ވަޅިތަންޑު އަޅައި ހިލިހިލާ ޖަހައިގެން ދިވެހިރާއްޖޭގެ ރައްޔިތުން ނުގެންގުޅެވޭނެ ކަމަށާއި، ތާރީޚުން ވެސް އެކަން ހެކިދޭނެ ކަމަށް މަޝްހޫރު ގާނޫނީ ވަކީލް މުހައްމަދު ނިޝާން އިބްރާހިމް ވިދާޅުވެއްޖެއެވެ.

ރާއްޖެޓީވީގެ ޓީވީޓޯކް ޕްރޮގްރާމްގައި ނިޝާން ވިދާޅުވީ ރައީސް ޑރ.މުހައްމަދު މުއިއްޒު ބޭނުންވާ އަމާޒަށް ވާސިލުވުމަށް ގާނޫނުގެ ބާރު ބޭނުންކޮށްގެން ކުޑަ ދުވަސްކޮޅަކަށް ނުވަތަ ކުޑަ ވަގުތުކޮޅަކަށް ހިފެހެއްޓިދާނެ ކަމަށެވެ. ނަމަވެސް މިއީ ރާއްޖެ ކަމަށާއި، ވަޅިތަންޑު އަޅައި، ހިލިހިލާ ޖަހައި، ބަދެގެން ނުގެންގުޅެވޭނެ ކަމަށާއި، ދިވެހި ތާރީޚުން މިކަން ފެންނަން އެބައޮތް ކަމަށް ނިޝާން ވިދާޅުވިއެވެ.

މީޑިއާ ކޮންޓްރޯލް ކުރާ ބިލަށް އިޝާރާތް ކުރައްވައި ނިޝާން ވިދާޅުވީ މިބިލާއެކު ދިވެހި ހުރިހާ ރައްޔިތުން ނޫސްވެރިންނަށްވާނެ ކަމަށެވެ.

ނިޝާން ވިދާޅުވީ މީޑީއާ ކޮންޓްރޯލް ކުރާ މި ބިލަކީ ދިވެހި ރައްޔިތުންގެ އަގަމަތީގައި ޓޭޕް އަޅަން ފަރުމާ ކޮށްފައި އޮތް ބިލެއް ކަމަށެވެ. އެ ބިލާއެކު އެގާނޫނު ތަންފީޒު ކުރި ނަމަވެސް ދިވެހި ރައްޔިތުން ނުކުމެ އެޓޭޕް ނައްޓާނެކަމުގެ ފުރިހަމަ ޔަގީންކަން އެބައޮތް ކަމަށް އޭނާ ވިދާޅުވިއެވެ.

މީޑީއާ ކޮންޓްރޯލް ކުރާ ބިލު މަޖިލީހަށް ހުށަހަޅާފައިވަނީ ސަރުކާރު އަޑީގައި އޮވެގެން ތުޅާދޫ ދާއިރާގެ މެންބަރު އަބްދުލް ހަންނާން އަބޫބަކުރެވެ.

މި ގާނޫނުގެ ދަށުން އަލަށް އުފައްދާ މޯލްޑިވްސް މީޑީއާ އެންޑް ބްރޯޑްކާސްޓިންގ ކޮމިޝަން އަށް ބޮޑެތި ބާރުތައްކެއް ލިބިދީފައިވާ އިރު، ބިލުގައިވާ ގޮތުން މީޑިއާގައި މަސައްކަތް ކުރާ ފަރާތެއް ނުވަތަ ނޫސްވެރިން ސުލޫކީ މިންގަނޑާ ޚިލާފުވެއްޖެ ނަމަ ފިޔަވަޅު އެޅޭނެއެވެ. ކޮމިޝަނުން ރަނގަޅު ކުރުމަށް އަންގާ ކަމެއް އިސްލާހު ނުކޮށްފިނަމަ 5،000ރ އާއި 25،000ރ އާ ދެމެދުގެ އަދަދަކުން ޖުރިމަނާ ކުރެވިދާނެ ކަމަށް ބުނެފައިވެއެވެ.

ކޮމިޝަނަށް ލިބިދީފައިވާ ބާރުގެ ދަށުން އެޅިދާނެ ކަމަށް ގާނޫނު ގައި ބުނާ ފިޔަވަޅު ތަކުގެ ތެރޭގައި ބްރޯޑްކާސްޓަރުންނަށް ކަމެއް ރަނގަޅު ކުރަން އެންގުމާއި، އިންޒާރު ދިނުމާއި، ކުށުގެ އިސްލާހު އާންމު ކުރުމާއި، ކުށެއް ތަކުރާރު ވިޔަ ނުދިނުމަށް ކަންކަން ކުރަން އެންގުމާއި، ވޭތުވެ ދިޔަ އަހަރު އެފަރާތައް ލިބުނު އާމްދަނީގެ 10 އިން ސައްތަ އަށް ވުރެ ބޮޑު ނޫން އަދަދަކުން ޖުރިމަނާ ކުރުމާއި، ޕްރޮގްރާމް ޝެޑިއުލް އިން ބައެއް ވަގުތީ ގޮތުން މެދުކަނޑާލަން އެންގުމާއި، ކޮންޓެންޓް ބްރޯޑްކާސްޓް ކުރުން ހުއްޓުވުމަށް އެންގުމާއި، ކޯޓަށް ހުށަހަޅައިގެން ލައިސަންސް ބާތިލު ކުރުން ހިމެނެއެވެ.

މީގެ އިތުރުން ނޫސް މަޖައްލާ އަކުން ސުލޫކީ މިންގަނޑާ ޚިލާފުވާ ނަމަ 5000ރ އާއި 100،000ރ އާ ދެމެދުގެ އަދަދަކުން ޖުރިމަނާ ކުރެވިދާނެ އެވެ.