"ޖަލުތަކަށް އެކަށީގެންވާ ބަދަލުތަކެއް އައިސްފައިވާކަން ރައީސް ޔާމީނުވެސް ގަބޫލު ކުރެއްވި"

ޖަލުތަކުގެ ހާލަތު ރަނގަޅު ކުރުމަށް މި ސަރުކާރުން ކުރަމުންދާ މަސައްކަތްތަކުގެ ދަށުން ހެޔޮ ބަދަލުތަކެއް ގެނެވިފައިވާކަން ކުރީގެ ރައީސް އަބްދުﷲ ޔާމީނުވެސް ގަބޫލު ކުރައްވާކަމަށް ހޯމް މިނިސްޓަރ ޝެއިޚް އިމްރާން އަބްދުﷲ ވިދާޅުވެއްޖެއެވެ.

ޕީއެސްއެމްއަށް ދެއްވި އިންޓަރވިއުއެއްގައި ޖަލުތަކުގެ ހާލަތާއި ގުޅޭގޮތުން ވާހަކަ ދައްކަވަމުން މިނިސްޓަރ ވިދާޅުވީ، ވަޒީރުކަމުގެ މަގާމާއި ހަވާލުވެވަޑައިގެންނެވި މައިގަނޑު ސަބަބަކީވެސް ޖަލުތަކުގެ ހާލަތު ރަނގަޅު ކުރެއްވުން ކަމަށެވެ. ޖަލުތަކުގައި 2000 އެއްހާ ގައިދީން އަބަދުވެސް އުޅެމުންދާއިރު، އެކަމުގެ ސަބަބުން މުޖުތަމައަށް ކުރާ އަސަރު ބޮޑުކަން މިނިސްޓަރ ފާހަގަ ކުރެއްވިއެވެ.

މިނިސްޓަރ ވިދާޅުވީ، ޖަލުގައި ހޭދަކުރެއްވި މުއްދަތުގައިވެސް ޖަލުގައި ހުރި މައްސަލަތައް ވަރަށް ބޮޑަށް ފަހުމުވެވަޑައިގެންނެވި ކަމަށެވެ. އެ ހާލަތަށް ބަދަލެއް ގެނައުމުގެ ވަރުގަދަ އަޒުމެއް މަގާމާއި ޙަވާލުވެވަޑައިގެންނެވިއިރުވެސް އޮތްކަން ފާހަގަ ކުރައްވައި މިނިސްޓަރ ވިދާޅުވީ، މިހާރުވެސް އެދެވޭ ބަދަލުތައް ގެނެވިފައިވާ ކަމަށެވެ. ނަމަވެސް އަދިވެސް ގެންނަންޖެހޭ ބޮޑެތި ބަދަލުތައް އެބަހުރިކަމަށް ވިދާޅުވިއެވެ.

މިނިސްޓަރ ވިދާޅުވީ ޖަލުގައި ހުކުމް ތަންފީޒު ކުރައްވަމުން ގެންދަވާ ކުރީގެ ރައީސް އަބްދުﷲ ޔާމީނާ ބައްދަލު ކުރެއްވި ދުވަހުވެސް އެ ވާހަކަތައް ހިއްސާ ކުރެއްވި ކަމަށެވެ. އެގޮތުން ޔާމީނުގެ ވެރިކަމުގެ 5 އަހަރުގެ ތެރޭގައި ނުގެނެވުނު ބޮޑެތި ބަދަލުތައް ގެނެވިފައިވާކަން ޔާމީނު އަރިހުގައި ދެންނެވުމުން، އެއީ ޖަލުގައި ހޭދަ ކުރެއްވުމުން ޖަލުގެ ހާލަތު އެނގިވަޑައިގަތުމުގެ ސަބަބުން ގެންނެވުނު ބަދަލުތަކެއްކަމަށް ޔާމީނު ވިދާޅުވިކަން މިނިސްޓަރ ފާހަގަ ކުރެއްވިއެވެ. އަދި ރައީސް ޔާމީނަށްވެސް ޖަލުގައި ދުވަސްތަކެއް ހޭދަކުރެއްވުމަށްފަހު ދެން އެ ބަދަލުތައް ގެންނަވަން އެނގިވަޑައިގަންނަވާނެކަމަށް އަމިއްލަފުޅަށް ވިދާޅުވިކަން މިނިސްޓަރ އިމްރާން ފާހަގަ ކުރެއްވިއެވެ.

އޭގެ އިތުރުން، ޖަލުތަކަށް އެކަށީގެންވާ ބަދަލުތަކެއް އައިސްފައިވާކަން ޚުދު ރައީސް ޔާމީނުވެސް ގަބޫލު ކުރެއްވިކަމަށް މިނިސްޓަރ އިމްރާން ވިދާޅުވިއެވެ.

މިނިސްޓަރ ވަނީ ޖަލުތަކުގެ ހާލަތު ރަނގަޅު ކުރެއްވުމަށް ވެވަޑައިގެންނެވި ވައުދުފުޅު ފުއްދަވާނެކަމުގެ ޔަގީންކަންވެސް ދެއްވާފައެވެ. އެކަމަކީ ގިނަ ހޭދަތަކެއް ކުރަންޖެހޭ އަދި، ގިނަ ބައެއްގެ އެއްބާރުލުން ބޭނުންވާނެ ކަމެއްކަމަށްވެސް މިނިސްޓަރ ވިދާޅުވިއެވެ. މި ސަރުކާރު ވުޖޫދަށް އައުމަށް ފަހު ޖަލުގެ ހާލަތު ރަނގަޅު ކުރުމަށް ގިނަ މަސައްކަތްތަކެއް ކުރަމުން ގެންދާއިރު، ޖަލުތަކުގެ ޖާގަ އިތުރުކޮށް ކުރިން ޖަލުގެ ހާލާތު ހުރި ވަރަށްވުރެ ރަނގަޅު ކުރުމަށް ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ.

މި ސަރުކާރުން ޖަލުތަކުގެ ހާލަތު ބެލުމަށްފަހު ޖަލު އޮޑިޓް ރިޕޯޓެއް ނެރެފައިވެއެވެ. ޖަލުތަކުގައި މީހުން ބޭތިއްބުމަށް ކަނޑައަޅާފައިވާ އަދަދަށް ވުރެ އިތުރަށް މީހުން ބަންދުގައި ބޭތިއްބުމާއި، އިންސާނީ އަދި އެހެނިހެން ވަސީލަތްތައް އެކަށީގެންވާ ވަރަށް ނެތުމުގެ މައްސަލަ ރިޕޯޓުގައި ފާހަގަކޮށްފައިވެއެވެ.