މި މަހު އޮންނަ އާސިއާންގެ ގައުމުތަކުގެ ސަމިޓަށް މިޔަންމާގެ އަސްކަރީ ސަރުކާރުގެ ލީޑަރަށް ދައުވަތު ނުދޭން ނިންމައިފިއެވެ.
ބައިނަލްއަގުވާމީ މީޑިއާތަކުގައި ބުނެފައިވަނީ ރައްޔިތުން އިންތިޚާބުކޮށްފައިވާ ސަރުކާރު ބަޣާވާތަކުން ވައްޓާލައި މިޔަންމާގެ ކޮންޓްރޯލް ނަގާފައިވާ އަސްކަރީ ސަރުކާރުގެ ލީޑަށް ފުރުސަތު ނުދޭނެ ކަމަށެވެ. އަދި ދެކުނު އޭޝިއާގެ ގައުމުތަކުން އެ ފުރުސަތު ދިނުމަށް ނިންމާފައިވަނީ މިޔަންމާގެ ސިޔާސީ ނޫން ފަރާތަކަށް ކަމަށެވެ. މިޔަންމާގެ ވެރިކަން އަސްކަރިއްޔާއިން ފުރޮޅާލާފައިވަނީ މި އަހަރުގެ ފެބްރުއަރީ މަހުގައެވެ.
އާސިއާންގެ ގައުމުތަކުގެ ހާރިޖީ ވަޒީރުން މިގޮތަށް ނިންމާފައިވަނީ ހުކުރު ދުވަހުގެ ރޭ ބޭއްވި ކުއްލި ބައްދަލުވުމެއްގައެވެ. ސިންގަޕޫރުގެ ފޮރިން މިނިސްޓަރ ހޮނިހިރު ދުވަހު ވިދާޅުވީ ސަމިޓުން މިޔަންމާގެ އަސްކަރީ ސަރުކާރުގެ ޗީފް ސީނިއަރ ޖެނެރަލް މިން އައުންގ ލެއިން ބޭރުކުރުމަކީ އުނދަގޫ ނަމަވެސް އާސިއާންގެ އިތުބާރު ދެމެހެއްޓުމަށްޓަކައި ކޮންމެހެންވެސް ކުރަން ޖެހޭ ކަމެއް ކަމަށެވެ.
ފޮރިން މިނިސްޓަރުން ނެރުނު ބަޔާނެއްގައި ބުނެފައިވަނީ ފަސް ނުކުތާގެ މައްޗަށް އެކުލަވާލާފައިވާ ޕްލޭން އެންމެ ރަނގަޅަށް ތަންފީޒު ނުކުރެވޭ ކަމަށާއި، ބަޣާވާތާ ގުޅިގެން މިޔަންމާގައި އުފެދިފައިވާ ހަމަނުޖެހުން ނިމުމަށް ގެނައުމަށް މިއީ މުހިންމު މަސައްކަތެއް ކަމަށެވެ.
އާސިއާންގެ މިހާރުގެ ޗެއަރ ބުރުނާއީން ބުނެފައިވަނީ މިޔަންމާއިން ސިޔާސީ ނޫން މަންދޫބެއް ވަޑައިގެންނެވުމަށް ދައުވަތުއެރުއްވޭނެ ކަމަށެވެ. ސަމިޓް ބޭއްވުމަށް ހަމަޖެހިފައިވަނީ މި މަހުގެ 26ން 28 އަށެވެ. ނަމަވެސް މިޔަންމާއިން ގެންނާނީ ކޮން މަންދޫބެއް ކަމެއް އާސިއާނަކުން ހާމައެއް ނުކުރެއެވެ.
