ނިއުޕޯރޓްގެ ކުއްޔާއި ޖޫރިމަނާގެ ފައިސާ 30 ދުވަހުގެ ތެރޭގައި ދެއްކުމަށް ސްޓްރާޑާގެ މައްޗަށް ހައިކޯޓުން ހުކުމްކޮށްފި
ނިއުޕޯރޓް ވިއު ހުޅުވީ ފެބްރުއަރީ މަހުގެ 6ގައި
ނިއުޕޯރޓް ވިއު
ބްރިޖް ވިއު ޕްލެޓްފޯރމް ސަރަހައްދުގައި ސްޓްރާޑާ ކުންފުނިން ހުޅުވާފައިވާ ނިއުޕޯރޓްގެ ކުއްޔާއި ޖޫރިމަނާގެ ފައިސާ 30 ދުވަހުގެ ތެރޭގައި ދެއްކުމަށް ސްޓްރާޑާ ކުންފުނީގެ މައްޗަށް ހައިކޯޓުން ހުކުމްކޮށްފިއެވެ.
ނިއުޕޯރޓް ވިއުގެ މައްސަލާގައި 1.1 މިލިއަން ރުފިޔާ ހަވާލު ކުރަން ސިވިލް ކޯޓުން ކުރި ހުކުމް އިސްތިއުނާފު ކުރުމަށް ހައިކޯޓަށް ހުށަހެޅުމުން, އެ ކޯޓުން ވަނީ މި މައްސަލަ ބަލައިގެންފައެވެ. އަދި މިކަމާގުޅިގެން ހައިކޯޓުން ކުރި ހުކުމްގައި ބުނެފައިވަނީ އެއްބަސްވުމުގެ ދަށުން ދައްކަންޖެހި, ނުދައްކާ ވާ ފައިސާ އާއި މިޡްލީ ބަދަލާއެކު ޖުމްލަ އެއް މިލިއަން އެއް ލައްކަ ސާޅީސް ނުވަ ހާސް ދުއިސައްތަ ހަތްދިހަ އެއް ރުފިޔާ އަކީ ޕްލޭނިންގ މިނިސްޓްރީއަށް ސްޓްރާޑާ ކުންފުނިން ދައްކަން ޖެހި, ނުދައްކާ ވާ ފައިސާ ކަމަށެވެ. އަދި ބިން ހަވާލުކުރާ ދުވަހާ ހަމައަށް މިޡްލީ ބަދެއްގެ ގޮތުގައި, އިތުރަށް އަރަމުންދާ ކުއްޔާއި ޖޫރިމަނާގެ ފައިސާ 11 އޮކްޓޯބަރުން ފެށިގެން 30 ދުވަހުގެ ތެރޭގައި ދައުލަތަށް ދައްކާ ޚަލާޞް ކުރަންޖެހޭނެ ކަމަށް ހައިކޯޓުން ވަނީ ހުކުމްކޮށްފައެވެ.
ހައިކޯޓުން މިހެން ބުނެފައިވާއިރު, މިނިސްޓްރީ އޮފް ނޭޝަނަލް ޕްލޭނިންގ އެންޑް އިންފްރާސްޓްރަކްޗަރއިން ނެރުނު ނޫސްބަޔާނުގައި ބުނީ, ނިއުޕޯރޓް ހިންގަމުންދާ ބިން ހުސްކުރުމުގެ މައްސަލައިގައި އެތަން ހުސްކުރުމަށް ސިވިލް ކޯޓުން 26 ސެޕްޓެމްބަރު 2019ގައި އިއްވާފައިވާ ޤަޟިއްޔާ ހުކުމާ އެއްގޮތަށް ތަން ހިންގަމުންދާ ސްޓްރާޑާ ކުންފުނިން އަމަލުކޮށްފައިނުވާ ކަމަށެވެ.
މިދިޔަ ފެބްރުއަރީ މަހުގެ 6ގައި ހުޅުވާފައިވާ 500 މީހުންގެ ޖާގައިގެ ނިއުޕޯރޓް ރެސްޓޯރަންޓްސްގެ މެނޭޖިންގ ޑިރެކްޓަރަކީ ޕީޕީއެމްގެ ކުރީގެ ކައުންސިލް މެމްބަރު ޒާހިދު ރަމީޒުގެ އަނބިކަނބަލުން މަލަކާ ޢަބްދުލް ޙަކީމެވެ. ކުރިން އެކުންފުނީގެ މެނޭޖިން ޑިރެކްޓަރަކަށް ހުންނެވި ޒާހިދު ރަމީޒު ވަނީ ފަހުން އެ ކުންފުނި ދޫކުރައްވައި މަލަކާގެ ނަމަށް ބަދަލުކޮށްފައެވެ. ތަނުގެ ކުލީގެ ގޮތުގައި އެއްލައްކައަށް ވުރެ ގިނަ ރުފިޔާ ސަރުކާރަށް ދެއްކުމަށް ނިއުޕޯރޓް ވިއު ކުއްޔަށް ދީފައި ވަނީ 8 އަހަރަށެވެ.
ނިއުޕޯރޓް ހިންގާ ސްޓާރާޑާ ޕްރައިވެޓް ލިިމިޓެޑަށް ޕްލެޓްފޯމް ސަރަހައްދު ދޫކުރީ ކުރީގެ ރައީސް ޢަބްދުﷲ ޔާމީނުގެ ވެރިކަމުގައެވެ. ގާތްގަނޑަކަށް 10،000 އަކަފޫޓުގެ ބިމެއް ސްޓާރާޑާ ޕްރައިވެޓް ލިމިޓެޑަށް ކުއްޔަށް ދިނީ ޕްލެޓްފޯމާއި ރެސްޓޯރަންޓާއި ކުޑަކުދިން ކުޅޭނެ ސަރަހަދެއްގެ އިތުރުން ޕާކިން ޒޯން ހަދާގޮތަށެވެ.
