ރައީސް ޞާލިޙްގެ ފަރާތްޕުޅުން، ކޯލިޝަން ރޫޅާލެއްވުމަށް މަސައްކަތްކުރައްވާ ތަނެއް ނުފެނޭ: އެމްއާރްއެމް
މި ސަރުކާރުގެ ފަރާތުން ހިތްހަމަނުޖެހޭ ކަމެއް ފެނުނު ނަމަވެސް، މަޝްވަރާކޮށްގެން ހައްލު ކުރުމުގެ މަސައްކަތްކުރަމުން ދާނެކަމަށް ވިދާޅުވި
ސަރުކާރު ކޯލިޝަންގައި ހިމެނޭ ލީޑަރުންނާއެކު ނައިބު ރައީސް ފައިޞަލް ނަސީމް
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ފަރާތްޕުޅުން, ކޯލިޝަން ރޫޅާލެއްވުމަށް މަސައްކަތް ކުރައްވާ ތަން ފެނިވަޑައިނުގަންނަވާ ކަމަށް މޯލްޑިވްސް ރިފޯމް މޫވްމަންޓް (އެމްއާރްއެމް)ގެ ރައީސް ފާރިސް މައުމޫން ވިދާޅުވެއްޖެއެވެ.
ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަަކަފުޅު ދައްކަވަމުން ފާރިސް ވިދާޅުވީ އެމްއާރްއެމް އިން ކޯލިޝަން ސަރުކާރާއެކު ދެމިތިބޭނެ ކަމަށެވެ. އަދި ޕާޓީއަށް ނިސްބަތްވާ ވަޒީރުން ވެސް ދެމިތިއްބެވީ ރައީސް ޞާލިޙާއެކުގައި ކަމަށެވެ. މި ސަރުކާރުން ވެފައިވާ ވައުދުތައް ފުއްދުމުގައި އެމްއާރްއެމްއިން އެހީތެރިކަން ފޯރުކޮށްދޭނެ ކަމަށާއި, ކޯލިޝަންގެ ކަންކަމުގައި ޕާޓީން ސީދާ މަޝްވަރާ ކުރަނީ ރައީސްއާ ކަަމަށް ފާރިސް ވިދާޅުވިއެވެ. އަދި މި ސަރުކާރުގެ ފަރާތުން ހިތްހަމަނުޖެހޭ ކަމެއް ފެނުނަމަވެސް އެކަމެއް މަޝްވަރާކޮށްގެން، ހައްލު ކުރުމުގެ މަސައްކަތް ކުރަމުންދާ ކަމަށް ފާރިސް ވިދާޅުވިއެވެ.
އެމްއާރްއެމްއިން އަލަށް އިންތިޚާބުވި ލީޑަރޝިޕުން ވެސް ރައީސް ޞާލިޙާއެކު ސާބިތުކަމާއެކު ދެމިތިއްބަވާނެކަން ފާހަގަކުރައްވައި ފާރިސް ވިދާޅުވީ, އައު ލީޑަރޝިޕުން ވަރަށް އަވަހަށް ރައީސްއާ ބައްދަލުކުރައްވާނެ ކަމަށެވެ. ފާރިސް މިފަދައިން ވިދާޅުވެފައިވާއިރު ރައީސް ޞާލިޙާއެކު ކުރިއަށް ވަޑައިގަންނަވާނެ ކަމަށް ރައީސް މައުމޫން ވެސް ވަނީ ވިދާޅުވެފައެވެ. ރައީސް މައުމޫން ވިދާޅުވީ އެމްއެމްއާރްއެމްއިން ކުރިއަށްދާނީ ކޯލިޝަނާއެކު ކަމަށާއި، ކޯލިޝަން ރޫޅާނުލައްވާނެ ކަމަށެވެ. އަދި ކުރިއަށް އޮތް ތާނގައި ވެސް ދާނީ ރަނގަޅަށް ކަމަށާއި ރައީސް ޞާލިޙާއެކު އެމަނިކުފާނަށް ސަޕޯޓް ދެއްވައިގެން ކުރިއަށް ވަޑައިގަންނަވާނެ ކަމަށެވެ.
ރައީސް މައުމޫން މިހެން ވިދާޅުވެފައިވާއިރު މިނިސްޓަރ ޢިމްރާން ވިދާޅުވީ އޭރު ޕާޓީތައް ކޯލިޝަން ހެދުމުން ރައްޔިތުންގެ އުންމީދު ވަރަށް ބޮޑު ވެގެން ދިޔަކަމަށެވެ. އަދި ކޯލިޝަންގައި ހިމެނޭ ހުރިހާ ޕާޓީތަކަށް އެކުވެގެން މަސައްކަތް ކުރެވޭނެ މާހައުލެއް އޮތް ހިނދެއްގައި ސަރުކާރާއެކު ދެމިތިބޭނެ ކަމަށެވެ. އަދި މި ސަރުކާރު ކުރިއަށްދާނީ ކޯލިޝަނާއެކު ކަމަށާއި، ކުރީގެ ރައީސް ޢަބްދުﷲ ޔާމީނާއެކު ރައީސް ޞާލިޙު ކުރިއަށް ވަޑައިގަންނަވާތަން ނުފެންނަ ކަމަށެވެ. ކޯލިޝަންގައި ހިމެނޭ ދެ ލީޑަރުން މިހެން ވިދާޅުވެފައިވާއިރު ސަރުކާރު ކޯލިޝަންގައި ހިމެނޭ ޖުމްހޫރީ ޕާޓީގެ ލީޑަރު ޤާސިމް އިބްރާހީމް ވެސް ވިދާޅުވީ ރައީސް ޞާލިޙާއެކު ކުރިއަށް ވަޑައިގަންނަވާނެ ކަމަށެވެ.
