ކުދި ކުށް ކުރާ މީހުންނަށް ޖަލު ނޫން އަދަބު ދިނުމުގެ ނިޒާމު މިހާރު ވަނީ އަތުރާލެވިފައި: ކޮމިޝަނަރ އޮފް ޕްރިޒަންސް
ކަރެކްޝަންސްއިން މަސައްކަތްކުރަމުންދަނީ އެކަން ތަންފީޒު ކުރެވޭނެ ގޮތްތަކެއް ހަމަޖައްސަން
ކޮމިޝަނަރ އޮފް ޕްރިޒަންސް އަހުމަދު މުހައްމަދުފުޅު
ކުދި ކުދި ކުށްތަކަށް އަރައިގަންނަ މީހުންނަށް ޖަލު އަދަބު ނޫން އަދަބެއް ދީގެން އެމީހުން ފަރާތުން އޭގެ ބަދަލު ހޯދުމުގެ ނިޒާމު މިހާރު އެކުލަވާލެވިފައިވާކަމަށް ކޮމިޝަނަރ އޮފް ޕްރިޒަންސް އަހުމަދު މުހައްމަދުފުޅު ވިދާޅުވެއްޖެއެވެ.
ސީޕީ މިފަދައިން ވިދާޅުވީ ބައިނަލްއަގުވާމީ އަހިންސާ ދުވަހާއި ގުޅުވައިގެން ހޯމް މިނިސްޓްރީގެ ފަރާތުން ކުރިއަށްގެންދިޔަ ޕެނަލް ޑިސްކަޝަންއެއްގައި ބައިވެރިވެވަޑައިގެން ވާހަކަދައްކަވަމުންނެވެ.
ސީޕީ އަހުމަދު މުހައްމަދުފުޅު ވިދާޅުވީ ދިވެހިރާއްޖޭގެ ގާނޫނުއަސާސީ އެކުލަވާލެވިފައިވާގޮތުން ކިތަންމެ ކުޑަ ކުށެއް ކުރާ މީހާއަށްވެސް އަދަބެއްގެ ގޮތުގައި ކަނޑައަޅާފައިވަނީ ޖަލު ހުކުމް ކަމަށެވެ. ހުއްދަ ނެތް ތަނަކަށް ވަދެގެން ވިޔަސް އަދަބެއްގެ ގޮތުގައި ކަނޑައަޅާފައި އޮންނަނީ ޖަލަށް ލުން ކަމަށް ވިދާޅުވިއެވެ.
އެހެންނަމަވެސް މިފަދަ ކުށްތަކުގައި ޖަލަށް ލައި އަދަބު ދިނުން ނޫން އެހެން އަދަބުތައް ދީ، އޭގެ ބަދަލު ހޯދުމަކީ އެހެން ގައުމުތަކުގައިވެސް ކުރާ ކަމެއް ކަމަށް ސީޕީ ވިދާޅުވިއެވެ. ގިނަ ފަހަރަށް އެ ބަދަލު ހޯދަނީ މުޖުތަމައުގައި ބަހައްޓައިގެން އެމީހުންގެ ކަންކަން މޮނިޓަރ ކޮށްގެންނާއި، ގޭ ބަންދުކޮށްގެން ކަމަށް ވިދާޅުވިއެވެ.
ދިވެހިރާއްޖެއިންވެސް މިހާރު ދަނީ މި ނިޒާމާ ދިމާލަށް ކަމަށް ސީޕީ ވިދާޅުވިއެވެ. އެކަމަށްޓަކައި ސުޕްރީމް ކޯޓުން ވަރަށް ޚާއްސަ މަސައްކަތްތަކެއް ކޮށްފައިވާކަމަށާއި، މިފަދަ ކުށްތަކުގައި ޖަލު ނޫން އަދަބެއް ދެވޭނެ އިޖުރާއަތެއް ކަނޑައަޅާފައިވާ ކަމަށް ސީޕީ އަހުމަދު މުހައްމަދުފުޅު ވިދާޅުވިއެވެ. މި ނިޒާމު މިހާރު އޮތީ އެތުރިފައިކަމަށާއި، ކަރެކްޝަންސް ސަރވިސްއިން މަސައްކަތްކުރަނީ އެކަން ތަންފީޒު ކުރެވޭނެ ގޮތްތަކެއް ހަމަޖެއްސުމަށް ކަމަށް ވިދާޅުވިއެވެ.
ސީޕީ ވިދާޅުވީ ގާތްގަނޑަކަށް 100 އެއްހާ މީހުން މިހާރުވެސް އެއް އަހަރަށް ވުރެ ކުރު މުއްދަތަށް ޖަލަށް ލާފައި އެބަތިބި ކަމަށެވެ. މި ނިޒާމަށް އަމަލުކުރަން ފެށުނީމަ މިފަދަ ކުދި ކުށް ކުރާ މީހުންނަށް ޖަލު ނޫން އަދަބު ދެވި، އެމީހުން ހެޔޮ ގޮތުގައި މުޖުތަމައަށް އަނބުރާ ގެނެވޭނެ ކަމަށް ސީޕީ ވިދާޅުވިއެވެ.
ސީޕީ އިތުރަށް ވިދާޅުވީ ރާއްޖޭގައި އަދަބު ދިނުމުގެ ތެރޭގައި ވަރަށް އަނިޔާވެރި އަދަބުތައް ދީފައިވާކަން ފެންނަ އެބަ އޮތް ކަމަށެވެ. މިކަމުގެ ނޭދެވޭ އަސަރު މުޖުތަމައުގެ ތެރެއިން އަދިވެސް ރަނގަޅަށް ފިލައި ނުދާކަމަށް ވިދާޅުވިއެވެ.
މިގޮތުން ފެހި ގާނޫނު އަސާސީ ވުޖޫދުވުމާއެކު އެއިން ކަށަވަރުކޮށްދިން އެއް ކަމަކީ މީހަކަށް އަނިޔާ ކޮށްގެން ކަމެއް ރަނގަޅު ނުވާނެކަން ކަމަށް ސީޕީ ވިދާޅުވިއެވެ. ގާނޫނީ އޮނިގަނޑުގެ ތެރެއިން މިފަދަ މީހުންނަށް ދެވޭނެ އަދަބުތަކާއި، އެޅޭނެ ފިޔަވަޅުތައް އެބަހުރި ކަމަށެވެ.
