ރެއާލަށް މި ފަހަރުގެ ލީގުގެ ފުރަތަމަ ބަލި

ސްޕެނިޝް ލީގުގައި އާދީއްތަ ދުވަހުގެރޭ އެސްޕަންޔޯލް އަތުން ބަލިވެ, މި ފަހަރުގެ ލީގުގައި ފުރަތަމަ ފަހަރަށް މެޗަކުން ރެއާލް މެޑްރިޑް ބަލިވެއްޖެއެވެ.

ރަށުން ބޭރުގައި ކުޅުނު މެޗުން ރެއާލް ބަލިވީ 2-1 ގެ ނަތީޖާއަކުންނެވެ.

ފޯރިގަދަ ކުޅުމެއް ފެނިގެންދިޔަ މި މެޗުގެ 17 ވަނަ މިނެޓުގައި އެސްޕަންޔޯލުން ވަނީ ލީޑު ނަގާފައެވެ. އެޑްރިއާން އެމްބާބާ އޭރިއާ ތެރެއަށް ހުރަސްކޮށްދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ ރައުލް ޑެ ޓޯމާސްއެވެ. އަދި މެޗުގެ 60 ވަނަ މިނެޓުގައި އަލެކްސް ވިޑާލް ވަނީ އެސްޕަންޔޯލަށް ލީޑު ފުޅާކޮށްދީފައެވެ. އަދި އޭގެ ތިން މިނެޓު ފަހުން ސޮސިއެޑާޑުގެ ސާޖީ ޑާޑާއަށް ހުސް ފުރުސަތެއް ލިބުނު ނަމަވެސް، އޭނާ ފޮނުވާލި ހަމަލާ ދިޔައީ ގޯލުގެ އަރިމަތީ ދަނޑި ކައިރިން ބޭރަށެވެ.

މި މެޗުގެ 67 ވަނަ މިނެޓުގައި ކަރީމް ބެންޒެމާ ރެއާލަށް ލަނޑެއް ޖަހައިދިން ނަމަވެސް، އޭގެ ކުރިން އެ ޓީމުގެ ލޫކާ ޔޮވިޗް އޮފްސައިޑުގައި ހުރުމުން އެ ލަނޑު ބަލައިގެންފައެއް ނުވެއެވެ. އެކަމަކު އޭގެ ހަތަރު މިނެޓު ފަހުން ބެންޒެމާ ވަނީ އިތުރު ލަނޑެއް ޖަހައި، ރެއާލަށް ފަރަގު ކުޑަކޮށްދީފައެވެ. އަދި މެޗު ނިމެން ހަތަރު މިނެޓަށް ވެފައި ވަނިކޮށް ބެންޒެމާ ދިން ބޯޅައަކުން އެޑެން ހަޒާޑް ރެއާލަށް ލަނޑެއް ޖަހައިދިން ނަމަވެސް، ބެންޒެމާ އޮފްސައިޑުގައި ހުރުމުން އެ ލަނޑުވެސް ބަލައިގެންފައެއް ނުވެއެވެ.

މި ނަތީޖާއާއެކުވެސް ތާވަލުގެ އެއްވަނައިގައި އޮތީ ރެއާލެވެ. އެއްވަނައިގައި އޮތް ރެއާލާއި، ދެވަނައިގައި އޮތް އެންމެ ފަހުގެ ޗެމްޕިއަން އެތުލެޓިކޯ މެޑްރިޑާއި އަދި ތިންވަނައިގައި އޮތް ރެއާލް ސޮސިއެޑާޑަށް ކުޅުނު އަށް މެޗުން 17 ޕޮއިންޓް ލިބިފައިވާއިރު، ރެއާލަށް ކުރި ލިބެނީ ލަނޑުގެ ތަފާތުންނެވެ.