ގައުމީ ދުވަހުގެ ރަސްމީ ޖަލްސާ މިރޭ
ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ އިތުރުން އދގެ އާންމު މަޖިލީހުގެ 76 ވަނަ ދައުރުގެ ރައީސް އަބްދުﷲ ޝާހިދު ވާހަކަފުޅު ދައްކަވާނެ
ގައުމީ ދުވަސް ފާހަގަކުރުން
ގައުމީ ދުވަހުގެ ރަސްމީ ޖަލްސާ ބުދަ ދުވަހުގެ ރޭ 8:45 ގައި އޮންނާނެއެވެ.
މިޖަލްސާގައި ޝަރަފުވެރިކަމުގެ ގައުމީ އިނާމު ލިބިވަޑައިގަންނަވާ ބޭފުޅުންނަށް ޝަރަފުވެރިކަމުގެ އެވޯޑާއި އައްޑަނަ ދެއްވުމާއި ހިތްވަރު ދިނުމުގެ ގައުމީ އިނާމު ލިބިވަޑައިގަންނަވާ ބޭފުޅުންނަށް ހަނދާނީ ފިލާ އެރުވުން އޮންނާނެއެވެ. މީގެއިތުރުން މަތީ ދަރަޖަ ހޯއްދެވި ބޭފުޅުންނަށް ރައީސުލްޖުމްހޫރިއްޔާ މެޑަލް ދެއްވުމަށް ވަނީ ހަމަޖެހިފައެވެ. މީގެއިތުރުން ކީރިތިގުރުއާން ހިތުދަސް ކުރި ހާފިޒުންގެ ތެރެއިން 1 ވަނަ ދަރަޖައިގައި ފާސްވި ހާފިޒުންނަށް ރައީސުލްޖުމްހޫރިއްޔާ މެޑަލް ދެއްވާނެއެވެ. މީގެއިތުރުން ދިވެހި ދައުލަތުގެ އިއްޒަތް އެރުވޭ ބޭފުޅަކަށް އިއްޒަތް އެރުވުންވެސް އޮންނާނެއެވެ.
ކުރިން ހަމަޖެހިފައިވަނީ ޖުމްހޫރީ ދުވަހުގެ މުނާސަބަތުގައި ބާއްވަވާ ރަސްމީ ޖަލްސާގައި މަތީ ދަރަޖަ ހޯދާ ފަރާތްތަކަށް ރައީސް ދެއްވާ މެޑެއްޔާއި، ކީރިތި ގުރުއާން ހިތުދަސްކޮށް، 1 ވަނަ ދަރަޖައިގައި ފާސްވާ ހާފިޒުންނަށް ރައީސް މެޑަލް ދެއްވުމަށެވެ. އެހެންނަމަވެސް، ދިވެހި ދައުލަތަށް ޚިދުމަތް ކުރުމުގެ އިނާމު މި އަހަރު ލިބިވަޑައިގަންނަވާ ބޭފުޅުންގެ ޢަދަދު ގިނަކަމާއެކު، މަތީ ދަރަޖައިގެ އިނާމާއި ހާފިޒުކަމުގެ އިނާމު، ގައުމީ ދުވަހުގެ ރަސްމީ ޖަލްސާގައި ދެއްވުމަށް ނިންމެވީއެވެ. މިގޮތަށް ހަމަޖެއްސެވުމާ ގުޅިގެން، މި އަހަރުގެ ޖުމްހޫރީ ދުވަހުގެ ރަސްމީ ޖަލްސާގައި ދެއްވާނީ ހަމައެކަނި ދިވެހި ދައުލަތަށް ޚިދުމަތް ކުރުމުގެ އިނާމެވެ.
މިޖަލްސާގައި ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ އިތުރުން އދގެ އާންމު މަޖިލީހުގެ 76 ވަނަ ދައުރުގެ ރައީސް އަބްދުﷲ ޝާހިދުވެސް ވާހަކަފުޅު ދައްކަވާނެއެވެ.
ގައުމީ ދުވަހުގެ ގޮތުގައި ފާހަގަކުރަމުން އަންނަނީ ރަބީއުލްއައްވަލް މަހުގެ އެއް ވަނަ ދުވަހެވެ. އެއީ ދިވެހިން އެ ބަތަލެއްގެ ހަނދާން ފަޚުރުވެރިކަމާއެކު އާ ކުރަމުން އަންނަ އައްސުލްތާނުލް ޣާޒީ މުހައްމަދު ތަކުރުފާނުލް އައުޒަމް ދިވެހިރާއްޖެ ޕޯޗްގީޒުންގެ އަތްދަށުގައި 15 އަހަރާއި ހަ މަސް ދުވަސް ވަން ދެން އޮތުމަށް ފަހު މިނިވަން ކޮށްދެއްވި ދުވަހެވެ.
