އެމްޑީޕީގެ އެތެރޭގެ އިންތިޚާބުގައި ވޯޓުލާފައިވަނީ 47،100 މީހުން

ސެޕްޓެމްބަރ މަހުގެ 25 ވަނަ ދުވަހު ކުރިޔަށްދިޔަ އެމްޑީޕީގެ ދާއިރާތަކުގެ އިންތިޚާބުގައި ވޯޓުލާން ނިކުމެފައިވަނީ 47،100 މީހުންކަމަށް އެޕާޓީން ބުނެފިއެވެ.

އެމްޑީޕީގެ އެންމެ ބާރުގަދަ ގުނަވަން ކަމުގައިވާ ގައުމީ މަޖިލީހަށް ކުރިޔަށް އޮތް 5 އަހަރުގެ މުއްދަތަށް މެމްބަރުން އިންތިޚާބުކުރުމަށް ކުރިޔަށްގެންދިޔަ އިންތިޚާބުގައި 93,612 މެމްބަރުންނަށް ވޯޓުލެވެއެވެ. ވޯޓުލާން 47،100 މީހުން ނިކުމެފައިވާއިރު މިއީ ވޯޓުލާން ޖެހޭ މީހުންގެ ތެރެއިން 50.31 އިންސައްތަ މީހުންނެވެ.

އެމްޑީޕީގެ އެތެރޭގެ އިންތިޚާބުތަކަކީ އާންމު ގޮތެއްގައި ވެސް ވާދަވެރި އިންތިޚާބުތަކެއް ނަމަވެސް މިފަހަރުގެ އިންތިޚާބު ފެނުނީ ވަރަށް ވާދަވެރި އިންތިޚާބެއްގެ ގޮތުގައެވެ. ވަކިން ޚާއްސަކޮށް އިންތިޚާބުގެ ވާދަވެރިކަން ބޮޑުވީ ރައީސް މުހައްމަދު ނަޝީދު އާއި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އާ ދެމެދު އުފެދިފައިވާ ޚިޔާލުތަފާތުވުންތަކާއެކު އެމްޑީޕީގެ އެތެރޭގައި އުފެދިފައިވާ ދެ ފެކްޝަންގެ ސަބަބުންނެވެ. އެހެންކަމުން ވޯޓުލާން ނިކުންނަ މީހުންގެ އަދަދު އިތުރުވާނެކަމަށް ކުރިން ވެސް ވަނީ ބެލެވިފައެވެ.

އެމްޑީޕީން ހާމަކޮށްފައިވާ ވޯޓަރސް ލިސްޓަށް ބަލާއިރު މާލެ ސިޓީން ވޯޓުލެވޭކަމަށް އެޕާޓީން ހާމަކޮށްފައިވަނީ 13،084 މީހުންނަށެވެ. އެހެންނަމަވެސް އާންމުކޮށްފައިވާ ވަގުތީ ނަތީޖާއަށް ބަލާއިރު ވޯޓުލާފައިވަނީ 4097 މީހުންނެވެ. މާލެ ސިޓީގެ ރައީސްގެ ގޮނޑިއަކީ މިފަހަރުގެ އިންތިޚާބުގައި އެންމެ ވާދަވެރިކަން ބޮޑުވެގެން ދިޔަ އެއް ގޮނޑިއެވެ.

އެޕާޓީގެ މެމްބަރުން އެންމެ ގިނަކަމަށް ބެލެވޭ ބޮޑެތި ތަންތަނަށް ބަލާއިރު އައްޑޫ ސިޓީގައި ވޯޓުލާން ނިކުމެފައިވަނީ 5353 މީހުންނެވެ. ކުޅުދުއްފުށި ސިޓީން ވޯޓުލާން ނިކުމެފައިވަނީ 549 މީހުންނެވެ. މީގެއިތުރުން ފުވައްމުލަކު ސިޓީން ވޯޓުލާން ނިކުމެފައިވަނީ 1472 މީހުންނެވެ.

އެމްޑީޕީން ބުނެފައިވަނީ މިއިންތިޚާބުގައި ވޯޓުލެވޭކަމަށް ނިންމާފައިވަނީ ދަފްތަރުގައި ނަން ހިމެނުމަށް އޮތް އެންމެ ފަހު ތާރީޚުކަމުގައިވާ 24 އޭޕްރީލް 2021ގެ ކުރީގެ ތާރީޚެއްގައި އެމީހެއްގެ ނަން ޕާޓީގެ ދަފުތަރުގައި އޮތް މީހުންކަމަށެވެ. އިލެކްޝަންސް ކޮމިޝަންގެ ވެބްސައިޓްގައިވާ ގޮތުން މިއަހަރުގެ ޖޫން މަހުގެ 30 ވަނަ ދުވަހުގެ ނިޔަލަށް އެޕާޓީގެ ދަފުތަރުގައި ތިބީ 53139 މެމްބަރުންނެވެ.