ގޯއްޗާއި، ފްލެޓު ދޫކުރުމުގައި މި ސަރުކާރުން މިހާތަނަށް 16 ފަހަރަށް ސްޓޭންޑް ބަދަލުކޮށްފައިވޭ: ނިޝާން
ގޯއްޗާއި ފްލެޓު ދޫކުރުމުގައި މިސަރުކާރުން ގާނޫނީ ހީލަތް ހަދަމުންދޭ
އެމްޑީޕީގެ ނޫސްވެރިންގެ ބައްދަލުވުމުގައި ގާނޫނީ ވަކީލު މުހައްމަދު ނިޝާން އިބްރާހިމް ވާހަކަދައްކަވަނީ
ކުރީ ސަރުކާރުގައި ދޫކޮށްފައިވާ ގޯއްޗާއި، ފްލެޓު ދޫކުރުމުގައި މި ސަރުކާރުން މިހާތަނަށް 16 ފަހަރަށް ސްޓޭންޑް ބަދަލުކޮށްފައިވާ ކަމަށް ގާނޫނީ ވަކީލު މުހައްމަދު ނިޝާން އިބްރާހިމް ވިދާޅުވެއްޖެ އެވެ.
ބުރާސްފަތި ދުވަހު އެމްޑީޕީގެ ބޯހިޔާވަހިކަމާ ގުޅޭ ކޮމެޓީން ބޭއްވި ނޫސްވެރިންގެ ބައްދަލުވުމުގައި ނިޝާން ވިދާޅުވީ ކުރީ ސަރުކާރުގައި ދޫކޮށްފައިވާ ގޯއްޗާއި، ފްލެޓުތައް ދޫނުކޮށް އަހަރަކަށްވުރެ ގިނަ ދުވަހު މިސަރުކާރުން ޕާކުކޮށްފައިވާ ކަމަށާއި، ފްލެޓުތައް ދޫކުރުމުގެ މަސައްކަތް ފަށާފައިވަނީ ވެސް ރައްޔިތުންގެ ޝަކުވާ އިންތިހާއަށް ބޮޑުވުމުން ކަމަށެވެ.
ގޯއްޗާއި ފްލެޓު ދޫކުރުމުގައި މިސަރުކާރުގެ ސްޓޭންޑް ވެސް 16 ފަހަރު ބަދަލުވެފައިވާކަން ފާހަގަކުރައްވައި ނިޝާން ވިދާޅުވީ އެކަން ލިޔެކިއުންތަކުން ހާމަވާ ކަމަށެވެ. މިއީ ވަރަށް ރީތިކޮށް އެމްޑީޕީ ސަރުކާރުން ލިޔެފައި އޮތް އިޖުރާއަތަކުން ކުރިއަށް ގެންދިޔަ މަސައްކަތެއް ނަމަވެސް މިސަރުކާރުން ގާނޫނީ ހީލަތް ހަދަމުންދާ ކަމަށެވެ.
ދެން ފްލެޓުގެ ކަންތައްތައް ހުއްޓުވައި އެގްރިމެންޓްތައް ބާތިލްކޮށް ރަޖިސްޓްރީ ބާތިލް ކުރަން މި ބޭފުޅުން ބޭނުންކުރީ ގާނޫނީ ހީލަތް އެނގޭތޯ. ގާނޫނީ ހީލާތުގައި އަމަލުކުރި އުސޫލަކީ ކޮބައިތޯ. އެބޭފުޅުން ބޭނުން ކުރި ހަމައަކީ ބިންތަކުގެ ރަޖިސްޓްރީ ބޭނުންކުރި ހަމައަކީ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގައި އެމްޑީޕީ ސަރުކާރުން ގެނެސްފައިވާ އިސްލާހެއްގައި ބުނެފައި އޮންނާނެ ލޭންޑް ޔޫސް ޕްލޭން ހަދަން. އެރަށެއް ތަރައްގީ ކުރުމަށްޓަކައި އުސޫލުތައް ހިނގާނެ ގޮތުގެ ޕްލޭނެއް އެކުލަވާލައި ފާސްކުރަން އޮންނާނެ ގާނޫނުގައި ލިޔެފައި. މީގައި ހިފައިގެން ގިރާވަރުފަޅާއި، ފޭސް-2 ގޭ ލޭންޑް ޔޫސް ޕްލޭނަށް ބަދަލު ގެނެސް އޭރު ދީފައި ހުރި ގޯތިތަކަކީ ދިރިއުޅުމުގެ ސަރަހައްދުތައް ނޫން ކަމަށް ކަނޑައަޅައި އެތަންތަން ބާތިލް ކުރީ.ގާނޫނީ ވަކީލު މުހައްމަދު ނިޝާން އިބްރާހިމް
ނިޝާން ވިދާޅުވީ 2022 ވަނަ އަހަރު ގޯއްޗާއި، ފްލެޓު ދޭ އުސޫލުގެ 19 ވަނަ އުސޫލާ 20 ވަނަ އުސޫލު ހަދާފައިވަނީ ދިވެހިރާއްޖޭގެ ގާނޫނުން ބާރު ލިބިގެން ގާނޫނާ ހަވާލާ ދިނުމަށްފަހު ކަމަށެވެ. އަދި މިއުސޫލު މި ސަރުކާރު ބަދަލު ކޮށްފައިވަނީ ސިޓީ ނޯޓަކުން ކަމަށާއި، އެއީ ސީދާ ގާނޫނު އަސާސީއާ ހިލާފު ކަމެއް ކަމަށެވެ. އަދި އެގޮތަށް އެކަން ނުކުރެވޭނެ ކަމަށް އޭނާ ވިދާޅުވިއެވެ.
