މިއަހަރު ފަތުރުވެރިން ގެނައުމަށް އަމާޒުހިފި އަދަދުގެ 90 އިންސައްތަ ހާސިލްކުރެވިއްޖެ

މިއަހަރު ނިމުމުގެ ކުރިން ފަތުރުވެރިން ގެނައުމަށް އަމާޒުހިފި އަދަދުގެ 90 އިންސައްތަ ހާސިލްކުރެވިފައިވާކަމަށް ޓޫރިޒަމް މިނިސްޓްރީން ހާމަކޮށްފިއެވެ.

ޓޫރިޒަމް މިނިސްޓްރީން ކުރި ޓްވީޓެއްގައި ވަނީ މި އަހަރުގެ މިހާތަނަށް ރާއްޖެ އައި ފަތުރުވެރިންގެ އަދަދު 923،000ން މައްޗަށް ގޮސްފައިވާކަމަށެވެ. މިއާއެކު މިއަހަރު ނިމުމުގެ ކުރިން ރާއްޖެ ގެނަންނަ އަމާޒު ހިފާފައިވާ އެއް މިލިއަން ފަތުރުވެރިންގެ ތެރެއިން 90 އިންސައްތަ ހާސިލްކުރެވިފައިވާކަމަށް އެ މިނިސްޓްރީން ބުނެފައިވެއެވެ.

ރާއްޖެ ހިމެނިފައިވަނީ ކޮވިޑް-19 ގެ ހާލަތުގައި އެންމެ ފުރަތަމަ ފަތުރުވެރިކަން ފަށައިގަތް ގައުމުތަކުގެ ތެރޭގައެވެ. ރާއްޖެ ފަތުރުވެރިކަމަށް ހުޅުވާލީ ރައްކާތެރިކަމުގެ ފިޔަވަޅުތަކާއެކުއެވެ. އެގޮތުން ފަތުރުވެރިކަމުގެ ދާއިރާގައި މަސައްކަތްކުރާ މުވައްޒަފުންގެ ތެރެއިން 93 އިންސައްތަ މުވައްޒަފުން މިހާރު ވަނީ ވެކްސިންގެ ދެ ޑޯޒް ވެސް ފުރިހަމަކޮށްފައެވެ. އަދި ރާއްޖޭގެ އާބާދީގެ ބޮޑު ބައެއް ވެސް މިހާރު ވަނީ ވެކްސިން ފުރިހަމަކޮށްފައެވެ.

މީގެ އިތުރުން މިހާރު ރާއްޖެއަކީ ދަތުރުކުރުން ރައްކާތެރި ގައުމެއްގެ ގޮތުގައި ވަނީ ކަނޑައެޅިފައެވެ. އެގޮތުން އިޓަލީ އަދި ޔޫކޭގެ ރެޑް ލިސްޓުން ރާއްޖެ ވަނީ އުނިކޮށްފައެވެ. ޔޫކޭގެ ރެޑް ލިސްޓުން ރާއްޖެ އުނިކޮށްފައިވަނީ މިދިޔަ ސެޕްޓެމްބަރުމަހުގެ 19 ގައެވެ. އަދި އިޓަލީގެ ރެޑް ލިސްޓުން ރާއްޖެ އުނިކުރީ ސެޕްޓެމްބަރު މަހުގެ 29 ގައެވެ.

މިއާއެކު ރާއްޖެ އަންނަ ފަތުރުވެރިންގެ އަދަދު ވެސް ދުވަހަކަށްވުރެ ދުވަހެއް އިތުރުވަމުން އަންނައިރު ޓޫރިޒަމް މިނިސްޓްރީން އެންމެ ފަހުން އާންމުކުރި ޓޫރިޒަމް އަޕްޑޭޓުގައިވާގޮތުން އަހަރުގެ މިހާތަނަށް ރާއްޖެ އައި ފަތުރުވެރިންގެ އަދަދު ވަނީ 923،146ށް އަރާފައެވެ. މީގެ ތެރެއިން އިންޑިއާ މާކެޓުން 211،062 ފަތުރުވެރިން ރާއްޖެ އައިސްފައިވާއިރު، ރަޝިއާއިން 177،321 ފަތުރުވެރިން ވަނީ ރާއްޖެ އައިސްފައެވެ. އަދި ޖަރުމަނުން 60،463 ފަތުރުވެރިން މިހާތަނަށް ރާއްޖެ އައިސްފައިވެއެވެ.

އޯގަސްޓު މަސް ވެފައިވަނީ މި އަހަރުގެ މިހާތަނަށް އެންމެ ގިނަ ފަތުރުވެރިން އައި މަހަށެވެ. އެއީ 143،599 ފަތުރުވެރިންނެވެ. މި އަހަރު ދެވަނައަށް އެންމެ ގިނަ ފަތުރުވެރިން އައިސްފައިވަނީ ސެޕްޓެމްބަރު މަހުއެވެ. އެއީ 114،896 ފަތުރުވެރިންނެވެ. އަދި ތިންވަނައަށް އެންމެ ގިނަ ފަތުރުވެރިން އައިސްފައިވަނީ މާޗް މަހުއެވެ. މާޗް މަހު 109،585 ފަތުރުވެރިން ރާއްޖެ އައިސްފައިވާއިރު، ހަތަރުވަނައަށް އެންމެ ގިނަ ފަތުރުވެރިން އައި ޖުލައި މަހު ރާއްޖެ އައިސްފައިވަނީ 101،818 ފަތުރުވެރިންނެވެ.

މިއަހަރު ނިމުމުގެ ކުރިން އެއް މިލިއަނަށްވުރެ ގިނަ ފަތުރުވެރިން ރާއްޖެ ގެނައުމަށް އަމާޒު ހިފާފައިވާއިރު، 2020 ވަނަ އަހަރު ކޮވިޑްގެ ހާލަތުގައި ރާއްޖޭގެ ފަތުރުވެރިކަން ފަށައިގަނެ، އެ އަހަރު 555،494 ފަތުރުވެރިން ރާއްޖެ ގެނެސްފައިވެއެވެ.

ރާއްޖޭގެ ފަތުރުވެރިކަން އިތުރަށް ފުޅާކުރުމަށް އަންނަ އަހަރު ހޯމް ސްޓޭ ޓޫރިޒަމް ފަށަން ސަރުކާރުން ވަނީ ނިންމާފައެވެ. މިކަމުގެ ސަބަބުން ފަތުރުވެރިކަމުގެ ޚިދުމަތަށް އިތުރު އެނދުތައް އަންނާނެ ކަމަށް ޓޫރިޒަމް މިނިސްޓަރ ޑރ. އަބްދުﷲ މައުސޫމް ވަނީ ވިދާޅުވެފައެވެ. އަދި ހޯމް ސްޓޭ ޓޫރިޒަމް އިޝްތިހާރުކުރުމުގެ މަސައްކަތްތައް ފަށަން ތައްޔާރުވެފައިވާކަމަށާއި، މީގެ ސަބަބުން އަތޮޅުތެރެއަށް އިތުރު ކުރިއެރުންތަކާއި، ފައިދާތައް ލިބިގެންދާނެ ކަމަށް ވިދާޅުވިއެވެ.