ބޯޓު ފަރަށް އެރި މައްސަލައިގައި ޖަވާބުދާރީ ވުމުގެ ފުރުސަތު ދީފި

ޕެނަމާގެ ބޯޓު ފަރަށް އެރި ހާދިސާ އާއި ގުޅިގެން ޖަވާބުދާރީ ވުމުގެ ފުރުސަތުދީފިއެވެ.

ޕެނަމާއަށް ނިސްބަތްވާ އެމްވީ ނޭވިއަސް އަމަރިލިސް ނަމަކަށް ކިޔާ އާގުބޯޓު ކ. ރަސްފަރީ ހުޅަނގު ފަރާތު ފަރަށް އަރާފައިވަނީ އޮގަސްޓު މަހުގެ 19 ވަނަ ދުވަހުއެވެ. އޮގަސްޓު 29 ވަނަ ދުވަހު ބޯޓު ވަނީ ފުންކުރެވިފައެވެ. އެހެންނަމަވެސް އެ ބޯޓު އަދިވެސް އޮތީ ރާއްޖޭގައެވެ.

މިކަމާއި ގުޅޭގޮތުން ރާއްޖެއެމްވީން ކުރި ސުވާލަކަށް ޖަވާބު ދެއްވަމުން އީޕީއޭގެ ޑިރެކްޓަރ ޖެނެރަލް އިބްރާހިމް ނައީމް ވިދާޅުވީ ހާދިސާ ހިނގި ގޮތާއި ގުޅޭގޮތުން ޖަވާބުދާރީ ވުމުގެ ފުރުސަތު ދީފައިވާ ކަމަށެވެ. އެހެންނަމަވެސް އަދިވެސް ބޯޓު ޖޫރިމަނާކޮށްފައިނުވާކަމަށް ނައީމް ވިދާޅުވިއެވެ.

އޮގަސްޓު 29 ވަނަ ދުވަހު ބޯޓު ފުންކުރެވުނު ހިސާބުން އީޕީއޭއިން ފެށީ ފަރަށް ލިބުނު ގެއްލުން ބެލުމަށް ހަދާ ސަރވޭގެ މަސައްކަތެވެ. އަދި މި ސަރވޭގެ މަސައްކަތް ނިންމާލާފައިވަނީ ނިމިދިޔަ ސެޕްޓެމްބަރު މަހުގެ 25 ވަނަ ދުވަހުއެވެ. ސަރވޭ ނިމުމާއި ގުޅިގެން އޭރު ނައީމް ވަނީ ސަރވޭ ރިޕޯޓު ތައްޔާރުކުރުމުގެ މަސައްކަތް ކުރިއަށްދާ ކަމަށް ވިދާޅުވެފައެވެ. ރިޕޯޓު ތައްޔާރުކޮށް ނިމުމުން އެ ބޯޓު ޖޫރިމަނާކުރާނެ އަދަދެއް ކަލްކިއުލޭޓް ކުރާނެ ކަމަށް ނައީމް ވިދާޅުވިއެވެ. އެހެންނަމަވެސް އަދިވެސް މި ރިޕޯޓު ތައްޔާރުކުރުމުގެ މަސައްކަތް ނިމިފައެއް ނުވެއެވެ.

ނައީމް ވިދާޅުވީ ބޯޓު އުރުމުގެ ތެރެއިންނާއި، ފުން ކުރުމުގެ ތެރެއިން ރަސްފަރި ފަރަށް ވަރަށް ބޮޑު ގެއްލުމެއް ލިބިފައިވާކަން ސަރވޭއަށް ފާހަގަކުރެވުނު ކަމަށެވެ. ފަރުގެ 1 ހެކްޓަރާ ގާތްކުރާ ސަރަހައްދަކަށް ގެއްލުން ލިބިފައިވާކަމަށް ނައީމް ވިދާޅުވިއެވެ. ބޯޓު ޖޫރިމަނާކުރާނެ އަދަދެއް ކަނޑައަަޅާނީ ފަރަށް ލިބުނު ގެއްލުން ބަލައި، ގަވައިދުގައި އިންނަ ފޯމިއުލާއާ އެއްގޮތަށް ކަމަށް ނައީމް ވިދާޅުވިއެވެ. ބޮޑު އަދަދަކުން ބޯޓު ޖޫރިމަނާކުރާނެ ކަމަށް ލަފާކުރެވޭ ކަމަށް ނައީމް ވިދާޅުވިއެވެ.

ހާދިސާއައި ގުޅިގެން ފަރަށް ލިބުނު ގެއްލުން ބަލައި ނިމިފައިވާތީ ބޯޓު ފުރަން އެދޭނަމަ ފުރޭނެ ކަމަށް ނައީމް ވިދާޅުވިއެވެ. އެހެންނަމަވެސް ޖޫރިމަނާ ކަނޑަނޭޅެނީސް ބޯޓު ފުރަން އެދޭނަމަ 100 މިލިއަން ރުފިޔާގެ ޑިޕޮޒިޓެއް ދައްކަންޖެހޭނެ ކަމަށް ވިދާޅުވިއެވެ.

މި ހާދިސާ ހިނގުމުގައި ބޯޓުގެ ކެޕްޓަންގެ ވަރަށް ބޮޑު އިހުމާލެއް އޮތްކަން ފާހަގަކުރެވުނު ކަމަށް މި ހާދިސާ ހިނގި ގޮތް ތަހުގީގުކުރުމުގައި ހަރަކާތްތެރިވި ޓީމުން ބުނެފައިވެއެވެ. މި ބޯޓަކީ އިންޑިޔާގެ ސޫތުކުޅިން ފުރައިގެން ދެކުނު އެފްރިކާއަށް ދަތުރުކުރަމުންދިޔަ ބޯޓެކެވެ. މި ބޯޓު ފަރަށް އެރީ ބޯޓުގެ އިންޖީނުގެ ޔުނިޓު ތިނެއްގެ ހޫނުމިން މަތިވުމުން އިންޖީނު ނިއްވާލުމުގެ ސަބަބުން އުޅަނދު އޮޔާ ގޮސްގެން ކަމަށް މިހާތަނަށް ހޯދުނު ހޯދުންތަކުން ދައްކައެވެ. އުޅަނދު ފަރަށް އެރުމުން ސަލާމަތްކުރުމަށް އުޅަނދުގެ ކެޕްޓަން ކުރަންޖެހޭ ކަންކަން ކޮށްފައިނުވާކަމަށާއި، މިފަދަ މައްސަލައެއް ދިމާވިކަން އަންގާފައިނުވާކަމާއި، އަދި ކެޕްޓަންގެ ހައިސިއްޔަތުން އަޅަންޖެހޭ ފިޔަވަޅުތައް އަޅާފައި ނުވާކަން މިހާތަނަށް ހޯދުނު ހޯދުންތަކުން ދައްކާފައިވެއެވެ.