އދ.ގެ އާންމު މަޖިލީހުގެ ރައީސްގެ ހައިސިއްޔަތުން އަބްދުﷲ ޝާހިދު ރާއްޖެއަށް ކުރައްވަމުން ގެންދަވާ ދަތުރުފުޅުގައި ރާއްޖޭގެ ތިން ބާރުގެ ވެރިންނާ ބައްދަލުކުރައްވައި މަޝްވަރާ ކުރައްވައިފިއެވެ.
ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ ދައުވަތަކަށް އދ.ގެ އާންމު މަޖިލީހުގެ ރައީސްގެ ހައިސިއްޔަތުން ޝާހިދު ރާއްޖެއަށް މިކުރައްވަނީ ތިން ދުވަހުގެ ދަތުރުފުޅެކެވެ.
މިދަތުރުފުޅުގައި ބުދަ ދުވަހުގެ ހެނދުނު ރައީސް ސާލިހާއެކު ރަސްމީ މަޝްވަރާތައް ވަނީ ކުރިއަށްގެންގޮސްފައެވެ. ރައީސް އޮފީހުގައި ބޭއްވި ބައްދަލުވުމުގައި ރައީސް ސާލިހު ވިދާޅުވީ އދ. އާ ރާއްޖެއާ ދެމެދު އޮންނަ ގުޅުން ބަދަހިކޮށް އިތުރު ހަރުފަތަކަށް ގެންގޮސް، ރާއްޖޭގެ ޚާރިޖީ ސިޔާސަތާއި ޑިމޮކްރެސީގެ ހަމަތަކާ އެއްކޮށް އިންސާނީ ހައްގުތަކަށް މަސައްކަތް ކުރުމަށް ޝާހިދާއެކު މަޝްވަރާ ކުރެވުނު ކަމަށެވެ.
ޝާހިދު ދެން ބައްދަލުކުރައްވާފައި ވަނީ މަޖިލީހުގެ ނާއިބުރައީސް އީވާ އަބްދުﷲއާ އެވެ. އެ ބައްދަލުވުމުގައި މަޖިލީހުގެ ބައެއް މެމްބަރުންވެސް ބައިވެރިވެވަަޑައިގެންފައިވެއެވެ. ޝާހިދު ވަނީ ޑިފެންސް މިނިސްޓަރު މާރިޔާ އަހްމަދު ދީދީގެ އިތުރުން ރާއްޖޭގެ އުއްތަމަ ފަނޑިޔާރު އަހުމަދު މުއްތަސިމް އަދުނާނާވެސް ބައްދަލުކުރައްވާ މަޝްވަރާކުރައްވާފައެވެ.
އާންމު މަޖިލީހުގެ ރައީސްކަމާ ޝާހިދު ހަވާލުވެވަޑައިގަތީ ސެޕްޓެމްބަރު 15 ވަނަ ދުވަހުއެވެ.
