ދިއްގަރުގެ ޑީސީޖޭ ސްޕޯޓްސް އެކެޑަމީ އަލުން ފެށިގެން ކުރިއަށް

ކޮވިޑް-19 ގެ މެދުކެނޑުމަށްފަހު މ. ދިއްގަރުގައި ކުރިއަށްގެންދާ ޑީސީޖޭ ސްޕޯޓްސް އެކެޑަމީގެ ހަރަކާތްތައް އަލުން ފަށައިފިއެވެ.

ދިއްގަރަށް ނިސްބަތްވާ ޑީސީޖޭ ސްޕޯޓްސް ކުލަބުން އެ ރަށުގައި އެންމެ ފުރަތަމަ އެކެޑަމީ ފަށާފައިވަނީ މިދިޔަ އަހަރުގެ ޖެނުއަރީ މަހުގެ 17 ވަނަ ދުވަހެވެ. އެ ފަހަރު އެކެޑަމީ ފެށުމަށް ދިއްގަރުގައި ޚާއްސަ ރަސްމިއްޔާތެއް ބޭއްވިއިރު، އެ ރަސްމިއްޔާތު ޝަރަފުވެރިކޮށްދެއްވީ ސްޕޯޓްސް ކޮމިޝަނަރު ހީނާ އަޙްމަދު ސަލީމެވެ.

އެކަމަކު ކޮވިޑާ ގުޅިގެން މާ ގިނަ ދުވަސްތަކެއް ނުވެ އެކެޑަމީގެ ހަރަކާތްތައް މެދުކަނޑާލަން ޖެހުނެވެ. އެއަށްފަހު އަލުން އެ އެކެޑަމީގެ ހަރަކާތްތައް ފަށާފައިވަނީ އާދީއްތަ ދުވަހެވެ. "ރާއްޖެ.އެމްވީ" އަށް މައުލޫމާތުދެއްވަމުން ޑީސީޖޭ ސްޕޯޓްސް ކުލަބުގެ ޗެއާމަން އިސްމާޢީލް މާހިދު ވިދާޅުވީ މި ފަހަރު އެކެޑަމީގެ ހަރަކާތްތަކުގައި ޖުމްލަ 97 ކުދިން ބައިވެރިވަމުން އަންނަ ކަމަށެވެ. އަދި އެކެޑަމީގެ ހަރަކާތްތައް ކުރިއަށްދަނީ ހަތަރު އުމުރުފުރާއަކަށް ބަހާލައިގެން ކަމަށްވެސް ވިދާޅުވިއެވެ.

ދިއްގަރުގައި ކުރިއަށްދާ ޑީސީޖޭ ސްޕޯޓްސް އެކެޑަމީގައި އަދި ކުރިއަށް ގެންދިޔުމަށް ހަމަޖެހިފައިވަނީ ފިރިހެން ކުދިންނަށް ފުޓްބޯޅައިގެ ހަރަކާތްތަކެވެ. މި އެކެޑަމީގައި ޖުމްލަ ފަސް ކޯޗުން ހަރަކާތްތެރިވަމުން އަންނައިރު، ކުދިން ތަމްރީނުކުރުމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ޑީ ލައިސަންސް ސެޓްފިކެޓް ހާސިލުކޮށްފައިވާ ތިން ކޯޗުން ހަރަކާތްތެރިވަމުން އަންނަ ކަމަށް މާހިދު ވިދާޅުވިއެވެ.

ޑީސީޖޭ ސްޕޯޓްސް ކްލަބުން މައުލޫމާތުދޭ ގޮތުގައި ދިއްގަރުގައި ސްޕޯޓްސް އެކެޑަމީއެއް ކުރިއަށްގެންދިޔުމަށް ނިންމީ އެ ރަށުގައި ކުޅިވަރުން ރަނގަޅު ޖީލެއް ބިނާކުރުމާއެކު، އަޚުލާގު ރަނގަޅު ކުޅުންތެރިންތަކެއް އެންމެ މަތީ ފެންވަރުގައި ކުޅިވަރަށް ނެރުމަށް ކަމަށެވެ. މިއީ ދިއްގަރުގައި ކުޅިވަރަށް ޚާއްސަކޮށްގެން ކުރިއަށްގެންދާ މިފަދަ ފުރަތަމަ އެކެޑަމީއެވެ.