މިދުވަސްވަރަކީ އެހެނިހެން އަހަރުތަކެކޭވެސް އެއްފަދައިން ދުނިޔޭގެ އެކި ކަންކޮޅުތަކުން ގިނަ ބާވަތްބާވަތުގެ ދޫނި ރާއްޖެއަށް ހިޖުރަކުރަމުން އަންނަ ދުވަސްވަރެއް ކަމަށާއި، ހިމާޔަތް ކުރެވިފައިވާ ދޫނިތައް ހިފައި އެ ދޫނިތަކަށް ގޯނާކުރާ ފަރާތްތަކާއި މެދު ފިޔަވަޅު އަޅާނެ ކަމުގެ އިންޒާރު، އެންވަޔަރަމެންޓް ޕްރޮޓެކްޝަނަލް އެޖެންސީ (އީޕީއޭ) އިން ދީފިއެވެ.
އީޕީއޭއިން ނެރުނު ބަޔާނެއްގައި ބުނީ، އެގޮތަށް ހިޖުރަކުރާ ދޫންޏަކީ "ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ގާނޫނު" ދަށުން ހެދިފައިވާ "ދިވެހިރާއްޖެއަށް ހިޖުރަކުރާ ދޫނި ހިފައި، ގެންގުޅުމާބެހޭ ގަވާއިދު" ގެ ދަށުން ހިމާޔަތްކުރެވިފައިވާ ދޫނިތައް ކަމަށެވެ. ނަމަވެސް ކޮންމެ އަހަރަކު މިދުވަސްވަރު ވަރަށް ގިނަ ފަރާތްތަކުން އެފަދަ ދޫނި ހިފާ، ހައްޔަރުކޮށް ދޫންޏަށް ގޯނާކުރަމުންދާތީ، އެކަމާމެދު ކަންބޮޑުވާ ކަމަށް އީޕީއޭއިން ބުންޏެވެ.
އީޕީއޭ އިން ބުނީ، ފުޓްބޯޅަ ދަނޑުތަކާއި ހާމައަށް ހުންނަ ބިންތަކާއި ހިއްކާފައިވާ ބިންތަކުގައި މަޅިފައްޗާއި ދަންތުރައާއި އެކި އާލާތްތައް ބޭނުންކޮށްގެން މިފަދަ ދޫނިތައް ހިފާކަމުގެ ޝަކުވާ ލިބެމުންދާ ކަމަށެވެ. ހިމާޔަތްކޮށްފައިވާ ދޫނިތައް ހިފާ، އެތަކެއްޗަށް ގޯނާކޮށް, ކޮށީގައި ބަންދުކޮށްގެން ނުގެންގުޅުމަށް ހުރިހާ ފަރާތްތަކަށްވެސް އެ އެޖެންސީން ވަނީ ނަސޭހަތްތެރިވެފައެވެ.
ހިމާޔަތްކުރެވިފައިވާ ދޫނި ހިފާ، ހައްޔަރުކޮށް އަދި ގޯނާކުރާ ފަރާތްތަކާމެދު ތިމާވެއްޓަށްދޭ ގެއްލުންތަކަށް ޖޫރިމަނާ ކަނޑައެޅުމާއި ބަދަލު ހޯދުމުގެ ގަވާއިދާއި ދިވެހިރާއްޖެއަށް ހިޖުރަކުރާ ދޫނި ހިފައި، ގެންގުޅުމާބެހޭ ގަވާއިދުގެ ދަށުން ޖޫރިމަނާ ކުރެވޭނެ ކަމަށް އީޕީއޭއިން ބުންޏެވެ. އަދި ތިމާވެށި ރައްކާތެރިކޮށް ދެމެހެއްޓުމާބެހޭ ގާނޫނާއި މި ގާނޫނުގެ ދަށުން ހެދިފައިވާ ގަވާއިދުތަކާއި ހިމާޔަތްކޮށްފައިވާ ދިރުންތަކާ ގުޅޭގޮތުން އަންގާ އެންގުންތަކާއި، އެ ގާނޫނާއި ގަވާއިދުތައް ތަންފީޒުކުރުމަށް ހުރިހާ ފަރާތްތަކުގެ އެއްބާރުލުން ދިނުމަށް އީޕީއޭ އިން ވަނީ އެދިފައެެެވެ.
މި މޫސުމުގައި ރާއްޖެއަށް ޒިޔާރަތް ކުރާ ދޮންދޫންޏާއި ދޮންދޫނި ލޯފިނދާއި މިބާވަތުގެ ހުރިހާ ދޫނިސޫފާސޫތްޕަކީ ވެސް މަދިރި ކޮންޓްރޯލް ކުރުމުގައި މުހިންމު ދައުރެއް އަދާކުރާ އަދި މަދިރީގެ ސަބަބުން ޖެހޭ އެކި ބާވަތްތަކުގެ ބަލިތަކުން ސަލާމަތްކޮށް ދުރުކޮށްދިނުމުގައި އިސް ރޯލެއް އަދާކުރާ ދިރުންތަކެއް ކަމަށް އީޕީއޭ އިން ބުންޏެވެ. އެހެންކަމުން މި ދަނޑިވަޅުގައި މި ބާވަތްތަކުގެ ހުރިހާ ސޫތްޕެއް ހިފުމާއި އެއަށް ގޯނާކުރުމުން ދުރުހެލިވުމަށް ވަނީ އެދިފައެވެ.
