އަޔާޓާއިން "ޓްރެވެލް ޕާސް" ތައާރަފްކުރަން ނިންމައިފި

އަޔާޓާ އިން ޓްރެވެލް ފާހެއް ތައާރަފުކުރަން ނިންމައި، އޭގެ ޓްރައެލްތައް ފަށައިފިއެވެ.

އިންޓަނޭޝަނަލް އެއަރ ޓްރާންސްޕޯޓު އެސޯސިއޭޝަން (އަޔާޓާ)އިން ތައާރަފުކުރާ މި ޓްރެވެލް ފާހަކީ، ކޮވިޑް-19ގެ މި ބަލިމަޑުކަމުގެ ތެރޭގައި އެއް ގައުމުން އަނެއް ގައުމަށް ދަތުރުކުރުމަށް ލުއިފަސޭހަގޮތްތަކެއް ހޯދައިދިނުމަށް ކުރަމުން އަންނަ މަސައްކަތުގެ ތެރެއިން ބައެކެވެ. ޑިޖިޓަލް ހެލްތް ޕާސްޕޯޓެއްގެ ގޮތުގައި ބޭނުންކުރާ މި ފާހަކީ ފޯނަށް އަޅާލެވޭ އެޕްލިކޭޝަނެކެވެ. މިއެޕްލިކޭޝަން މެދުވެރިކޮށް، ދަތުރުވެރިޔާ ހުރީ ވެކްސިން ޑޯޒް ފުރިހަމަ ކޮށްފައިތޯއާއި، ދަތުރުވެރިޔާގެ ޕީސީއާރް ޓެސްޓް ނަތީޖާ ބަލައިލެވޭނެއެވެ. އެއާއެކު ކަރަންޓީނަކާ ނުލާ ދަތުރުކުރުމުގެ ފުރުސަތު ލިބިގެންދާނެއެވެ.

ރަސްމީކޮށް މި ފާސް ބޭނުންކުރަން ފަށައި، އަންނަ މަހު 1 ގައި މި ފާހާއެކު ސިންގަޕޫރަށް ދަތުރުކުރަން ފަށާއިރު، އެހެން ގައުމުތަކުން ވެސް އަންނަނީ މި ފާސް އެގައުމަކުން ބަލައިގަންނަން އެއްބަސްވަމުންނެވެ. މިހާރު އެއްބަސްވެފައިވާ ގައުމުތަކަށް ބަލާއިރު، އޮސްޓްރޭލިއާ، ބުރުނާއީ، ޗައިނާ، ނިއުޒިލެންޑް އަދި ޓައިވާން ހިމެނެއެވެ.

މިދިޔަ އަހަރުން ފެށިގެން އަޔާޓާއިން ތައާރަފުކުރުމަށް މަސައްކަތް ކުރަމުން އަންނަ މި ފާހަކީ ދަތުރުވެރިޔާއަކީ އެއްތަނުން އަނެއްތަނަށް ދަތުރުކުރުމަށް ޝަރުތުހަމަވާ މީހެއްކަން ދެނެގަތުމަށް ފަސޭހަ އެޕްލިކޭޝަނެކެވެ. 20 އެއާރލައިނަކުން މިހާރު މީގެ ޓްރައެލްތައްވަނީ ފަށާފައެވެ.

ގައުމުތަކުގެ ބޯޑަރު ހުޅުވާލިނަމަވެސް ގިނަ ބަޔަކު ދަތުރު ކުރަން ފަށާނީ ކަރަންޓީނަށް ލުއި ލިބެން ފެށުމުންކަމަށް އަޔާޓާއިންވަނީ ބުނެފައެވެ. 2020 ވަނަ އަހަރު ވެގެންދިޔައީ، އޭވިއޭޝަން ދާއިރާ އަށް އެންމެ ބޮޑު ގެއްލުމެއް ލިބުނު އަހަރުގެ ގޮތުގައެވެ.

އޭވިއޭޝަން ދާއިރާއިން ރިކަވަރީއަށް ކުރާ ދަތުރަކީ ދިގު އަދި އުނދަގޫ ދަތުރަކަށް ވާނެ ކަމަށް އަޔާޓާއިން ބުނެފައިވެއެވެ. 2019 ވަނަ އަހަރު ނިމުނު އިރު އެ ސިނާއަތް އޮތް ހާލަތަށް ދެވޭނީ އެންމެ އަވަހަށް ވެސް 2024 ވަނަ އަހަރު ކަމަށް ލަފާކޮށްފައިވެއެވެ. އެއާއެކުވެސް އެންމެ އަވަހަށް ރިކަވަރ ވާނީ ޑޮމެސްޓިކް މާކެޓްތައް ކަމަށާއި އިންޓަނޭޝަނަލް މާކެޓްތައް ރިކަވާވާން އިތުރު މުއްދަތު ނަގާނެ ކަމަށް އެ ޖަމްއިއްޔާ އިން ލަފާކޮށްފައިވެއެވެ. މި ރިކަވަރީގައި "ޓްރެވެލް ޕާސް" މުހިއްމު ދައުރެއް އަދާކުރާނެ ކަމަށް އަޔާޓާއިން ބުނެެއެވެ.