެ 12 ވަނަ އަހަރީ ދުވަސް ފާހަގަކުރަމުން ދާއިރު، މިއަދު މި ގައުމުގެ ޑިމޮކްރެސީ އޮތީ މަގުން ކައްސާލާފައި ކަމަށް ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެމްޑީޕީގެ 12 ވަނަ އަހަރީ ދުވަހުގެ ހެޔޮއެދުންތަށް އެޕާޓީގެ މެންބަރުންނަށް ފޮނުއްވަމުން ރައީސް ނަޝީދު ކުރައްވާފައިވާ ޓްވީޓެއްގައި އާދިއްތަ ދުވަހުގެ ރޭ ކުރެއްވި ވިދާޅުވީ، އެޕާޓީގެ އަހަރީ ދުވަހާއި ކުރިމަތި ލާންޖެހިފައިވަނީ ރާއްޖޭގައި ގޮންޖެހުންތައް އޮތް ދަނޑިވަޅެއްގައި ކަމަށެވެ. އަދި މަގުން ކައްސާލާފައިވާ ޑިމޮކްރެސީ ހަމަމަގަށް އަޅުވާ، އެކަން ހައްލުކުރުމަށް މަސައްކަތް ކުރުމަށް އެންމެހާ ފަރާތްތަކަށް ރައީސް ނަޝީދު ވަނީ ގޮވާލައްވާފައެވެ.
ރާއްޖޭގެ އެންމެ ބޮޑު އިދިކޮޅު ޕާޓީ އެމްޑީޕީން، އެޕާޓީގެ 12 ވަނަ އަހަރީ ދުވަހާއި ގުޅިގެން އެޕާޓީގެ ރައީސް، ރައީސް ނަޝީދަށާއި، އަދި ޕާޓީގެ އިސްފަރާތްތަކަށް އާންމު މެންބަރުން ތަހުނިޔާ ފޮނުވަމުންދާއިރު، ޕާޓީގެ އާންމު މެންބަރުންނަށް ޕާޓީގެ އިސް ފަރާތްތަކުންވެސް ގެންދަވަނީ ތަހުނިޔާ ފޮނުވަމުންނެވެ.
އެމްޑީޕީއަކީ ދިވެހިރާއްޖެއަށް ޑިމޮކްރެސީ ގެނައުމުގައި މުހިއްމު ދައުރެއް އަދާކުރި ޕާޓީއެކެެވެ.
އެމްޑީޕީން ބުނީ ހޯމަދުވަހު ފާހަގަކުރާ އެޕާޓީގެ 12 ވަނަ އަހަރީ ދުވަހާއި ގުޅިގެން މުހިއްމު ހަރަކާތްތަކެއް ރޭވިފައިވާކަމަށެވެ. އެހެންނަމަވެސް އެ ހަރަކާތްތަކުގެ ތަފްސީލެއް އަދި ހާމައެއް ނުކުރެއެވެ.
އެމްޑީޕީން އެޕާޓީގެ ކޮންގްރެސް އެއް ނުބާއްވާތާ 7 އަހަރަށްފަހު މި އަންނަ ސެޕްޓެމްބަރު މަހު ކޮންގްރެސް ބޭއްވުމަށްވެސް ދަނީ ތައްޔާރުވަމުންނެވެ. އަދި ޕާޓީ ހިންގުމަށް ބޭނުންވާ ގޮފިތައް އެކުލަވާލައި މަގާމުތަކަށް ކުރިމަތިލުމުގެ ފުރުސަތު ވަނީ މިހާރު ހުޅުވާލާފައެވެ. އަދި ކެމްޕެއިންގެ ކަންކަން ވަރަށް ފޯރިއާއެކު ކުރިއަށްދާކަމަށް އެޕާޓީން މައުލޫމާތުދެއެވެ.
