ދީމާ އާއި ރަފާގެ ޕެއާއިން ލަންކާގެ އެއްވަނަ ޕެއާ ބަލިކޮށްފި

ގަތަރުގެ ވެރިރަށް ދޯހާގައި ކުރިއަށްދާ އޭޝިއަން ޓޭބަލް ޓެނިސް ޗެމްޕިއަންޝިޕުގެ އަންހެން ޑަބަލްސް އިވެންޓުގައި ރާއްޖޭގެ ފާތިމަތު ދީމާ އަލީ އާއި އައިޝަތު ރަފާ ނާޒިމުގެ ޕެއާއިން މި ސަރަހައްދުގެ ގަދަބާރު ސްރީ ލަންކާގެ އެއްވަނަ ޕެއާ ބަލިކޮށްފިއެވެ.

ލަންކާގެ ރޭންކިންގެ އެއްވަނައިގައި އޮތް އިޝާރާ މަދުރަންގީ އާއި ރޭންކިންގެ ހަތަރުވަނައިގައި އޮތް ބިމާންދީ ބަންޑާރަ ހިމެނޭ ޕެއާގެ މައްޗަށް ދީމާ އާއި ރަފާގެ ޕެއާ ކުރިހޯދީ ސީދާ ތިން ސެޓުންނެވެ. މެޗުގެ ސެޓުތައް ދިޔައީ 11-8، 11-6 އަދި 12-10 އިންނެވެ.

ލަންކާގެ ޕެއާ ބަލިކޮށް އޭޝިއާ މުބާރާތުގެ ދެވަނަ ބުރަށް ދީމާ އާއި ރަފާގެ ޕެއާ ދަތުރުކުރި ނަމަވެސް، ދެވަނަ ބުރުގައި އެ ޕެއާ ކުޅެން ޖެހުނީ ހޮންކޮންގްގެ އުމުރުން ދޮށީ ދެ ކުޅުންތެރިން ކަމަށްވާ، ޒީހޫ ޗެންޗޫ އާއޮ އެން ވިންގް ނާމުގެ ޕެއާއާ ދެކޮޅަށެވެ. އެ މެޗުން ހޮންކޮންގެ ޕެއާ މޮޅުވީ ސީދާ ތިން ސެޓުންނެވެ.

މި މަހުގެ ފަސްވަނަ ދުވަހުގެ ނިޔަލަށް ކުރިއަށްދާ މި މުބާރާތުގައި ރާއްޖޭގެ ގައުމީ ޓޭބަލް ޓެނިސް ޓީމު ވާދަކުރަމުން އަންނައިރު، އަންހެން ޓީމުން މީގެ ކުރިން ވަނީ ޓީމު އިވެންޓް ބައިގައި ގަތަރާއި ބަންގްލަދޭޝް ބަލިކޮށްފައެވެ. އެގޮތުން ގަތަރުގެ މައްޗަށް ރާއްޖޭގެ އަންހެން ޓީމުން ކުރިހޯދީ 3-1 އިންނެވެ. އަދި ބަންގްލަދޭޝް އަތުން ރާއްޖޭގެ އަންހެން ޓީމު މޮޅުވީ ފަސޭހަކަމާއެކު 3-0 އިންނެވެ.

މި އަހަރުގެ އޭޝިއާ މުބާރާތުގައި ރާއްޖޭގެ ޓީޓީ ޓީމުން ވާދަކުރަމުން އަންނައިރު، މި މުބާރާތުގެ އަމާޒަކީ ދެކުނު އެފްރިކާގައި މި އަހަރު ބޭއްވުމަށް ހަމަޖެހިފައިވާ ޓީމް ވޯލްޑް ޓޭބަލް ޓެނިސް ޗެމްޕިއަންޝިޕަށް ކޮލިފައިވުން ކަމަށް ޓޭބަލް ޓެނިސް އެސޯސިއޭޝަން އޮފް މޯލްޑިވްސް (އެފްއޭއެމް) އިން މައުލޫމާތުދެއެވެ.

މި ފަހަރުގެ އޭޝިއާ މުބާރާތުގައި ރާއްޖޭގެ ޓީޓީ ޓީމު ވާދަކުރާއިރު، މިއީ ކޮވިޑް-19 ގެ މެދުކެނޑުމަށްފަހު ބައިނަލްއަގުވާމީ މުބާރާތެއްގައި ގައުމީ ޓީޓީ ޓީމު ވާދަކުރާ ފުރަތަމަ ފަހަރެވެ. މި މުބާރާތުގައި ރާއްޖޭގެ ޓީމަށް އިރުޝާދުދެމުން އަންނަނީ މި އަހަރުގެ މާޗު މަހުގެ ތެރޭގައި ގައުމީ ޓީޓީ ޓީމުގެ ކޯޗަކަށް ހަމަޖެއްސި ގްރީސްގެ ކޮންސްޓަންޓީނޯސް ކޮސްޓޮޕޮލޮސްއެވެ.