އޮކްޓޯބަރ 1 ގައި ލަންކާއިން ލޮކްޑައުން އުވާލަނީ
ލަންކާގެ ސިއްހީ ހިދުމަތްތެރިން އަންނަނީ މި ނިންމުމަށް ފާޑުކިޔަމުން
ކޮވިޑް-19:ސްރީލަންކާގެ ޙާލަތު
އަންނަ އޮކްޓޯބަރު މަހުގެ 1 ވަނަ ދުވަހުން ފެށިގެން ލަންކާއިން ލޮކްޑައުން އުވާލަން ނިންމާފިއެވެ.
ކޮވިޑް-19 އިން ރައްކާތެރިވުމަށް ލަންކާއިން ހަރުކަށި ފިޔަވަޅުތަކެއް އަޅާފައިވާއިރު، ލަންކާގެ ސިއްހަތާ ބެހޭ ވަޒީރު ކެހެލިޔާ ރަމްބުކްވާލާ ވިދާޅުވީ އަންނަ މަހުގެ އެއްވަނަ ދުވަހުން ފެށިގެން ލޮކްޑައުން އުވާލަން ނިންމާފައިވާ ކަމަށެވެ. ރަމްބުކްވާލާ މިހެން ވިދާޅުވިއިރު، ލަންކާގެ ސިއްހީ ހިދުމަތްތެރިން އަންނަނީ މި ނިންމުމަށް ފާޑުކިޔަމުންނެވެ.
ކޮވިޑްގެ ކޭސްތައް އިތުރުވާން ފެށުމާ ގުޅިގެން ލަންކާ ލޮކްޑައުން ކޮށްފައިވަނީ އޮގަސްޓު މަހުގެ 20 ވަނަ ދުވަހުއެވެ.
ރަމްބުކްވާލާ ވިދާޅުވީ ކޮވިޑުން ރައްކާތެރިވުމަށް އަޅާފައިވާ ފިޔަވަޅުތަކަށް ލުއި ދިނުމަށް ނިންމީ ކޮވިޑްއަށް ޕޮޒިޓިވްވާ މީހުންގެ އަދަދު ކޮންޓްރޯލް ކުރެވިފައިވުމުން ކަމަށެވެ. އަދި މިހާލަތަށް ބަލާއިރު، ގައުމު ލޮކްޑައުން ކޮށްގެން ލިބޭ ގެއްލުން ބޮޑުވާނެ ކަމަށް ބެލެވޭ ކަމަށް ރަމްބުކްވާލާ ވިދާޅުވިއެވެ.
މި ނިންމުމާ ގުޅިގެން ސްރީލަންކަން މެޑިކަލް އެސޯސިއޭޝަނުން ބުނީ ކޮވިޑްގެ ހާލަތު ލަންކާއިން ބަދަލުކުރީ ވަރަށް ބޮޑެތި ގުރުބާނީތަކެއް ވެގެން ކަމަށާއި، އަދިވެސް ހާލަތު އެއްކޮށް ބަދަލުނުވާ ކަމަށެވެ. އެހެންކަމުން ގައުމުގެ ހާލަތު އިތުރަށް ގޯސްވިޔަ ނުދިޔުމަށް މިވަގުތު ގައުމު ލޮކްޑައުންގައި އޮތުން މުހިންމު ކަމަށް އެ އެސޯސިއޭޝަނުން ވަނީ ބުނެފައެވެ.
އަންގާރަ ދުވަހު އެކަނިވެސް ލަންކާގައި 55 މީހުން ކޮވިޑްގެ ބަލީގައި މަރުވެފައިވާއިރު، 2000 އަށްވުރެ ގިނަ މީހުން ވަނީ ބައްޔަށް ޕޮޒިޓިވްވެފައެވެ.
