އިޓަލީގައި ކުރިއަށް ދިޔަ މުބާރާތަކުން ރާއްޖޭގެ ލަތީފް އެއް ވަނަ ހޯދައިފި

އިޓަލީގައި ކުރިއަށް ގެންދިޔަ ޓޭބަލް ޓެނިސް (ޓީޓީ) ވެޓަރަންސް މުބާރާތެއްގައި ވާދަކޮށް، ރާއްޖޭގެ އަޙުމަދު ލަތީފް 70 އަހަރުން މަތީގެ ކެޓަގަރީގެ އެއް ވަނަ ހޯދައިފި އެވެ.

ލަތީފް ވާދަކޮށްފައި ވަނީ އިޓަލީގެ ސާޑިނިއާގައި ކުރިއަށް ގެންދިޔަ، ވަނަ ސާޑިނިއާ ވެޓަރަންސް އިންޓަނޭޝަލް މުބާރާތުގަ އެވެ.

70 އަހަރުން މަތީގެ ކެޓަގަރީގެ ފައިނަލްގައި ލަތީފް ވާދަކޮށްފައި ވަނީ އިޓަލީގެ ރޮމާންޔޯލީ އުގޯއާއާ ދެކޮޅަށެވެ. އެ މެޗު ލަޠީފް ކާމިޔާބު ކޮށްފައި ވަނީ ތިން ސެޓުންނެވެ.

އެގޮތުން މެޗުގެ ފުރަތަމަ ސެޓު ލަތީފް ކާމިޔާބު ކުރީ 11-2 އިންނެވެ. އަދި ލަތީފް ވަނީ ދެ ވަނަ ސެޓު 14-12 އިން ކާމިޔާބު ކޮށްފަ އެވެ. މެޗުގެ ތިން ވަނަ ސެޓު ލަތީފް ކާމިޔާބު ކޮށްފައި ވަނީ 22-20 އިންނެވެ.

ލަތީފް އަކީ ސާޑިނިއާ ވެޓަރަންސް އިންޓަނޭޝަލް މުބާރާތުގައި ވާދަ ކުރި ފުރަތަމަ ދިވެއްސެވެ. އަދި އެ މުބާރާތުން ވަނައެއް ނުވަތަ ތައްޓެއް ވެސް ހޯދި ފުރަތަމަ ދިވެއްެސެވެ.

މި މުބާރާތުގެ ޑަބަލްސް އިވެންޓުގައި ވެސް ލަތީފް ވަނީ ވާދަކޮށްފަ އެވެ. ޑަބަލްސް އިވެންޓުގައި ލަތީފްގެ ޕެއާ ޕާޓްނަރަކީ ޖަރުމަނުގެ ފްރޭންކް ގުންޓާ އެވެ. ޑަބަލްސް އިވެންޓުގެ ފައިނަލްގައި ލަތީފް އަދި ގުންޓާގެ ޕެއާ ވާދަކުރިއިރު، ފައިނަލް އިން ބަލިވެ ލިބުނީ ދެ ވަނަ އެވެ.

ލަތީފް އަކީ ރާއްޖޭގެ ޓީޓީ އެސޯސިއޭޝަންގެ ކުރީގެ ރައީސް އެވެ. އަދި އޭނާ އަކީ ނިމުނު ރައީސް އިބްރާހީމް މުޙައްމަދު ޞާލިޙުގެ ސަރުކާރުގެ ފޮރިން ސެކްރެޓަރީގެ މަޤާމު ވެސް އަދާ ކުރެއްވި ފަރާތެވެ.

ލަތީފް އޭނާގެ ފޭސްބުކްގައި ކޮށްފައިވާ ޕޯސްޓެއްގައި ބުނެފައި ވަނީ މި ކާމިޔާބަށް ވަރަށް އުފާވާ ކަމަށެވެ. އަދި ދެން ތައްޔާރުވާނީ މިއަހަރުގެ އޮގަސްޓު 19 އިން 25 އަށް ތޮއްޑޫގައި އޮންނަ، ތޮއްޑޫ މާސްޓާސް ޓޭބަލް ޓެނިސް މުބާާރާތަށް ކަމަށް ވެސް އޭނާ ވަނީ ބުނެފަ އެވެ.