އަހުސަން ބަޝީރުގެ މަރު: އަދަބު ކަނޑައެޅުމަށް ބޭއްވި އަޑުއެހުން ކެންސަލް
އަޑުއެހުން ތާވަލުކޮށްފައި އޮތީ ބުދަ ދުވަހުގެ މެންދުރު 1400އަށް
އަހުސަން ބަޝީރުގެ މަރުގެ މައްސަލައިގެ ޝަރީއަތް ހައިކޯޓުގައި ކުރިއަށް ގެންދަނީ
ސ. ހިތަދޫ ވަރުދީގޭ އަހުސަން ބަޝީރުގެ މަރުގެ މައްސަލައާ ގުޅިގެން ހައިކޯޓުގައި އިސްތިއުނާފު ކޮށްފައިވާ މައްސަލައިގެ އަޑުއެހުން ކެންސަލްވެއްޖެއެވެ.
މި މައްސަލައިގެ އަޑުއެހުން ތާވަލުކޮށްފައި އޮތީ ބުދަ ދުވަހުގެ މެންދުރު 14:00އަށެވެ. މި އަޑުއެހުމަކީ މި މައްސަލައިގެ އަދަބާ ބެހޭގޮޮތުން ވާހަކަ ދެއްކުމާއި އަދަބު ކަނޑައެޅުމަށް ބޭއްވި އަޑުއެހުމެކެވެ. އެގޮތުން މި މައްސަލައިގައި ދައުވާ އުފުލާފައިވާ މއ. ވީނަސްތަރި، ހަސަން ޝިމާޒް މުހައްމަދު ސުވާދުއާއި، ގ. ކޯޒީ އިބްރާހިމް ޝަހުމް އާދަމްގެ މައްޗަށް ކުށް ސާބިތުނުވާކަމަށް 2014 ވަނަ އަހަރު ކުރި މި ޙުކުމް އިސްތިއުނާފުކޮށް، ދާދި ފަހުން ހައިކޯޓުން ވަނީ އެމީހުންގެ މައްޗަށް ކުށް ސާބިތުވާކަމަށް ނިންމާފައެވެ.
އެ ދެމީހުންގެ މައްޗަށް ކުށް ސާބިތުވާކަމަށް ނިންމާފައިވަނީ މަރުމަތީގައި ބުނި ބަސް (ޑައިންގ ޑިކްލަރޭޝަން) އަށް ބިނާކޮށްގެންނެވެ. ވާރޗުއަލްކޮށް ކުރިއަށް ގެންދިޔަ މި އަޑުއެހުމުގައި އެ ދެމީހުންގެ މައްޗަށް ކުށް ސާބިތުވާކަމަށް ނިންމަވައި ފަނޑިޔާރު ވިދާޅުވީ، މަރުން ސަލާމަތްވާނެ ކަމުގެ އެއްވެސް އުއްމީދެއް ނެތް މީހަކު މަރު މަތީގައި ދައްކާ ވާހަކައަށް ގިނަ ޤައުމުތަކުގެ ކޯޓުތަކުން ރިއާޔަތް ކުރާ ކަމަށެވެ. އަދި އަހުސަން މަރުވުމުގެ ކުރިން ހޮސްޕިޓަލްގައި އޮވެގެން ބައެއް މީހުންގެ ގާތުގައި އޭނާ މަރާލާފައިވަނީ މި މައްސަލައިގައި ދައުވާލިބޭ 2 މީހުންކަމަށް ބުނެފައިވާކަން ފާހަގަކޮށްފައިވެއެވެ.
"މަރުގެ ތުންފަތްމަތީގައި އޮތް މީހަކު، ދޮގެއް ނުހަދާނެކަމަށް ބަޔާންކުރާ ޙާލަތަކީ މިފަދަ ޚާއްސަ ޙާލަތްތަކުގެ ތެރެއިން އެއް ޙާލަތް، ކޮމަންލޯގެ އުސޫލުތަކުގެ ތެރެއިން މަރުގެ ތުންފަތް މަތީގައި ވާ މީހާގެ ބަޔާން ހެކީގެ ތެރެއަށް ވަދެގެން އައީ ލެޓިންގެ ޤާއިދާއެއް ކަމަށްވާ (ދޮގެއްގެ މަތީގައި އިންސާނަކު އޭނާގެ ހެއްދެވި ފަރާތާއި ބައްދަލެއް ނުކުރާނޭ)،
މި މައްސަލައިގައި ކުށް ސާބިތުވެފައިވާ 2 މީހުންގެ ތެރެއިން ޝަހުމް މިހާރުވެސް ހުރީ މަރުގެ މައްސަލައެއްގެ ޙުކުމެއްގައެވެ. އަދި ޝިމާޒު އައްޑޫގައި ހުއްޓައި ހައްޔަރުކޮށް ކޯޓުގެ އަމުރާއި އެއްގޮތަށް ބަންދު ކޮށްފައިވާކަން ފުލުހުންގެ މީޑިއާ އޮފިޝަލު ވަނީ ރާއްޖެއެމްވީއަށް ކަށަވަރު ކޮށްދެއްވާފައެވެ.
މި މައްސަލައިގެ ކުށް ސާބިތުވާކަމަށް ނިންމާފައިވާއިރު، 10 ދުވަސް ތެރޭގައި މި މައްސަލައިގެ އަދަބު ކަނޑައަޅައި ސުޕްރީމް ކޯޓުގައި މި މައްސަލަ ނިންމަންޖެހެއެވެ.
