އދ.ގެ އާއްމު މަޖިލީހުގެ އާއްމު ބަހުސް ނިމިއްޖެ

އދ.ގެ އާއްމު މަޖިލީހުގެ މިއަހަރުގެ އާންމު ޖަލްސާ ނިމި، ގައުމުތަކުގެ ލީޑަރުންގެ އާންމު ބަހުސް ނިންމާލައިފިއެވެ.

އާއްމު މަޖިލީހުގެ ބަހުސް ފެށިގެން ކުރިއަށް ދިޔައީ މި މަހުގެ 22ވަނަ ދުވަހުން ފެށިގެންނެވެ. މި ބައްދަލުވުމުގައި ޖެނެރަލް އެސެމްބްލީގައި ތަމްސީލު ކުރަމުންދާ 194 ގައުމެއްގެ އިސްވެރިން ވާހަކަ ދައްކަވާފައި ވެއެވެ. މީގެތެރޭގައި ދުނިޔޭގެ 100 ގައުމަކުން ދައުލަތުގެ އެންމެ އިސްވެރިން އާންމު މަޖިލީހުގައި ތަގްރީރު ކުރެއްވިއެވެ. އަދި 52 ގައުމެއްގެ ސަރުކާރުގެ އެންމެ އިސްވެރިން ތަގުރީރު ކުރައްވާފައި ވެއެވެ. މީގެ އިތުރުން 3 ގައުމެއްގެ ނައިބު ރައީސުންނާއި، 34 ގައުމަކުން ވަޒީރުން ފެންވަރުގެ ބޭފުޅުން މި ޖަލްސާގައި މިއަހަރު ތަގްރީރު ކުރެއްވިއެވެ.

މި އަހަރުގެ އާންމު ޖަލްސާގައި ދުނިޔޭގެ 194 ގައުމެއްގެ ފަރާތުން އިސްވެރިން ތަގުރީރު ކުރައްވާފައިވާއިރު، މީގެތެރޭގައި 18 އަންހެން ބޭފުޅުން ވެސް ހިމެނެއެވެ.

މިހާރު ފެށިގެން ކުރިއަށްދާ 76 ވަނަ އާންމު މަޖިލީހުގައި ދުނިޔޭގެ ބައެއް ގައުމުތަކުގެ ވެރިން ވަނީ ވީޑިއޯ މެދުވެރިކޮށް ވެސް ތަގްރީރު ކުރައްވާފައެވެ. މީގެތެރޭގައި އިރާނުގެ ރައީސްކަމަށް ދާދިފަހުން އިންތިޚާބު ވެވަޑައިގަތް އިބްރާހިމް ރައީސީއާއި ފަލަސްތީނުގެ ރައީސް މަހުމޫދު އައްބާސް ވެސް ހިމެނިވަޑައިގަންނަވައެވެ.

މަޖިލީހުގެ ޖަލްސާ ނިމިގެން ދިޔައިރު މި ޖަލްސާގައި ދުނިޔޭގެ ލީޑަރުންވަނީ މިހާރު ދުނިޔެއަށް ކުރިމަތިވަފައިވާ ބޮޑެތި މައްސަލަތަކަށް އަލި އަޅުއްވާލައްވާ ވާހަކަ ދައްކަވާފައެވެ. މިގޮތުން މި ޖަލްސާގައި ދުނިޔޭގެ ލީޑަރުން އަލި އަޅުއްވާލެވި މުހިން ކަންކަމުގެ ތެރޭގައި، ކޮވިޑް-19 އިން ރައްކާތެރި ވުމާއި، ވެކްސިންގެ ހަމަހަމަ ކަމާއި، ދެމެހެއްޓެނިވި ތަރައްގީއާއި، ދުނިޔޭގެ ތިމާވެށި ހިމާޔަތް ކުރުމަށް އަޅަންޖެހޭ ފިޔަވަޅުތަކުގެ އިތުރުން، ދުނިޔޭގެ އެކި ކަންކޮޅުތަކުގައި ސަލާމަތާއި ރައްކާތެރިކަން އަދި ސުލްހަ ގާއިމްކުރުން ހިމެނެއެވެ.

އދ.ގެ އާއްމު މަޖިލީހަކީ 194 މެމްބަރު ގައުމުގެ މައްޗަށް އެކުލެވޭ އާންމު މަޖިލީހެވެ. މިއީ ޔޫއެންގެ ސިޔާސަތު ކަނޑައަޅާ އެންމެ މުހިންމު ގުނަވަނެވެ.