އެޗްޑީސީގެ އެޕްރެންޓިސްޝިޕް ޕްރޮގްރާމް ނިންމާލައިފި
55 ބައިވެރިން ސެޓްފިކެޓް ހާސިލްކޮށްފައިވޭ
އެޗްޑީސީ 4 ވަނަ އެޕްރެންޓިސްޝިޕް ޕްރޮގްރާމް
އެޗްޑީސީން ޚިދުމަތްތެރި ދިވެހިން ބިނާކުރުމުގެ މަޤްޞަދުގައި އެކުންފުނިން ކުރިޔަށް ގެންދިޔަ އެޕްރެންޓިސްޝިޕް ޕްރޮގްރާމްގެ 4 ވަނަ ޕްރޮގްރާމް ނިންމާލައިފިއެވެ.
މި ޕްރޮގްރާމްގެ ނިމުން ފާހަގަކުރުމަށް ބޭއްވި ރަސްމިއްޔާތުގައި ޕްރޮގްރާމް ފުރިހަމަ ކުރި ފަރާތްތަކަށްވަނީ ހަނދާނީ ލިޔުން ހަވާލުކޮށްފައެވެ. މި ރަސްމިއްޔާތު ޝަރަފުވެރިކޮށްދެއްވާފައިވަނީ މިނިސްޓަރ އޮފް ހަޔަރ އެޑިއުކޭޝަން ޑރ. އިބްރާހިމް ހަސަންއެވެ.
އެޗްޑީސީން މި އަހަރު ކުރިޔަށް ގެންދިޔަ އެޕްރެންޓިސްޝިޕް ޕްރޮގްރާމް 55 ބައިވެރިން ނިންމާ ސެޓްފިކެޓް ހާސިލް ކޮށްފައިވާއިރު، މި ޕްރޮގްރާމް ކުރިޔަށް ގެންދިޔައީ މޯލްޑިވްސް ނޭޝަނަލް ސްކިލްސް ޑިވްލޮޕްމެންޓް އޮތޯރިޓީގެ ނެޝަނަނަލް އެޕްރެންޓިސްޝިޕް ޕްރޮގްރާމް (އެން.އޭ.ޕީ) ގެ ގައިޑްލައިންސްއާ އެއްގޮތްވާ ގޮތުގެ މަތީންކަމަށް އެޗްޑީސީން ވަނީ ބުނެފައެވެ. އަދި ޕްރޮގްރާމް ފުރިހަމަ ކުރާ ފަރާތްތަކަށް މޯލްޑިވްސް ކޮލިފިކޭޝަން އޮތޯރިޓީ ޤަބޫލުކުރާ ނެޝަނަލް ލެވެލް 3 ގެ ސަނަދެއް ލިބިގެންދާނެ ކަމަށް ވެސް އެ ކޯޕަރޭޝަނުން ބުންޏެވެ.
4 މަސްދުވަހުގެ މުއްދަތަކަށް ކުރިޔަށް ގެންދިޔަ މި ޕްރޮގްރާމްގައި 6 ދާއިރާއަކުން ބައިވެރިން ވަނީ ތަމްރީން ކުރެވިފައެވެ. މިގޮތުން ހެވީވެހިކަލް، ވެލްޑިންގ، މޭސަނަރީ، ގާރޑަނިންގ އަދި އިލެކްޓްރިކަލް އަދި ކޮންސްޓްރަކްޝަން ދާއިރާ ހިމެނެއެވެ. އަދި މި ޕޮރޮގްރާމްގެ ބައިވެރިންނަށް ވަނީ އެލަވަންސްގެ ގޮތުގައި މަހަކު 6000 ރުފިޔާ ވެސް ދެވިފައި ކަމަށް އެޗްޑީސީން ބުންޏެވެ.
ގިނަ ދާއިރާތަކަކުން ޤާބިލް ޒުވާނުން ބިނާކުރުމާއި ޒުވާނުންގެ ކުރިއެރުމަށް ގިނަ ފުރުޞަތުތަކެއް ތަނަވަސްކޮށްދޭން އެޗްޑީސީން އަބަދުވެސް މަސައްކަތްކުރާނެކަމަށާއި، މިޕްރޮގްރާމް ނިމިގެންދާއިރު އެންމެ ރަނގަޅު ފަރާތްތަކަށް އެ ކޯޕަރޭޝަނުގައި ވަޒީފާގެ ފުރުސަތުތައް ހުރި މިންވަރަކުން ވަޒީފާ ހަމަޖައްސައިދެވޭނެ ކަމަށް ވެސް އެޗްޑީސީން ވަނީ ބުނެފައެވެ.
