އުރުދުންގެ ރަސްގެފާނު އަބްދުﷲގެ އަމިއްލަފުޅު މުދާ ބޭރުގެ ގައުމުތަކުގައި ހުރުމަކީ ސިއްރުކަމެއް ނޫންކަމަށާއި އެކަން ހާމަކޮށްފައިނުވަނީ އަމިއްލަ އަދި ސަލާމަތީ ސަބަބުތަކަށްޓަކައި ކަމަށް އުރުދުންގެ ރަސްކަމުގެ ދަރުބާރުން ބުނެފިއެވެ.
ލީކުކޮށްލާފައިވާ ޕެންޑޯރާ ޕޭޕަރސްތަކުން ހާމަވެފައިވާ ގޮތުގައި ރަސްގެފާނު އަބްދުﷲގެ އޮފްޝޯރ އެކައުންޓްތަކުން 100 މިލިއަން އެމެރިކާ ޑޮލަރުުގެ ލަކްޒަރީ ގެ އެމެރިކާއިންނާއި އިނގިރޭސިވިލާތުން ވަނީ ބައްލަވައިގަނެފައެވެ.
ރަސްގެފާނުގެ އަމިއްލަފުޅު އެޕާޓްމަންޓާއި ގެ އެމެރިކާގެ އިތުރުން އިނގިރޭސިވިލާތުގައި ހުރުމަކީ ސިއްރުކަމެއްނޫން ކަމަށާއި އެއީ ކުރަންނުވާ އަދި އާދަޔާ ޚިލާފުކަމެއް ނޫންކަމަށް އެކަމާއި ގުޅިގެން އުރުދުންގެ ރަސްކަމުގެ ދަރުބާރުން ނެރުނު ބަޔާނުގައި ބުނެފައިވެއެވެ.
އަދި ރަސްގެފާނު މުދާ ބައްލަވައިގަނެފައިވަނީ އަމިއްލަފުޅު ފައިސާއިންކަމަށާއި އެކަމުގައި ސަރުކާރުގެ އަދި ފަންޑެއްގެ ފައިސާގައި ޖެހިފައިނުވާނެކަމަށް ބަޔާނުގައި ބުނެފައިވެއެވެ. އަދި މުދާ ބައެއް ފަހަރު ރަސްމީ ދަތުރުފުޅުގައި އަދި އަނެއް ބައި ފަހަރު އަމިއްލަ ދަތުރުފުޅުގައި ބޭނުންކުރައްވާކަމަށް ބަޔާނުގައި ބުނެފައިވެއެވެ.
ޕެންޑޯރާ ޕޭޕަރސްތަކުގައި ދުނިޔޭގެ އެތައް ލީޑަރުން މުއްސަނދިކަން ހޯދާފައިވާ ގޮތްތަކާގުޅޭ އެތައް ޑޮކިޔުމެންޓެއް ވަނީ ލީކުކޮށްލާފައެވެ.
