އެކި ގައުމުތަކުން ބޭނުންކުރާ ޕާސްޕޯޓްތައް ރޭންކުކުރާ "ދަ ހެންލީ ޕާސްޕޯޓް އިންޑެކްސް"ގައި މިއަހަރު ރާއްޖެއަށް 66 ވަނަ ލިބިއްޖެއެވެ.

ގައުމުތަކުން ބޭނުންކުރާ ޕާސްޕޯޓްތައް ރޭންކުކުރުމުގައި ބަލަނީ ދާން ބޭނުންވާ ތަނަކަށް ދިޔުމުގެ ކުރިން ވިސާ ހައްދަން ނުޖެހޭގޮތަށް ހުރޭތޯއެވެ. އެގޮތުން އެ ޕާސްޕޯޓެއް ބޭނުންކޮށްގެން ދެވެނީ ކިތައް ގައުމަށްތޯ ބަލައެވެ. އަދި ގައުމުތައް ރޭންކުކުރަނީ އެގޮތަށް ދެވޭ ތަންތަނުގެ އަދަދުގެ ނިސްބަތުންނެވެ. މިއަހަރުގެ ލިސްޓަށް ބަލާއިރު ރާއްޖޭގެ ޕާސްޕޯޓުގައި 87 ގައުމަކަށް ނުވަތަ ތަނަކަށް (ކުރިން ވިސާ ހެއްދުމަކާ ނުލައި) ދެވެއެވެ. މިދިޔަ އަހަރު ރާއްޖެއަށް ލިބިފައިވަނީ ރޭންކިންގގެ 59 ވަނައެވެ. އެއީ 85 ތަނަކަށް ދެވޭގޮތަށް އޮތުމުންނެވެ.

މިއަހަރު ދުނިޔޭގެ ރޭންކިންގއަށް ބަލާއިރު އެއް ވަނައިގައި އޮތީ ޖަޕާނާއި ސިންގަޕޫރެވެ. އެއީ 192 ތަނަކަށް ދެވޭތީއެވެ. ދެ ވަނަގައި ޖަރުމަނާއި ދެކުނު ކޮރެއާ އޮތީ 190 ތާކަށް ވިސާ އާ ނުލައި ދެވޭގޮތަށެވެ. ތިންވަނައިގައި ފިންލެންޑް, އިޓަލީ، ލަކްޒަމްބަރގް އަދި ސްޕެއިން އޮތީ 189 ތާކަށް ޕާސްޕޯޓާއެކު ދެވޭތީއެވެ.

ރޭންކިންގގެ އެންމެ ފުލުގައި އޮތީ އަފްޣާނިސްތާނެވެ. އެއީ 26 ތަނަކަށެވެ. ރާއްޖެ ހިމެނޭ ސާރކްގެ ގައުމުތަކަށް ބަލާއިރު އިންޑިޔާއަށް ލިބިފައިވަނީ ރޭންކުގެ 90 ވަނަ އެވެ. ބޫޓާނަށް 96 ވަނަ، ސްރީލަންކާއަށް 107 ވަނަ، ބަންގްލަދޭޝް އަށް 108 ވަނަ، ނޭޕާލަށް 110 ވަނަ އަދި ޕާކިސްތާނަށް 113 ވަނައެވެ.

ރޭންކުގެ އެންމެ ދަށުގައި އުޅޭ ގައުމުތަކުގެ ތެރޭގައި އިރާގާއި ސީރިއާ އަދި ޔަމަން ހިމެނެއެވެ.

މިއެންޑެކްސްގައި 199 ޕާސްޕޯޓެއްގައި 227 ގައުމަކަށް ނުވަތަ ސަރަަހައްދަކަށް ދެވޭ ގޮތްތައް ވަނީ ބަލާފައެވެ.

ދިވެހިރާއްޖޭގައި މިހާރު ބޭނުންކުރަމުން މި ދާ ޕާސްޕޯޓް ބޭނުންކުރަން ފަށާފައިވަނީ 2016 ވަނަ އަހަރުއެވެ.