ސިޔާސަތުތަކާއި އަމާޒުތަކާއި ކަންތައް ކުރާ ވައްޓަފާޅިއަށް ގެނެވުނު ބަދަލާއެކީގައި ތާއީދު އިތުރުވެއްޖެ - ރައީސް
އެއިރު އޮތް ކޯލިޝަނާއި، މިހާރު އޮތް ކޯލިޝަނާއި ތަފާތު
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
ސިޔާސަތުތަކާއި އަމާޒުތަކާއި ކަންތައްކުރާ ވައްޓަފާޅިއަށް ގެނެވުނު ބަދަލާއެކީގައި ކުރީގައި ތާއިދުނުކުރާ އެތައްބަޔަކު ތާއިދުކުރައްވާ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.
މ. އަތޮޅާއި ވ. އަތޮޅަށް ކުރެއްވި "އުފާވެރި އަމާންރާއްޖެ' ކެމްޕޭން ނިންމަވާލެއްވުމަށްފަހު ނޫސްވެރިންނާއި ބައްދަލުކުރައްވާ ވާހަކަފުޅުދައްކަވަމުން ރައީސް ވިދާޅުވީ އެއްވެސް މީހަކު ދުރަށް ދިއުމަކީ އެއިން ނަތީޖާއަށް އަސަރުކުރާނެ ކަމެއް ކަމަށެވެ. އެމަނިކުފާނު ބޭނުންފުޅުވަނީ އެންމެންވެސް ކުރީގައި ތިބި ގޮތަށް އެއްވިސްނުމެއްގައި ކުރިއަށްވަޑައިގަތުމަށް ކަމަށާއި، އެއްވެސް މީހަކު ޕާޓީން ދުރަށްދިއުމަކީ ގެއްލޭ ވޯޓެއް ކަމަށް ވިދާޅުވިއެވެ. ރައީސް ވިދާޅުވީ މަސައްކަތް ކުރައްވަމުން ގެންދަވަނީ އެ ގެއްލޭ ވޯޓު އެހެން ގޮތްގޮތުން ހޯއްދަވަން ކަމަށާއި، އެމަންޒަރު ފެނިވަޑައިގަންނަވާ ކަމަށެވެ.
ރައީސް ވިދާޅުވީ އެއިރު އޮތް ކޯލިޝަނާއި، މިހާރު އޮތް ކޯލިޝަނާއިވެސް ތަފާތު ކަމަށެވެ. އަދި ސިޔާސަތުތަކާއި، އަމާޒުތަކާއި، ކަންތައް މިކުރާ ވައްޓަފާޅިއަށް ގެނެވުނު ބަދަލާއެކީގައި ކުރީގައި ތާއިދުނުކުރާ އެތައްބަޔަކު ތާއިދުކުރައްވާ ކަމަށެވެ.
ރައީސް ވިދާޅުވީ އެމަނިކުފާނަށް ފާހަގަކުރެއްވުނު އެންމެ ބޮޑު އެއްކަމަކީ 2018 ވަނަ އަހަރާ ހިލާފަށް މ. އަތޮޅުގެ ތާއިދު ކުރިއަށްވުރެ އިތުރުވެފައިވާކަމެވެ. އަދި 2018 ގައި ކުލަ ނުޖެއްސުނު 2 އަތޮޅަކީ މ. އަތޮޅާއި، ފ. އަތޮޅު ކަމަށާއި، އެހެންނަމަވެސް މިހާރު ފެންނަނީ މ. އަތޮޅުވެސް ފ. އަތޮޅުވެސް ތަފާތު ބޮޑުކޮށް ކާމިޔާބުކުރެވޭނެކަން ކަމަށް ރައީސް ވިދާޅުވިއެވެ.
ރައީސް ވިދާޅުވީ ވ. އަތޮޅަކީ 2018 ގައި މެޖޯރިޓީ ލިބުނު އަތޮޅެއް ކަމަށެވެ. އެއަށް މާބޮޑު ބަދަލެއް އައިސްފައި ނުވާ ކަމަށާއި، ކެމްޕޭންގެ މިސްރާބު ހުރީ ވަރަށް ރަނގަޅަށް ކަމަށެވެ. އަދި މަސައްކަތް ކުރެވެމުންދަނީ ޕްލޭނާ އެއްގޮތަށް ކަމުގައިވާތީ، އުއްމީދު ކުރިއަށްވުރެ މާބޮޑުވެއްޖެ ކަމަށް ރައީސް ވިދާޅުވިއެވެ.
