ފުވައްމުލަކު ތުއްތު ކުއްޖާގެ މަރާއި ގުޅުންހުރި އެންމެންގެ ބަޔާން ނަގައިފި
ހެލްތު މިނިސްޓްރީގެ ޓީމު އެރަށަށް ދިޔައީ މިމަހުގެ ހަތް ވަނަ ދުވަހު
ފުވައްމުލައް ހޮސްޕިޓަލް
ފުވައްމުލަކު ހޮސްޕިޓަލުގައި ނިޔާވި ކުޑަކުއްޖާގެ މައްސަލާގައި ކަމާ ގުޅުންހުރި އެންމެންގެ ބަޔާން ހެލްތު މިނިސްޓްރީން ނަގައިފިއެވެ.
ރާއްޖެއެމްވީއަށް މައުލޫމާތު ދެއްވަމުން ހޮސްޕިޓަލުގެ މެނޭޖަރ މުހައްމަދު ލިރާރު ވިދާޅުވީ މި މަހުގެ ހަތް ވަނަ ދުވަހު ހެލްތު މިނިސްޓްރީގެ ޓީމު އެ ރަށަށް ގޮސް، ހޮސްޕިޓަލުގެ މުވައްޒަފުންނާއި އާއިލާ މީހުންގެ ބަޔާން ނަގާފައިވާ ކަމަށެވެ. އަދި މިނިސްޓްރީން ރިޕޯޓް ނެރޭނެ ވަގުތަކަށް އިންތިޒާރު ކުރަމުންދާ ކަމަށް ވެސް އޭނާ ވިދާޅުވިއެވެ.
ކުޑަ ކުއްޖާ ނިޔާވީ ހޮސްޕިޓަލުގެ އިހުމާލުން ކަމަށް އާއިލާއިން ތުހުމަތު ކުރެއެވެ. މިނިސްޓްރީގެ ޓެކްނިކަލް ޓީމުން އެކަން ތަހުގީގު ކުރަމުން އަންނަ ކަމަށާއި، އެކަމުގައި އިހުމާލެއް އޮތްނަމަ އަޅަންޖެހޭ ފިޔަވަޅު އަޅާނެ ކަމަށް ބުނެއެވެ. ލިރާރު ވިދާޅުވީ، ކުއްޖާ ހޮސްޕިޓަލަށް ގެންދިޔައީ ހޮޑުލައި ބަނޑުގައި ރިއްސާތީ ކަމަށާއި، ނަރުހުންނާއި ޑޮކްޓަރުން ވަގުތުން ކުއްޖާއަށް ފަރުވާ ދޭން ފެށި ކަމަށެވެ. ކުއްޖާގެ ހާލު ގޯސްވާން ފެށުމުން ވެސް ފަރުވާ ދިނުމުގައި މަޝްއޫލުވެގެން އުޅުނު ކަމަށް ލިރާރު ވިދާޅުވިއެވެ.
ކުއްޖާ ހޮސްޕިޓަލަށް ގެންދިޔައީ އާދީއްތަ ދުވަހުގެ ހަވީރުގެ ވަގުތެއްގައެވެ. ނިޔާވީ އިރުއޮއްސި 7:30 ހާއިރުއެވެ. އެ ކުއްޖާ ނިޔާވީ، އެކުއްޖާގެ ގަޔަށް ޖެހި އިންޖެކްޝަނަކާ ގުޅިގެން ކަމަށް އާއިލާއިންވަނީ ތުހުމަތުކޮށްފައެވެ. ނިޔާވެފައިވަނީ ފުވައްމުލަކު ފުނާޑު، ނޫރީ ފެހި، އުމުރުން 6 އަހަރުގެ ސާދާ ސައުދުﷲ އަހުމަދެވެ.
އާއިލާއިން ބުނެފައިވަނީ އިންޖެކްޝަން ޖެހިފަހުން ކުއްޖާގެ ބަލީގެ ހާލަތު ގޯސްވެ، ކުއްޖާގެ ހަރަކާތް ހުއްޓުނު ކަމަށެވެ. ނިޔާވިއިރު، އެކަން ހޮސްޕިޓަލުން ފޮރުވަން މަސައްކަތް ކޮށްފައިވާ ކަމަށް ވެސް އާއިލާއިން ބުނެފައިވެއެވެ.
