މިހާރު އޮތް ގޮތަށް ހެއްކާ ބެހޭ ބިލް ފާސްވެއްޖެނަމަ މީޑިއާތަކަށް ކޮޅަށް ނުތެދުވެވޭނެ: ވަކީލު ނިޝާން
ބިލު މިހާރު އޮތް ގޮތަށް ފާސްވެއްޖަނަމަ މިމައްސަލައާގެން ކޯޓަށް ދާނަން
ގާނޫނީ ވަކީލު މުހައްމަދު ނިޝާން އިބްރާހިމް،
މިހާރު އޮތް ގޮތަށް ހެއްކާ ބެހޭ ބިލް ފާސްވެއްޖެނަމަ މީޑިއާތަކަށް ކޮޅަށް ނުތެދުވެވޭނެ ކަމަށް މަޝްހޫރު ގާނޫނީ ވަކީލު މުހައްމަދު ނިޝާން އިބްރާހީމް ވިދާޅުވެއްޖެއެވެ.
ހެއްކާ ބެހޭ ބިލާ ގުޅޭގޮތުން ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަދައްކަވަމުން ނިޝާން ވިދާޅުވީ މިބިލު މިހާރު އޮތް ގޮތަށް ފާސްވެއްޖަނަމަ މިމައްސަލައާގެން ކޯޓަށް ދާނެ ކަމަށެވެ. އަދި ދުސްތޫރީ މައްސަލައެއްގެ ގޮތުގައި މިމާއްދާ ބާތިލް ކުރުމަށް ހުށަހަޅާނެ ކަމަށާއި، ގާނޫނާ ޚިލާފު މާއްދާއެއްކަމުން ބާތިލް ވެސް ކުރެވޭނެ ކަމަށް ނިޝާން ވިދާޅުވިއެވެ.
ނިޝާން ވިދާޅުވީ ހެއްކާ ބެހޭ ގާނޫނުގެ 136 ވަނަ މާއްދާ އެގޮތަށް ފާސްވެއްޖެނަމަ ހާލަތު ބަދަލުވެ، މީޑީއާތަކަށް ކޮޅަށް ނުތެދުވެވޭނެ ކަމަށާއި، އަދަބުތަކާއި ކުރިމަތިލާން ޖެހި ރަނގަޅު މައުލޫމާތާއެކު ޚަބަރުތައް ނުގެނެސްދެވި، ވާނުވާ ނޭނގޭ ހިސާބަށް ކަންކަންދާނެ ކަމަށެވެ.
ނިޝާން ވިދާޅުވީ ހެއްކާ ބެހޭ ބިލަށް މީޑިއާތައް ވެއްދުމަކީ ގާނޫނީ ގޮތުން ފިއްތާލުމަށް ކުރެވޭ މަސައްކަތެއް ކަމަށެވެ. އެގޮތުން ގާނޫނުގައި ބަޔާން ކުރާ ގޮތަށް މާއްދާތައް ގާނޫނީ އިމުގެ ތެރެއިން ވެއްދުމަށްފަހު ގާނޫނުގައި ބަޔާންކުރާ ގޮތަށް އެބަޔަކު އެ އޮންނަ އުސޫލުން ކަންކަން ކުރަން ފަސޭހަ ކުރުމަށްޓަކައި ގާނޫނެއް ގެނެސްގެން އެބަޔަކަށް ފިޔަވަޅު އަޅާނެ ކަމަށް ނިޝާން ވިދާޅުވިއެވެ.
ނިޝާން ވިދާޅުވީ ހެއްކާ ބެހޭ ގާނޫނުގެ ތެރެއަށް މީޑިއާތަކާ ބެހޭ ކަންކަން ގެންނަން ނުޖެހޭ ކަމަށާއި، މީޑިއާތަކަކީ ވަކި މުސްތަގިއްލު ބައެއް ކަމަށެވެ. މީޑީއާތަކަކީ ވަކި ގާނޫނަކުން އިސްތިސްނާ ކުރެވިފައިވާ ބައެއް ކަމަށްވާއިރު، ހެއްކާ ބެހޭ ގާނޫނަށް މާއްދާއެއް އިތުރުކޮށް މަސްދަރު ހޯދަން ތެދުވުމަކީ ގާނޫނު އަސާސީއަށް އަރައިގަތުން ކަމަށް ނިޝާން ވިދާޅުވިއެވެ. އަދި އެމާއްދާ އެގޮތަށް ހިމާނާފައި އޮތުމުން އެކަން ކުއްވެރިކުރާ ކަމަށާއި، އެމާއްދާ އަނބުރާ ގެންދިއުމަށް ދައުލަތުން ނިންމި ނިންމުމަށް ސެލިއުޓް ކުރާ ކަމަށް ނިޝާން ވިދާޅުވިއެވެ.
ހެއްކާ ބެހޭ ބިލުގެ 136ވަނަ މާއްދާގެ (ށ)ގައި ބުނެފައިވަނީ، މައްސަލައެއްގެ ޚަސްމަކު ހުށަހަޅާ ހުށަހެޅުމެއްގެ މައްޗަށް ބިނާކޮށް، ޝަރީއަތުން ފައިސަލާކޮށްގޮތެއް ކަނޑައަޅަންޖެހޭ ކަންކަމުގެ މައްޗަށް ރިޢާޔަތްކުރާއިރު، ނޫސްވެރިޔާއަށް މައުލޫމާތު ދިން މީހާއަކީ ކާކުކަން ހާމަކުރުމުގައިއޮތް އާންމު މަސްލަހަތު ބޮޑުކަމުގައި ޝަރީއަތަށް ބުރަވެވޭނަމަ، ނޫސްވެރިޔާއަށް މައުލޫމާތު ދިން މަސްދަރު ޝަރީއަތަށް ހާމަކުރުމަށް ނޫސްވެރިޔާގެ މައްޗަށް ނުވަތަ އޭނާ ވަޒީފާ އަދާކުރާ ތަނުގެ މައްޗަށް މަޖުބޫރުކުރެވިދާނެ ކަމަށެވެ.
