ފުވައްމުލަކު ހޮސްޕިޓަލުން ކުޑަ އަންހެން ކުއްޖެއްގެ ގަޔަށްޖެހި އިންޖެކްޝަނަކާ ގުޅިގެން ނިޔާވި ކަމުގެ ތުހުމަތު އާއިލާއިން ކޮށްފިއެވެ.

ނިޔާވެފައިވަނީ ފުވައްމުލަކުގެ ފުނާޑު އަވަށު، ނޫރީ ފެހި، ސާދާ ސަޢުދުﷲ އަޙުމަދެވެ.

އުމުރުން 6 އަހަރުގެ މި އަންހެން ކުއްޖާ ހޮސްޕިޓަލަށް ގެންގޮސްފައިވަނީ ހޮޑުލައި ވަރަށް ގަދައަށް ބަނޑުގައި ރިއްސާތީ އާދީއްތަ ދުވަހުގެ ހަވީރުގެ ވަގުތެއްގައެވެ.

އާއިލާއިން ބުނެފައިވަނީ އިންޖެކްޝަން ޖެހިފަހުން ކުއްޖާގެ ބަލީގެ ހާލަތު ގޯސްވެ، ކުއްޖާގެ ހަރަކާތް ހުއްޓުނު ކަމަށެވެ. ނިޔާވިއިރު، އެކަން ހޮސްޕިޓަލުން ފޮރުވަން މަސައްކަތް ކޮށްފައިވާ ކަމަށް ވެސް އާއިލާއިން ބުނެއެވެ.

އާއިލާގެ މިތުހުމަތުތަކާ ގުޅިގެން ފުވައްމުލަކު ހޮސްޕިޓަލްގެ މެނޭޖަރު މުޙައްމަދު ޟިރާރު ވިދާޅުވީ އާއިލާއިން އެފަދަ ތުހުމަތެއް ކުރާނަމަ ހެލްތު މިނިސްޓްރީގެ ސަމާލުކަމަށް އެކަން ގެނެސް އެމައްސަލަ ތަހުގީގު ކުރާނެ ކަމަށެވެ. އިހުމާލެއްވާނަ އަދި އެކަން ހިނގާފައިވާނަމަ ފިޔަވަޅު އަޅާނެ ކަމަށް އޭނާ ވިދާޅުވިއެވެ.

މިހިތާމައިގައި ބައިވެރިވާކަން ފާހަގަކުރައްވައި އޭނާ ވިދާޅުވީ ކުއްޖާ ހޮސްޕިޓަލްގައި އެޑްމިޓް ކުރި ހިސާބުން ފަރުވާ ފަށާފައިވާ ކަމަށެވެ. އަދި ނުބައި އިންޖަކްޝަނެއް ޖަހާނެ ކަމަށް އުންމީދު ނުކުރާ ކަމަށެވެ.

މައުލޫމާތު ލިބޭ ގޮތުގައި މިކުއްޖާ ނިޔާވެފައިވަނީ އާދީއްތަ ދުވަހުގެ ރޭ 7:30ހާއިރެވެ.