ކުޅުދުއްފުއްޓާއި އައްޑޫ ހިތަދޫ ޕޯޓު އަޕްގްރޭޑުކުރުމަށް 200 މިލިއަން ޚަރަދުވާނެ: ޝާހިދު
18 އޮކްޓޯބަރު 2021 | ހޯމަ 08:40ދެ ޕޯޓުގެ ވެސް ޑިޒައިން މަސައްކަތް ވަނީ ނިމިފައި
އެމްޕީއެލްގެ އެމްޑީ ޝާހިދު އަލީ
ކުޅުދުއްފުއްޓާއި އައްޑޫ ސިޓީ ހިތަދޫގެ ޕޯޓު ތަރައްގީކުރުމަށް 200 މިލިއަން ރުފިޔާ ވަރު ޚަރަދުވާނެ ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ އެމްޑީ ޝާހިދު އަލީ ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމުގައި ބައިވެރިވެވަޑައިގެން ވާހަކަދައްކަވަމުން ޝާހިދު ވިދާޅުވީ ކުޅުދުއްފުށީ ސިޓީ ޕޯޓާއި، އައްޑު ސިޓީ ހިތަދޫ ޕޯޓުގެ އަޕްގްރޭޑިން މަސައްކަތްތަކެއް ކުރަން ނިންމާފައިވާ ކަމަށެވެ.
އެގޮތުން ކުޅުދުއްފުށީ ޕޯޓުގެ ބަނދަރަކީ ޖާގައިގެ ގޮތުން ދަތި ތަނެއް ކަމަށާއި، އެތަނަށް ވަދެވެނީ ވަރަށް ކުދި ބޯޓުތަކަށް ކަމަށް ޝާހިދު ވިދާޅުވިއެވެ. އެ ބަނދަރަށް އަންނަ ބޮޑެތި ބޯޓުތަކުން މުދާ އުފުލަން ޖެހެނީ ތަންކޮޅެއް ބޭރުގައި ބާއްވައިގެން ދޯންޏަކަށް ނޫނީ ބާޖަަކަށް ބާލައިގެން ކަމަށް ޝާހިދު ވިދާޅުވިއެވެ.
އެހެންކަމުން ކުޅުދުއްފުށި ޕޯޓު ތަރައްގީކުރުމަށް މިހާރު ރަވާފައިވަނީ ތަންކޮޅެއް ފުން ކީވޯލެއް ލިބޭ ގޮތަށް، ކީވޯލް ބޭރަށް ދިގުކުރުމަށް ކަމަށް ޝާހިދު ވިދާޅުވިއެވެ.
މީގެ އިތުރުން ހިތަދޫ ޕޯޓު މިހާރު ހެދިފައި އިން ގޮތުން އެ ޕޯޓުގެ ކީވޯލް އިންނަނީ ގަމު ކަނޑާއި ވިލިނގިލި ކަނޑާ ދިމާ މެދަށް ކަމަށް ޝާހިދު ވިދާޅުވިއެވެ. އެތަނުގެ ބާނި އޮންނަ ގޮތުގެ ސަބަބުން އެތަނާ ކައިރިކޮށްފައި އޮންނަ ބޯޓުތައް ވަރަށް ބޮޑަށް ހަލުވާ ކަމަށާއި، ރައްކާތެރިކަމާއެކު މުދާ ބޭލުމުގައި ދަތިތަކެއް ކުރިމަތިވާ ކަމަށް ޝާހިދު ވިދާޅުވިއެވެ.
ހިތަދޫ ޕޯޓުގެ މާސްޓަރ ޕްލޭން ވެސް މިކަމުގެ މާހިރުންނާއެކު މަޝްވަރާކޮށްގެން ޑިޒައިން ކޮށްފައިވާ ކަމަށާއި، މި ޕޯޓު ޑިޒައިންކޮށްފައިވަނީ ޕޯޓުގެ އެތެރެއަށް ވަދެވޭގޮތަށް ރައްކާތެރި ބަނދަރެއްގެ ގޮތުގައި ކަމަށް ޝާހިދު ވިދާޅުވިއެވެ. މިކަމުގެ ޑީޓެއިލް ޑިޒައިން ވެސް އެމްޓީސީސީއާއެކު ހަދަމުންދާކަމަށް ޝާހިދު ވިދާޅުވިއެވެ. އަދި މި ދެ ޕޯޓުގެ މަސައްކަތް ވެސް ވަރަށް އަވަހަށް ފެށޭނެ ކަމަށް ޝާހިދު ވަނީ ވިދާޅުވެފައެވެ.
ޝާހިދު ވިދާޅުވީ ކުޅުދުއްފުށީ ޕޯޓާއި ހިތަދޫ ޕޯޓުގެ އަޕްގްރޭޑިން މަސައްކަތަށް ކޮންމެ ޕޯޓަކަށް 100 ވަރަކަށް މިލިއަން ރުފިޔާ ޚަރަދުވާނެ ކަމަށް އަންދާޒާކުރެވޭ ކަމަށެވެ. މުޅިއެކު މި ދެޕޯޓަށް 200 ވަރަކަށް މިލިއަން ރުފިޔާ ޚަރަދުވާނެއެވެ.
މާލޭގެ އިތުރުން ކުޅުދުއްފުށި ޕޯޓާއި، އައްޑޫ ހިތަދޫ ޕޯޓަކީ ބޭރުގެ ބައެއް ބޯޓުތަކުން ވެސް މުދަލާއެކު ޖައްސާ ޕޯޓުތަކެކެވެ.
