އަނިޔާވެރިގޮތަކަށް ޔޫކޭގެ މަޖިލިސް މެމްބަރަކު އަވަހާރަކޮށްލައިފި

އަނިޔާވެރިގޮތަކަށް ޔޫކެގެ މަޖިލިސް މެމްބަރަކު އަވަހާރަކޮށްލައިފިއެވެ.

އަވަހާރަކޮށްލާފައިވަނީ އެގައުމުގެ ކޮންޒަރވޭޓިވް ޕާޓީއަށް ނިސްބަތްވާ 69 އަހަރުގެ ޑޭވިޑް އެމެސްކަމަށް ބޭރުގެ ނޫސްތަކުން ރިޕޯޓުކޮށްފައިވެއެވެ. އޭނާ އަވަހާރަކޮށްލާފައިވަނީ ކްރިސްޓިއަނުންގެ ފައްޅިއެއްގެ ތެރޭގައި ބައްދަލުވުމެއްގައި ހުއްނަވަނިކޮށް އެތައް ފަހަރެއްގެ މަތިން ވަޅި ހަރައި ކަމަށް ރިޕޯޓުކޮށްފައިވެއެވެ.

އޭނާއަށް އެމަރޖެންސީކޮށް ފަރުވާ ދީފައިވާކަމަށާއި، އެހެންނަމަވެސް އޭނާ އަވަހާރަވެފައިވާކަމަށް ރިޕޯޓުތަކުން ބުނެފައިވެއެވެ. މި މައްސަލައާއި ގުޅިގެން 25 އަހަރުގެ ފިރިހެނަކު ވަނީ ހައްޔަރުކޮށްފައެވެ.

ރިޕޯޓުތައް ބުނާގޮތުން ހަތިޔާރު އެޅި ފުލުހުން ވަނީ ވަރަށް ބާރަށް އެ ފައްޅީގެ ތެރެއަށް ވަދެފައެވެ.

މި ހާދިސާ ހިންގާފައިވަނީ ކޮން މަގުސަދެއްގައި ކަމެއް މިހާތަނަށް އެނގިފައިނުވާކަމަށް ރިޕޯޓުތައް ބުނެއެވެ.

އެމެސް އަވަހާރަވުމާއި ގުޅިގެން ޔޫކޭގެ މަޖިލިސް މެމްބަރުން ގެންދަވަނީ ތައުޒިޔާ ވިދާޅުމުންނެވެ. އަދި އޭމެސްގެ ހަނދާނުގައި އެގައުމުގެ ބޮޑުވަޒީރުގެ އޮފީހުގައި ހުރި ދިދަ ވެސް ވަނީ ތިރިކޮށްފައެވެ.